ചെറുതാണെങ്കിലും ലോകത്തിലെ ഏറ്റവും അപകടകാരികളായ ജീവികളാണ് കൊതുകകള്‍. കാരണം നിരവധി രോഗാണുക്കളെ ശരീരത്തില്‍ വഹിക്കാനും അവയെ മനുഷ്യശരീരത്തിലേക്ക് കയറ്റി വിട്ട് ഒരു മഹാമാരിക്ക് തന്നെ തുടക്കം കുറിക്കാനും കൊതുകുകള്‍ക്ക് കഴിയും. ഇവ പരുത്തുന്ന രോഗങ്ങളില്‍ ഏറ്റവും അപകടം മലേറിയയാണ്. ഈ അസുഖം ബാധിച്ച് നിരവധി ആളുകളാണ് മരണപ്പെട്ടിട്ടുള്ളത്. ഇവയെക്കൂടാതെ മലമ്പനി, ഡെംഗിപ്പനി, ചിക്കുന്‍ഗുനിയ, മഞ്ഞപ്പനി, ജപ്പാന്‍ ജ്വരം, വെസ്റ്റ് നൈല്‍ ഫീവര്‍, മന്ത് എന്നീ രോഗങ്ങള്‍ പരത്തുന്നതും കൊതുകുകളാണ്. ഇവ രോഗകാരികളാണ് എന്നത് കൊണ്ടാണ് മഴക്കാലം ശക്തമാകും മുമ്പ് തന്നെ മഴക്കാലപൂര്‍വ്വ ശുചീരണ യജ്ഞത്തിന് സര്‍ക്കാര്‍ പ്രത്യേക ശ്രദ്ധ ചെലുത്തുന്നത്. അതേസമയം കഴിഞ്ഞ ദിവസം സാമൂഹിക മാധ്യമങ്ങളില്‍ പ്രചരിച്ച ഒരു വീഡിയോ ഇന്ത്യയില്‍ വലിയൊരു മഹാമാരിക്ക് കോപ്പുകൂട്ടുകയാണോ എന്ന സംശയം പലരിലും ഉയര്‍ത്തിയിരിക്കുകയാണ്. ഇത് സൂചിപ്പിക്കുന്ന ഒരു വീഡിയോയാണ് ഇത്.
@Rakesh Nayak എന്ന എക്‌സ് അക്കൗണ്ടാണ് വീഡിയോ പങ്കുവച്ചിരിക്കുന്നത്. 'ഇന്ത്യയിലെ പൂനെയിലെ മുത്ത നദിയില്‍ കൊതുക് ചുഴലിക്കൊടുങ്കാറ്റ് കണ്ടെത്തി' എന്ന കുറിപ്പോടുകൂടിയാണ് വീഡിയോ പങ്കുവച്ചിരിക്കുന്നത്. വീഡിയോ ഇതിനോടകം നിരവധി ആളുകളുടെ ശ്രദ്ധനേടി. @PMCPune യ്ക്ക് നന്ദി, പൂനെയിലെ കേശവ് നഗര്‍ നിവാസികള്‍ക്ക് അവരുടെ സമയബന്ധിതമായ മുനിസിപ്പാലിറ്റി നികുതി അടയ്ക്കുന്നതിന് പകരമായി കൊതുകുകളുടെ വാലന്റൈന്‍ സമ്മാനം നല്‍കിയതിന്.' പിന്നാലെ മുണ്ഡ്വ, കേശവ്നഗര്‍, ഖരാഡി പ്രദേശങ്ങളില്‍ നിന്നുള്ള സമാനമായ നിരവധി വീഡിയോകള്‍ സാമൂഹിക മാധ്യമങ്ങളില്‍ പങ്കുവയ്ക്കപ്പെട്ടു. പലതും പൂനെ നഗരസഭയ്‌ക്കെതിരെയുള്ള രൂക്ഷമായ വിമര്‍ശനമായിരുന്നു.
പങ്കുവയ്ക്കപ്പെട്ട വീഡിയോയില്‍ ആകാശത്തോളം ഉയര്‍ന്നു പറക്കുന്ന ലക്ഷക്കണക്കിന് കൊതുകുകളുടെ നിരവധി വലിയ കൂട്ടങ്ങള്‍ കാണാം. വെട്ടുകിളികളെ പോലെ അവ ആകാശത്തിലേക്ക് പറന്നുയരുന്നു, പശ്ചാത്തലത്തില്‍ നിരവധി ബഹുനില ഫ്‌ലാറ്റ് സമുച്ചയങ്ങള്‍ കാണാം. ഈ ഫ്‌ലാറ്റുകളുടെയും ഉയരത്തിലാണ് കൊതുകുകളുടെ വലിയ കൂട്ടങ്ങള്‍ പറക്കുന്നത്. ആദ്യ കാഴ്ചയില്‍ അവ വെട്ടുക്കിളികളാണ് എന്ന തോന്നലുണ്ടാക്കുന്നു. എന്നാല്‍ കൊതുക് ശല്യം കാരണം പ്രദേശവാസികള്‍ നിരവധി പ്രശ്‌നങ്ങള്‍ നേരിടുന്നെന്ന് റിപ്പോര്‍ട്ടുകള്‍ പറയുന്നു. ഫ്‌ലാറ്റുകളുടെ ബാല്‍ക്കെണികള്‍ പോലും തുറക്കാന്‍ പറ്റുന്നില്ലെന്നും പാര്‍ക്കുകളിലോ പൊതുസ്ഥലങ്ങളിലോ ഇരിക്കാന്‍ പോലും പറ്റുന്നില്ലെന്നും ജനങ്ങള്‍ പരാതിപ്പെടുന്നു. പലതവണ പരാതിപ്പെട്ടിട്ടും അധികൃതര്‍ നടപടി സ്വീകരിക്കുന്നില്ലെന്ന് സാമൂഹിക മാധ്യമ ഉപയോക്താക്കള്‍ പരാതിപ്പെടുന്നു.
ഖരാഡിയിലെ മുല-മുത നദിയിലെ ജലനിരപ്പ് വര്‍ധിച്ചതാണ് ഇത്രയേറെ കൊതുകുകള്‍ പെറ്റുപെരുകാന്‍ കാരണമെന്ന് സാമൂഹിക ഉപയോക്താക്കള്‍ പറയുന്നു. എന്നാല്‍ നദികളിലെ മാലിന്യം നീക്കം ചെയ്ത് ഒഴുക്ക് വര്‍ദ്ധിപ്പിക്കുന്നതിന് നഗരസഭ കാര്യമായെന്നും ചെയ്യുന്നില്ലെന്നും പരാതികളുയരുന്നു. മധ്യ അമേരിക്കയിലും റഷ്യയിലും നേരത്തെ ഇത്തരം കൊതുക് ചുഴലിക്കാറ്റുകള്‍ രേഖപ്പെടുത്തപ്പെട്ടിട്ടുണ്ട്. എത്രയും പെട്ടെന്ന് ഇവയെ നിര്‍മാര്‍ജ്ജം ചെയ്തില്ലെങ്കില്‍ വലിയൊരു മഹാമാരിക്ക് നമ്മള്‍ വീണ്ടും സാക്ഷ്യം വഹിച്ചേക്കാം.
Comments