ചെന്നൈ: തമിഴ്നാട്ടില് ദുരഭിമാനക്കൊലയില് ദളിത് യുവാവിന് ജീവന് നഷ്ടമായി. ജീവ എന്ന് പേരുള്ള യുവാവാണ് മരണപ്പെട്ടത്. പെണ്കുട്ടിയുടെ വീട്ടുകാര് യുവാവിനെ വിളിച്ചുവരുത്തി കൊലപ്പെടുത്തുകയായിരുന്നു എന്നാണ് റിപ്പോര്ട്ടുകള്. ഏതാനും നാളായി ദളിത് യുവാവ് സ്ഥലത്തെ ഒരു സവര്ണ വിഭാഗത്തില് പെടുന്ന പെണ്കുട്ടിയുമായി പ്രണയത്തിലായിരുന്നെന്നും ഇത് വീട്ടുകാര് എതിര്ത്തിരുന്നതായും വിവരമുണ്ട്. യുവതിയുടെ വിവാഹം മറ്റൊരാളുമായി ഉറപ്പിക്കുകയും ചെയ്തിരുന്നതായി കേള്ക്കുന്നു.
സംഭവത്തില് ജീവയുടെ മൃതദേഹം സ്ഥലത്തെ ഒരു ശ്മശാനത്തില് നിന്നുമാണ് കണ്ടെത്തിയത്. ജീവയുടെ വളര്ത്തുനായയുടെ ജഡവും തൊട്ടടുത്ത് നിന്നും കണ്ടെത്തിയിട്ടുണ്ട്. രണ്ടുവര്ഷമായി പ്രണയത്തിലായിരുന്ന ജീവയും പെണ്കുട്ടിയും വിവാഹം കഴിക്കാനും ഒരുമിച്ച് ജീവിക്കാനും തീരുമാനിച്ചിരുന്നു. എന്നാല് ഇതിനെ എതിര്ത്ത് പെണ്വീട്ടുകാര് മറ്റൊരാളുമായി വിവാഹം ഉറപ്പിച്ചു. ഇതോടെ ജീവ താനും പെണ്കുട്ടിയും നില്ക്കുന്ന ചിത്രം വിവാഹം ഉറപ്പിച്ച യുവാവിന് അയച്ചുകൊടുത്തു.
ഇതേ ചൊല്ലി ബുധനാഴ്ച പെണ്കുട്ടിയുടെ കുടുംബം ജീവയുമായി വഴക്കുണ്ടാക്കുകയും ചെറിയ വാക്കുതര്ക്കം ഉണ്ടാക്കുകയും ചെയ്തിരുന്നു. അതിന് ശേഷം ജീവയെ പെണ്കുട്ടിയെ ഉപയോഗിച്ച് തന്നെ പെണ്വീട്ടുകാര് ശ്മശാനത്തിലേക്ക് വിളിച്ചുവരുത്തുകയും വകവരുത്തുകയുമായിരുന്നു എന്നാണ് പുറത്തുവരുന്ന വിവരം. സംഭവത്തില് പെണ്കുട്ടിയുടെ വീട്ടുകാര് ഒളിവില് പോയിരിക്കുകയാണ്. പോലീസ് കേസെടുത്തിട്ടുണ്ട്. ഇതിനെ ജാതിക്കൊലപാതകമായി കാണാനാകില്ലെന്നാണ് പോലീസ് പറയുന്നത്.
