ഹൈദരാബാദ്: വാരണാസിയിലെ ഗ്യാന്വ്യാപി മോസ്ക്കിന്റെ ഭിത്തിയില് തെലുങ്ക് ഭാഷയിലുള്ള ശിലാലിഖിതം കണ്ടെത്തിയെന്ന് ആര്ക്കിയോളജിക്കല് സര്വേ ഓഫ് ഇന്ത്യയുടെ റിപ്പോര്ട്ട. മൈസൂരിലെ എഫിഗ്രാഫി വിംഗാണ് ഇത് കണ്ടെത്തിയതെന്നും തെലുങ്കിലുള്ള മൂന്നെണ്ണം ഉള്പ്പെടെ 34 ലിഖിതങ്ങളുണ്ടെന്നും വിദഗ്ദ്ധര് കണ്ടെത്തിയതായി എഎസ്ഐ ഡയറക്ടര് കെ മുനിരത്നം റെഡ്ഡിയുടെ കീഴിലുള്ള ടീം സമര്പ്പിച്ച റിപ്പോര്ട്ടില് പറയുന്നു. ടൈംസ് ഓഫ് ഇന്ത്യയാണ് ഈ വാര്ത്ത പുറത്തുവിട്ടിരിക്കുന്നത്.
17 ാം ശതകത്തിലേതെന്ന് കരുതുന്ന ഈ ശിലാലിഖിതത്തില് നാരായണ ഭട്ട്ലുവിന്റെ മകന് മല്ലാന ഭട്ട്ലുവിന്റെ പേരാണ് ഉള്പ്പെട്ടിരിക്കുന്നതെന്ന് മുനിരത്നം പറയുന്നു. 1585 ല് നിര്മ്മിച്ചതെന്ന് കരുതുന്ന കാശി വിശ്വനാഥ് ക്ഷേത്രത്തിന്റെ നിര്മ്മാണ മേല്നോട്ടം നടത്തിയിരുന്ന തെലുങ്ക് ബ്രാഹ്മണനാണ് നാരായണ ഭട്ടലു എന്ന് റിപ്പോര്ട്ടില് പറയുന്നു. ജൂണ്പൂരിലെ സുല്ത്താനായ ഹുസൈന് ഷര്ഖിയുടെ നിര്ദേശപ്രകാരമാണ് 15 ാം നൂറ്റാണ്ടിലെ ക്ഷേത്രം തകര്ത്തതെന്നും പറയുന്നു. 1585 ല് ക്ഷേത്രം വീണ്ടും നിര്മ്മിക്കുകയായിരുന്നു.
ദക്ഷിണേന്ത്യയിലെ ക്ഷേത്ര നിര്മ്മാണ വിദഗ്ദ്ധനായ നാരായണ ഭട്ട്ലുവിനോട് ക്ഷേത്ര നിര്മ്മാണത്തിന്റെ മേല്നോട്ടം വഹിക്കാന് അന്നത്തെ ഭരണാധികാരിയായ രാജാ തോഡര്മാള് പറയുകയായിരുന്നു. ഈ ചരിത്രത്തെയാണ് ഇപ്പോള് കണ്ടെത്തിയിരിക്കുന്ന ശിലാലിഖിതം സൂചിപ്പിക്കതെന്നും മുനിരത്നം നല്കിയ വിശദീകരണത്തില് പറയുന്നു. തെലുങ്ക് ഭാഷയിലാണ് ഈ ശിലാലിഖിതം കണ്ടെത്തിയിട്ടുള്ളത്. അതേസമയം ഈ എഴുത്ത് തകര്ന്നതും അപൂര്ണ്ണവുമാണ്. ഇത് സൂചിപ്പിക്കുന്നത് മല്ലാന ഭട്ടലുവിനെയും നാരായണ ഭട്ടലുവിനെയുമാണെന്ന് എഎസ്ഐ ഡയറക്ടര് പറയുന്നു. രണ്ടാമത്തെ തെലുങ്ക് ലിഖിതം മോസ്കിനുള്ളിലാണ് കണ്ടെത്തിയത്. 'ഗോവി' എന്നാണ് ഇത് എഴുതിയിരിക്കുന്നത്. ആട്ടിടയന്മാരാണ് ഗോവികള്. മൂന്നാമത്തെ ലിഖിതം 15 ാം നൂറ്റാണ്ടിലേതാണെന്ന് വിദഗദ്ധര് കണ്ടെത്തിയിട്ടുണ്ട്. ഇത് കാണപ്പെട്ടത് മോസ്ക്കിന്റെ വടക്കേഭാഗത്തെ പ്രധാന കവാടത്തിലാണ്. ഇതിന് 14 വരികളുണ്ട്. ഇവ കേടുപാടുകള് പറ്റിയ നിലയിലാണ്. കുഴിച്ചുമൂടപ്പെട്ട ഒരു വിളക്ക് വാങ്ങുന്നതിന് കിട്ടിയ ഒരു സമ്മാനത്തെക്കുറിച്ചാണ് ഇതെന്നാണ് സൂചന. മറ്റുവിവരങ്ങള് നഷ്ടമായി.
തെലുങ്കിന് പുറമേ കന്നഡ, ദേവനാഗരി, തമിഴ്ഭാഷകളിലും കുറിപ്പുണ്ട്. നേരത്തേ അയോദ്ധ്യയില് നിന്നും സംസ്കൃത ലിഖിതങ്ങളും എഎസ്ഐ കണ്ടെത്തിയിരുന്നു. അയോദ്ധ്യയിലെ സൈറ്റ് നിരപ്പാക്കുന്ന ജോലിക്കിടയില് കുഴിച്ചിടപ്പെട്ട ഒരു സ്ളാബില് നിന്നുമായിരുന്നു അവ കണ്ടെത്തിയത്. 12, 13 നൂറ്റാണ്ടുകളിലെ സംസ്കൃതഭാഷയില് എഴുതിയ കുറിപ്പായിരുന്നു അവയെന്നും മുനിരത്നം പറയുന്നു. വാരണാസിയിലെ ഗ്യാന്വ്യാപി മോസ്ക്ക് കോംപ്ലക്സ് ഒരു വലിയ ഹിന്ദുക്ഷേത്രം നിലനിന്നിരുന്ന സ്ഥലമായിരുന്നു എന്നാണ് എഎ്സഐ സര്വേ റിപ്പോര്ട്ടില് പറയുന്നത്. മോസ്ക്കിന്റെ പടിഞ്ഞാറന് ഭിത്തി ക്ഷേത്രത്തിന്റെ ഭാഗമാണെന്നും അതില് 32 ലിഖിതങ്ങള് കണ്ടെത്തിയിരുന്നതായുമാണ് ഇവര് പറയുന്നത്.
