ചെന്നൈ: ബിജെപിയുടെ ഐടി വിംഗ് 'പണിയില്ലാത്ത ബാര്ബര്' മാരെ പോലെയാണെന്ന ഡിഎംകെ നേതാവ് ദയാനിധി മാരന്റെ പ്രസ്താവന വിവാദമാക്കി തമിഴ്നാട് ബിജെപി. ഡിഎംകെ എംപിയുടെ പ്രസ്താവന ബാര്ബര്മാരെ ജാതീയമായി അധിക്ഷേപിക്കുന്നതാണ് എന്ന ആക്ഷേപമാണ് ഉയര്ത്തിയിരിക്കുന്നത്. ചിലരുടെ ജോലിയെ അവമതിക്കുന്ന പ്രസ്താവനയാണ് ഇതെന്നും ഡിഎംകെ നേതാക്കളുടെ ജാതിവാദം പുറത്തു വന്നിരിക്കുകയാണെന്നും ബിജെപിയുടെ സംസ്ഥാന പ്രസിഡന്റും സെന്ട്രല് ചെന്നൈ എംപിയുായ കെ അണ്ണാമലൈ പറഞ്ഞു.
അടുത്തിടെയാണ് തമിഴ്നാട്ടിലെ ഹിന്ദി സംസാരിക്കുന്നവരെ അധിക്ഷേപിച്ച് മാരന് നടത്തിയ നാലുവര്ഷം മുമ്പത്തെ ഒരു വീഡിയോ പുറത്തുവന്നത്. വിദ്യാഭ്യാസമില്ലാത്ത ഹിന്ദിക്കാര് തമിഴ്നാട്ടില് വന്ന് ഞങ്ങളുടെ കക്കൂസ് കഴുകുകയാണെന്നും ഇംഗ്ളീഷ് പഠിച്ച തമിഴ്നാട്ടുകാര് പുറത്തുപോയി വന്തുക ശമ്പളത്തില് ജോലി ചെയ്യുകയാണെന്നും ദയാനിധി മാരന് പറയുന്നതിന്റെ വീഡിയോ സാമൂഹ്യമാധ്യമങ്ങളില് എത്തിയത്. ഇതിന്റെ പ്രതികരണമായിട്ടായിരുന്നു മാരന്റെ പുതിയ പ്രസ്താവനയും. ഇക്കാര്യം ചോദിച്ച മാധ്യമപ്രവര്ത്തകരോട് ബിജെപിയുടെ ഐടി വിംഗിനെ തൊഴിലില്ലാത്ത ബാര്ബര്മാരോട് ഉപമിച്ച മാരന് ബിജെപിയുടെ ഐടിവിഭാഗം പണിയില്ലാത്ത ബാര്ബര്മാരെ പോലെയാണെന്നും ഒരു പണിയുമില്ലെങ്കില് അവര് പോയി പൂച്ചയെ ഷേവ് ചെയ്യട്ടെയെന്നുമായിരുന്നു പ്രതികരിച്ചത്.
പ്രൊഫഷന് കൊണ്ടോ ഭാഷ കൊണ്ടോ ഒരാളെ തരംതാഴ്ത്തുന്നത് ഡിഎംകെ എംപി ദയാനിധി മാരന് മാത്രമാണെന്ന് തോന്നുന്നെന്നാണ് അണ്ണാമലൈ പ്രതികരിച്ചത്. ''മാപ്പ് പറയുന്നതിനുപകരം, നമ്മുടെ ഉത്തരേന്ത്യന് സഹോദരീസഹോദരന്മാരെക്കുറിച്ച് തന്റെ പരിഹാസങ്ങള് പ്രചരിപ്പിക്കുകയും പ്രതികരിക്കുകയും ചെയ്യുകയാണ്. 'തൊഴിലില്ലാത്ത ബാര്ബര്' എന്നാണ് ദയാനിധി മാരന് വിളിക്കുന്നത്. നിരന്തരമായ ഈ തരംതാഴ്ത്തലിലൂടെ, തിരഞ്ഞെടുപ്പില് നിരന്തരം തോറ്റിട്ടും ഇന്ത്യാ കക്ഷി നേതാക്കള്ക്ക് മനംമാറ്റം വരുന്നില്ലെന്നത് കഷ്ടമാണെന്നും പറഞ്ഞു.
