കേരളക്കര ആശങ്കയോടെ നോക്കിക്കാണുന്ന ഒന്നാണ് മുല്ലപ്പെരിയാര് അണക്കെട്ട്. വെള്ളത്തിന്റെ അളവ് കൂടുന്തോറും അണക്കെട്ടിന്റെ ബലക്ഷയത്തെക്കുറിച്ചുള്ള ഞെട്ടിപ്പിക്കുന്ന വാര്ത്തകളാണ് പുറത്തുവന്നുകൊണ്ടിരിക്കുന്നത്. ഏത് നിമിഷവും അണക്കെട്ട് പൊട്ടും എന്ന ഭീതിയിലാണ് ആളുകള്. ഇത്തരം സന്ദര്ഭങ്ങളില് പലപ്പോഴും സാമൂഹിക മാധ്യമങ്ങളിലും മറ്റും പ്രചരിക്കാറുള്ള സാങ്കേതിക വിദ്യയുടെ സഹായത്തോടെ സൃഷ്ടിച്ച വെര്ച്വല് അണക്കെട്ടുകള് തകരുന്ന വീഡിയോകള് പോലും അത്യന്തം ഭീതിയോടെ നമ്മുക്ക് കാണാന് കഴിയുകയുള്ളു.
ഇപ്പോഴിതാ അണക്കെട്ട് പൊട്ടിയാലുണ്ടാകുന്ന തീവ്രത എത്രത്തോളം വലുതാണെന്ന് കാണിച്ചുതരുകയാണ് കഴിഞ്ഞ ദിവസം വൈറലായ ഒരു വീഡിയോ. . വെള്ളം സുനാമി പോലെ കുതിച്ചുയര്ന്ന് ആര്ത്തലച്ച്, കടന്ന് വരുന്ന വഴിയിലുള്ള എല്ലാ വസ്തുക്കളെയും ഒഴുക്കിക്കൊണ്ട് പോകുന്ന കാഴ്ചയാണ് ഈ വീഡിയോയില് ഉള്ളത്. ബ്രസീലിലെ ഒരു ചെറിയ അണക്കെട്ട് തകര്ന്നപ്പോഴുണ്ടായ ദുരന്തത്തിന്റെ യഥാര്ത്ഥ ദൃശ്യങ്ങളാണ് ഇത്. ഡിസ്കവര് ഔര് നേച്ചര് എന്ന ഇന്സ്റ്റാഗ്രാം ഹാന്ഡിലില് പോസ്റ്റ് ചെയ്തിരിക്കുന്ന ഈ ചെറു വീഡിയോ ഇതിനോടകം 5 ലക്ഷത്തിലധികം ആളുകള് കണ്ടുകഴിഞ്ഞു. വലിയ അണക്കെട്ടുകളുമായി ബന്ധപ്പെട്ട ആശങ്കകള് പങ്കുവെച്ചുകൊണ്ടാണ് ഈ വീഡിയോ പോസറ്റ് ചെയ്തിരിക്കുന്നത്.
പലപ്പോഴും വലിയ അണക്കെട്ടുകള് നിര്മ്മിക്കപ്പെടുമ്പോള്, ഗ്രാമങ്ങളും എന്തിന് വലിയ നഗരങ്ങള് പോലും മുഴുവനായും വെള്ളത്തിനടിയില് മുങ്ങിയേക്കാമെന്നാണ് അടികുറിപ്പില് പറയുന്നത്. ഇതിനുള്ള ഏറ്റവും പ്രശസ്തമായ ഉദാഹരണം ചൈനയിലെ ഷി ചെങ് നഗരമാണന്നും ഇത് ക്വിയാന്ഡോ തടാക അണക്കെട്ടിന്റെ നിര്മ്മാണം കാരണം വെള്ളത്തിനടിയിലാണന്നും കുറിപ്പില് പറയുന്നു. വലിയ അണക്കെട്ടുകള് തടഞ്ഞുനിര്ത്തുന്ന വെള്ളത്തിന്റെ അളവ് വളരെ വലുതായിരിക്കും. ഉദാഹരണത്തിന്, യുണൈറ്റഡ് സ്റ്റേറ്റ്സിലെ ഹൂവര് അണക്കെട്ടിന് 9 ട്രില്യണ് ഗാലന് (34 ബില്യണ് ക്യുബിക് മീറ്റര്) വെള്ളം തടഞ്ഞുനിര്ത്താന് കഴിയുമെന്നാണ് കുറിപ്പ് സൂചിപ്പിക്കുന്നത്.
