കൊല്ലം : ലോക്സഭാ തെരഞ്ഞെടുപ്പിന്റെ കാഹളം മുഴങ്ങുംമുമ്പേ പതിവുപോലെ സീറ്റ് മോഹവുമായി ഐ.എന്.ടി.യു.സി. സംഘടനയ്ക്കു സീറ്റ് നിഷേധിക്കുന്നതില് ഐ.എന്.ടി.യു.സിയില് ശക്തമായ പ്രതിഷേധമുണ്ടെന്നു കഴിഞ്ഞയാഴ്ച സംസ്ഥാന പ്രസിഡന്റ് ആര്. ചന്ദ്രശേഖരന് കണ്ണൂരില് പറഞ്ഞിരുന്നു. പിന്നാലെ കൊല്ലത്ത് അതിന്റെ അലയൊലിയുമുണ്ടായി. ഇപ്പോള് കൊല്ലം സീറ്റില് കണ്ണുവച്ചാണ് അദ്ദേഹത്തിന്റെ രംഗപ്രവേശം.
കഴിഞ്ഞ രണ്ടു ലോക്സഭാ തെരഞ്ഞെടുപ്പുകളിലും ഐ.എന്.ടി.യു.സി. സീറ്റ് ആവശ്യപ്പെട്ടിരുന്നു. എന്നാല് കോണ്ഗ്രസ് നിരസിച്ചു. ഏറ്റവും വലിയ തൊഴിലാളി സംഘടനയാണെന്നും വോട്ട് മറിക്കുമെന്നും ഐ.എന്.ടി.യു.സി. വിരട്ടിനോക്കിയെങ്കിലും കോണ്ഗ്രസ് കുലുങ്ങിയില്ല. ഐ.എന്.ടി.യു.സി. എന്നാല് ആര്. ചന്ദ്രശേഖരനാണെന്നും അദ്ദേഹത്തിന് ഇത്തവണയെങ്കിലും സീറ്റ് നല്കണമെന്നും കൊല്ലത്തെ ഒരുകൂട്ടം നേതാക്കളും ചില അണികളും ഒളിഞ്ഞും തെളിഞ്ഞും ആവശ്യപ്പെടുന്നുണ്ട്. കൊല്ലം സീറ്റ് ഇത്തവണ ആര്.എസ്.പിക്കു നല്കരുതെന്ന് ആര്. ചന്ദ്രശേഖരന്കൂടി പറഞ്ഞതോടെ രംഗം ചൂടുപിടിച്ചു.
തെരഞ്ഞെടുപ്പില് ഐ.എന്.ടി.യു.സിക്കു പ്രാതിനിധ്യം നല്കണമെന്നത് ഒരു വ്യക്തിയുടെ മാത്രം ആവശ്യമല്ലെന്നും കോണ്ഗ്രസ് പാര്ട്ടിയോടു ചേര്ന്നുനില്ക്കുന്ന തൊഴിലാളിവിഭാഗത്തിന്റെ ഏകകണ്ഠമായ അഭിപ്രായമാണെന്നും ചന്ദ്രശേഖരന് പറയുന്നു. എന്നാല്, കൊല്ലം സീറ്റ് ആര്.എസ്.പിക്കു നല്കരുതെന്നു പറഞ്ഞ അദ്ദേഹം സര്ക്കസ് കൂടാരത്തിലെ കോമാളിയാണെന്നും അധികാരദല്ലാളായി പ്രവര്ത്തിക്കുന്നവര്ക്കു മറുപടിയില്ലെന്നും ആര്.എസ്.പി. സംസ്ഥാന സെക്രട്ടറി ഷിബു ബേബി ജോണ് കഴിഞ്ഞദിവസം തുറന്നടിച്ചു.
ഇതോടെ ഐ.എന്.ടി.യു.സി. ആകെ കലിപ്പിലായി. ഐ.എന്.ടി.യു.സി. വഴിയില് കെട്ടിയ ചെണ്ടയല്ലെന്ന് സംഘടനാനേതൃത്വം തിരിച്ചടിച്ചു. ഇത് കോണ്ഗ്രസിന്റെ ആഭ്യന്തര കാര്യമാണെന്നും നടത്തിയ പ്രസ്താവനയില് തെറ്റു പറ്റിയിട്ടുണ്ടെങ്കില് ഐ.എന്.ടി.യു.സിയെ ശാസിക്കാനും തിരുത്താനും പാര്ട്ടിനേതൃത്വത്തിന് അധികാരമുണ്ടെന്നും അന്യന്റെ സഹായമില്ലാതെ നിവര്ന്നുനില്ക്കാന് കെല്പ്പില്ലാത്ത സംഘടനകള് ഐ.എന്.ടി.യു.സിയെ വിമര്ശിക്കാന് വരരുതെന്നും ഷിബു ബേബി ജോണിന് അവര് താക്കീതും നല്കി. കോമാളി പ്രയോഗം പിന്വലിക്കണമെന്നും ഐ.എന്.ടി.യു.സി. ആവശ്യപ്പെട്ടിട്ടുണ്ട്.
അതേസമയം, വിജയസാധ്യത 100 ശതമാനമുള്ള ആര്.എസ്.പിയിലെ എന്.കെ. പ്രേമചന്ദ്രനെ ഒഴിവാക്കിയുള്ള ഒരു നീക്കവും കൊല്ലത്ത് കോണ്ഗ്രസും യു.ഡി.എഫും ആഗ്രഹിക്കുന്നില്ല. ഏതായാലും സമ്മര്ദതന്ത്രം ശക്തമാക്കാനാണ് ഐ.എന്.ടി.യു.സിയുടെ തീരുമാനം. കൊല്ലം കിട്ടിയില്ലെങ്കില് ആലപ്പുഴയും കോട്ടയവുമാണു നോട്ടം. ആലപ്പുഴയില് കെ.സി. വേണുഗോപാല് മത്സരിച്ചില്ലെങ്കില് ഉറപ്പായും സീറ്റ് നല്കണമെന്ന ആവശ്യം ശക്തമാക്കാനാണു തീരുമാനം.
