തിരുവനന്തപുരം: കേരളഗാന വിവാദത്തില് സാഹിത്യ അക്കാദമി അധ്യക്ഷന് കെ. സച്ചിദാനന്ദനെതിരേ തുറന്നടിച്ച് കവി ശ്രീകുമാരന് തമ്പി. എഴുതിനല്കിയ പാട്ട് ക്ലീഷേ അല്ലെന്നും അതു പോപ്പുലറാക്കി കാണിക്കുമെന്നും അദ്ദേഹം മാധ്യമങ്ങളോടു പറഞ്ഞു.
ശ്രീകുമാരന് തമ്പിയുടെ ഗാനം നിരാകരിച്ചെന്നും അദ്ദേഹത്തിന്റെ ഗാനത്തില് ക്ലീഷേ പ്രയോഗങ്ങള് ഉണ്ടായിരുന്നെന്നും സച്ചിദാനന്ദന് പറഞ്ഞതിനു പിന്നാലെയാണു പ്രതികരണം. ഈ വിഷയത്തില് സര്ക്കാരുമായി ചര്ച്ചയ്ക്കില്ലെന്നും സാഹിത്യ അക്കാദമിയുമായി ഇനി സഹകരിക്കില്ലെന്നും അദ്ദേഹം അറിയിച്ചു. പാട്ട് നിരാകരിച്ച കാര്യം അക്കാദമി അറിയിച്ചിട്ടില്ല.
പാട്ട് എഴുതിനല്കിയ ശേഷം രണ്ടാമതും അത് മാറ്റിയെഴുതി. അതു നന്നായെന്നാണ് സെക്രട്ടറി അബൂബക്കര് അറിയിച്ചത്. എന്നാല് സച്ചിദാനന്ദന് തന്നെ പരസ്യമായി അപമാനിച്ചു. അയാള് പ്രതികാരം തീര്ക്കുകയാണ്. സ്വന്തം പേരിന്റെ അര്ഥംപോലും അറിയാത്ത ആളാണു സച്ചിദാനന്ദന്. സ്വയംപ്രഖ്യാപിത അന്തര് ദേശീയ കവിയാണ് സച്ചിദാനന്ദനെന്നും ശ്രീകുമാരന് തമ്പി പറഞ്ഞു. താന് എഴുതിനല്കിയ പാട്ട് ക്ലീഷേ അല്ല.
അപമാനിക്കാന് അബൂബക്കര് കൂട്ടുനിന്നു. താന് മൂവായിരത്തോളം പാട്ടെഴുതിയിട്ടുണ്ട്. ക്ലീഷേ എഴുതുന്നയാള്ക്ക് ഇതു സാധ്യമാകുമോ? പാട്ട് മോശമാണെങ്കില് കത്തെഴുതി അറിയിക്കാനുള്ള ചങ്കൂറ്റം കാണിക്കണമായിരുന്നു. ജനങ്ങള് തന്റെ കൂടെയാണ്.
ഒരു ചര്ച്ചയ്ക്കും ഇനി നിന്നുകൊടുക്കില്ല. ഈ പാട്ട് പോപ്പുലറാക്കി കാണിക്കും. സച്ചിദാനന്ദന്റെ വിചാരം സി.പി.എം. അയാളുടെ കുടുംബവകയാണ് എന്നാണ്. സാഹിത്യ അക്കാദമിയുടെ ഒരവാര്ഡും സ്വീകരിക്കില്ല. സച്ചിദാനന്ദന് ഭീരുവാണെന്നും ശ്രീകുമാരന് തമ്പി ആരോപിച്ചു. എന്നാല് മറ്റൊരു പാട്ടെഴുതിയ ഹരിനാരായണന് നല്ല എഴുത്തുകാരനാണെന്നും അദ്ദേഹം കൂട്ടിച്ചേര്ത്തു.
