തെറ്റായ പരസ്യവുമായി ബന്ധപ്പെട്ട കേസ് പരിഗണിക്കുന്നതിനിടെ പതഞ്ജലി മരുന്നുകളുടെ പരസ്യം തടഞ്ഞ് സുപ്രീം കോടതി. കേസില് അടുത്ത ഉത്തരവ് വരുന്നതുവരെ പതഞ്ജലിയുടെ മരുന്നുകളുടെ പരസ്യം സംപ്രേഷണം ചെയ്യരുതെന്നാണ് സുപ്രീം കോടതിയുടെ ഉത്തരവ്.
പതഞ്ജലി കമ്പനിക്കും എംഡി ആചാര്യ ബാല് കൃഷ്ണനും കോടതിയലക്ഷ്യത്തിന് കാരണം കാണിക്കല് നോട്ടീസും നല്കി. കോടതി ഉത്തരവിനെതിരായ പരാമര്ശത്തിനാണ് കാരണം കാണിക്കല് നോട്ടീസ്.
കോടതി മുന്നറിയിപ്പ് നല്കിയിട്ടും തെറ്റായ പരസ്യങ്ങള് നല്കുന്നത് തുടര്ന്നുവെന്നും കോടതിയെ വെല്ലുവിളിക്കുകയാണെന്നും സുപ്രീം കോടതി വിമര്ശിച്ചു. കോടതി ഇത്തരം പരസ്യങ്ങൾ നിയന്ത്രിക്കാൻ ഇടപെടും. തെറ്റായ പരസ്യത്തില് പതഞ്ജലിക്കെതിരെ രണ്ട് വർഷമായി കേന്ദ്രം ഒരു നടപടിയും എടുക്കുന്നില്ല. അധിക പണം പതഞ്ജലിയുടെ പക്കലുണ്ടെന്ന് അറിയാമെന്നും സുപ്രീം കോടതി വ്യക്തമാക്കി. കോടതി ബാബാ രാംദേവിനെ കക്ഷിയാക്കണമെന്ന് നിര്ദേശിച്ചപ്പോള് രാംദേവ് സന്ന്യാസിയെന്ന് അഭിഭാഷകൻ പറഞ്ഞു.
