മലപ്പുറം : കുറ്റിപ്പുറത്ത് പൂച്ചയെ പച്ചയ്ക്കു തിന്ന യുവാവിനെ പോലീസ് കണ്ടെത്തി കുതിരവട്ടം മാനസികാരോഗ്യ കേന്ദ്രത്തിലേക്കു മാറ്റി. കുറ്റിപ്പുറം ബസ് സ്റ്റാന്ഡില് കഴിഞ്ഞ ദിവസം വൈകിട്ടായിരുന്നു സംഭവം. നല്ല രീതിയില് വസ്ത്രം ധരിച്ച യുവാവ് പൊതിയില്നിന്ന് ദുര്ഗന്ധം വമിക്കുന്ന എന്തോ എടുത്തു കഴിക്കുന്നതു കണ്ട് വ്യാപാരികള് അടുത്തു ചെന്നു നോക്കിയപ്പോഴാണ് ചത്ത പൂച്ചയുടെ മാംസമാണെന്ന് മനസിലായത്.
നാലു ദിവസമായി ഭക്ഷണം കഴിച്ചിട്ടെന്നും വിശന്നിട്ടാണ് ഭക്ഷിച്ചതെന്നും യുവാവ് പറഞ്ഞു. വിവരമറിയിച്ചതിനെ തുടര്ന്ന് സ്ഥലത്തെത്തിയ പോലീസ് മാംസാവശിഷ്ടങ്ങള് മാറ്റി യുവാവിന് ഷവര്മ്മയും പഴവും വാങ്ങിക്കൊടുത്തു. ഭക്ഷണം കഴിച്ച ശേഷം യുവാവ് ആള്ത്തിരക്കില് മറയുകയായിരുന്നു. ഇതിനിടെ സംഭവത്തിന്റെ വീഡിയോ വൈറലായി. ഇന്നലെ കുറ്റിപ്പുറം റെയില്വേ സ്റ്റേഷന് സമീപത്തുവച്ചാണ് വീണ്ടും കണ്ടെത്തിയത്.
തുടര്ന്ന് ഉച്ചഭക്ഷണം വാങ്ങിക്കൊടുത്ത് കുളിപ്പിച്ച് വൃത്തിയാക്കി വൈകിട്ടോടെ കുതിരവട്ടത്തേക്ക് മാറ്റുകയായിരുന്നു. ഡിസംബര് 12 മുതലാണ് അസമില്നിന്ന് യുവാവിനെ കാണാതായതെന്ന് പോലീസ് സ്ഥിരികരിച്ചിട്ടുണ്ട്. യുവാവിന് മാനസികാരോഗ്യപ്രശ്നമുണ്ടെന്നും ഇതിനാലാണ് കുതിരവട്ടത്തേക്ക് മാറ്റിയതെന്നും കുറ്റിപ്പുറം പോലീസ് പറഞ്ഞു. കഴിഞ്ഞ ദിവസങ്ങളില് യുവാവ് ഈ ഭാഗത്ത് അലഞ്ഞു തിരിയുന്നതായി നാട്ടുകാര് കണ്ടിരുന്നു.
