തിരക്ക് പിടിച്ച ജീവിതത്തിനിടയില് ഇടവേളകള് ആവശ്യമാണ്. അതിനുള്ള ഏറ്റവും നല്ല മാര്ഗം മനോഹരമായ യാത്രകള് തന്നെയാണ്. അധികം ബഹളങ്ങളോ ആരുടെയും ശല്യമോ നിരന്തരമായ കോളുകളോ ഇല്ലാത്ത ഏതെങ്കിലും സ്ഥലങ്ങളില് ചെന്ന് ചെലവഴിക്കണം എന്നാണ് പലരും ഈ യാത്രകളിലൂടെ ഉദ്ദേശിക്കുന്നത്. എന്നാല് ഇത്രയ്ക്കും ശാന്തമായ സ്ഥലങ്ങള് ഈ ലോകത്ത് ഉണ്ടാകുമോ എന്നാണ് ഇപ്പോള് പലരും ചിന്തിക്കുന്നത്. എന്നാല് യുകെയില് അങ്ങനെയൊരു ദ്വീപ് ഉണ്ടത്രേ.
യുകെയിലെ ഹെം ദ്വീപാണ് ഇത്തരത്തില് വളരെ ശാന്തസുന്ദരമായ ദിനങ്ങള് ടൂറിസ്റ്റുകള്ക്കായി വാഗ്ദാനം ചെയ്യുന്നത്. എന്താണ് ഈ ദ്വീപിനെ വ്യത്യസ്തമാക്കുന്നത് എന്നോ? ഇവിടെ കാറുകളില്ല, ആളുകളുടെ വലിയ ബഹളങ്ങളില്ല എന്നതെല്ലാമാണ് ഇതിനെ തികച്ചും സമാധാനപൂര്ണമായ ഒരു ദ്വീപാക്കി മാറ്റുന്നത്. കുടുംബത്തിന്റെ കൂടെയോ സുഹൃത്തുക്കളുടെ കൂടെയോ തനിച്ചോ ഒക്കെ ഈ ദ്വീപില് സമയം ചെലവഴിക്കാമത്രേ
ഇംഗ്ലീഷ് ചാനലിലെ ഗുര്ന്സിയിലെ ബെയ്ലിവിക്കിലാണ് ഹെം ദ്വീപ് സ്ഥിതി ചെയ്യുന്നത്. ഈ ദ്വീപിലേക്ക് കാറുകള്ക്കൊന്നും തന്നെ പോകാനാവില്ല. അതുപോലെ ടിവിയോ, ഫോണോ, എന്തിന് ക്ലോക്കോ പോലും ഇല്ലാത്ത ഒരു ഹോട്ടലാണ് ഈ ?ദ്വീപില് ഉള്ളത്. അതുപോലെ, 1.35 മൈല് നീളം വരുന്ന ഈ ദ്വീപില് അവധിക്കാല കോട്ടേജുകളും ക്യാമ്പിംഗ് സ്ഥലങ്ങളുമുണ്ട്. ഗ്വെര്ന്സിയില് നിന്ന് ബോട്ട് മാര്ഗമാണ് ഇവിടെ എത്തിച്ചേരാന് സാധിക്കുക. 15 മിനിറ്റ് യാത്രയാണ് ഇവിടെ നിന്നും ദ്വീപിലേക്ക്. അല്ലെങ്കില് ലണ്ടന് ഗാറ്റ്വിക്കില് നിന്ന് ഫ്ലൈറ്റ് ബുക്ക് ചെയ്യണം. 90 മിനിറ്റ് വേണ്ടി വരും ആ യാത്രയ്ക്ക്.
വെറും 65 ആളുകളാണ് ഇവിടെ താമസക്കാരായിട്ടുള്ളത്. ഫോണും ക്ലോക്കും ഒന്നുമില്ലാത്ത ഹോട്ടലിനെ കൂടാതെ രണ്ട് പബ്ബുകള്, ഒരു ഫയര് സ്റ്റേഷന്, ഒരു പൊലീസ് സ്റ്റേഷന്, ഒരു സ്കൂള് എന്നിവയാണ് ഇവിടെ ഉള്ളത്. സ്കൂളിലാകെ നാല് കുട്ടികള് മാത്രമാണ് ഉള്ളത്. ഏതായാലും ദ്വീപിനെ കുറിച്ച് അറിഞ്ഞതോടെ അവധിക്കാലം ആഘോഷിക്കാനായി നിരവധി ആളുകളാണ് ഇങ്ങോട്ടേക്ക് എത്തിച്ചേരുന്നത്.
