അയോധ്യ രാമക്ഷേത്രത്തിലെ പ്രാണപ്രതിഷ്ഠാ ദിനത്തില് പങ്കുവെച്ച സമൂഹമാധ്യമ പോസ്റ്റിന് വിമര്ശിക്കപ്പെട്ടതോടെ അതേ നാണയത്തില് തിരിച്ചടി നല്കി ഗായിക സയനോര ഫിലിപ്. മുന്പൊരിക്കല് മകള് സൈന ചോദിച്ച ചില ചോദ്യങ്ങളെക്കുറിച്ച് സമൂഹമാധ്യമ പേജുകളില് എഴുതിയ കുറിപ്പിന്റെ സ്ക്രീന് ഷോട്ട് പങ്കുവെച്ചായിരുന്നു ഗായികയുടെ പ്രതികരണം.
‘പണ്ട് എഴുതി ഇവിടെ തന്നെ പോസ്റ്റ് ചെയ്തതാണ്. ഇവിടെ വന്ന് ഇത്രയും മെഴുകിയ സ്ഥിതിക്ക് ഇതും കൂടി വായിച്ചിട്ട് പോകൂ. ഒരാള് എങ്കിലും ഒരു ആത്മവിചിന്തനം നടത്തിയാല് സന്തോഷം ’എന്ന ക്യാപ്ഷനോടെയാണ് സയനോര സ്ക്രീന് ഷോട്ട് പോസ്റ്റ് ചെയ്തത്.
അതെന്താ മമ്മാ, ഫാത്തിമേന്റെ ഗോഡ് അല്ലാഹ് ആയത്? പിന്നെ നിരഞ്ജനേന്റേ ഗോഡ് ശ്രീകൃഷ്ണന് ആണ് പോലും. എനിക്കും ഇഷ്ടാ ശ്രീകൃഷ്ണനെ. മമ്മാ പ്ലീസ് നമുക്കും കൃഷ്ണനെ ഗോഡ് ആക്കാ മമ്മാ പ്ലീസ് ? സ്കൂള് വിട്ട് വന്ന സൈന കുറേ ചോദ്യങ്ങള് ചോദിച്ചുകൊണ്ടേയിരുന്നു.
അവളുടെ വിടര്ന്ന കണ്ണുകള് നോക്കി ഞാന് പറഞ്ഞു ‘വാവാ ഗോഡ് ഒരേ ഒരാള് മാത്രമേയുളളൂ. ആ ഗോഡ് പക്ഷേ കുറേ വേഷത്തില് ഇരിക്കുന്നുവെന്നേയുളളു. ഫാത്തിമ ഗോഡിനെ അല്ലാഹ് എന്നു വിളിക്കും, നിരഞ്ജന കൃഷ്ണാന്നും ശിവാ എന്നുമൊക്കെ വിളിക്കും, നമ്മള് ഗോഡിനെ ജീസസ് ക്രൈസ്റ്റ് എന്നും വിളിക്കുന്നു. എല്ലാവരും സെയിം സെയിം ആണ് വാവാ ’ഇതു കേട്ടപ്പോഴാണ് മൂപ്പര്ക്ക് ശ്വാസം നേരെ വീണത്. പിന്നെ വേഗം കൊച്ചുടീവിയിലെ ലിറ്റില് കൃഷ്ണ കാണാന് ഓടി.
‘മനുഷ്യന് മതങ്ങളെ സൃഷ്ടിച്ചു, മതങ്ങള് ദൈവങ്ങളെയും’ എന്ന വയലാര് രാമവര്മയുടെ പ്രശസ്തമായ വരികളോടൊപ്പം ഇപ്പോള് മനുഷ്യരെ മാത്രം കാണാനില്ല എന്നു കൂടി ചേര്ത്താണ് സയനോര പ്രതിഷേധം അറിയിച്ചത്. ഗായികയുടെ പോസ്റ്റിനെ അനുകൂലിച്ചും പ്രതികൂലിച്ചും പ്രമുഖര് ഉള്പ്പെടെയുളളവര് രംഗത്തെത്തിയിരുന്നു. ഇപ്പോള് പങ്കുവെച്ച കുറിപ്പും ആരാധകര്ക്കിടയില് ചര്ച്ചയായിക്കഴിഞ്ഞു.
