കൊല്ലം തിരുവനന്തപുരം ജില്ലകളിലാണ് സ്ത്രീധന പീഡന കേസുകള് ഏറ്റവും കൂടുതല് രജിസ്റ്റര് ചെയ്യപ്പെടുന്നതെന്ന് വനിതാ കമ്മിഷന് അധ്യക്ഷ അഡ്വ. പി. സതീദേവി . കൊല്ലം കുളത്തൂപ്പുഴ ഗ്രാമപഞ്ചായത്ത് ഹാളില് സംഘടിപ്പിച്ച സെമിനാര് ഉദ്ഘാടനം ചെയ്തു സംസാരിക്കുകയായിരുന്നു ഇവര്.
അയല്വീട്ടിലേതിനേക്കാള് കൂടുതല് സ്വര്ണം സ്ത്രീധനം നല്കണമെന്നും കൂടുതല് പേരെ ക്ഷണിക്കണമെന്നുമാണ് ആളുകളുടെ ചിന്ത. പെണ്കുട്ടികളെ ബാധ്യതയാണ് സമൂഹം കാണുന്നത്. ഞാനവളെ കെട്ടിച്ചു വിട്ടു, ഇത്രപവന് നല്കി ഇറക്കി വിട്ടു എന്ന രീതിയിലാണ് വിവാഹം സംബന്ധിച്ച് മാതാപിതാക്കളുടെ സംസാരം. ഈ പശ്ചാത്തലം കണക്കിലെടുത്ത് പാരിതോഷികങ്ങള്ക്ക് പരിധി നിശ്ചയിക്കണമെന്നും ആഡംബര വിവാഹങ്ങള്ക്ക് നികുതി ചുമത്തണമെന്നും സംസ്ഥാന സര്ക്കാരിന് വനിതാ കമ്മിഷന് ശിപാര്ശ നല്കുമെന്നും അവര് പറഞ്ഞു.
നിയമം കൊണ്ടു മാത്രംസ്ത്രീധനത്തെ നിരോധിക്കാന് സാധിക്കില്ല. ഈ സാമൂഹിക വിപത്തിനെതിരേ നാം ഓരോരുത്തരും തീരുമാനം എടുക്കണം. ആഡംബര വിവാഹം നടത്തിയ ശേഷം ഭാര്യാ, ഭര്ത്താക്കന്മാര് തമ്മില് പ്രശ്നമുണ്ടാകുമ്പോള് അഡ്ജസ്റ്റ് ചെയ്തു ജീവിക്കണമെന്നാണ് ഉപദേശിക്കുന്നത്. മര്ദനം ഉള്പ്പെടെ പീഡനം സഹിച്ചു ജീവിക്കണമെന്ന കാഴ്ചപ്പാടു മൂലം പെണ്കുട്ടികളുടെ ജീവിതം താറുമാറാകും. അഡ്ജസ്റ്റ് ചെയ്യാന് സാധിക്കാതെ വരുമ്പോള് പെണ്കുട്ടികള് ആത്മഹത്യയിലേക്ക് വഴിമാറുന്നത് ആശങ്കപ്പെടുത്തുന്നതാണ്.
കൂടുതല് മാറ്റമുണ്ടാകേണ്ടത് മാതാപിതാക്കളുടെ ചിന്താഗതിയിലാണ്. വീടുകളുടെ അകത്തളങ്ങളില് നിന്ന് അഭിപ്രായങ്ങള് ഉയരണം. പെണ്കുട്ടികള്ക്ക് അഭിപ്രായങ്ങള് പറയുന്നതിന് അവസരം നല്കണം. സ്ത്രീകള്ക്ക് അവരില് അന്തര്ലീനമായ കഴിവുകള് സ്വയം തിരിച്ചറിയാന് സാധിക്കണം. സ്വന്തം ജീവിതം തിരിച്ചറിയാനും നിര്ണയിക്കാനും പെണ്കുട്ടികള്ക്ക് അവകാശം നല്കണം. സ്വയം തീരുമാനങ്ങള് എടുക്കാനുള്ള കഴിവ് ആര്ജിക്കുന്നതിന് പെണ്കുട്ടികളെ പ്രാപ്തമാക്കിയെങ്കിലേ സ്ത്രീശാക്തീകരണം പൂര്ണമാകുകയുള്ളൂവെന്നും വനിതാ കമ്മിഷന് അധ്യക്ഷ പറഞ്ഞു.
