ചില പ്രായമുള്ള ആളുകളെ കാണുമ്പാള് പ്രായം റിവേഴ്സ് ഗിയറിലാണോ എന്ന് നാം ചോദിക്കാറുണ്ട്. കാരണം എത്ര പ്രായം കൂടിയാലും ഇരുപതുകാരന്റെ ചുറുചുക്കോടെയായിരിക്കും ഇത്തരം ആളുകള് നടക്കുന്നത്. ഒറ്റ നോട്ടത്തിലും ഇവരുടെ പ്രായം ഇരുപതുകളിലേക മുപ്പതുകളിലോ ആണന്നേ തോന്നുകയുള്ളു. ഇത്തരത്തില് ഒരാളാണ് ഇപ്പോള് സമൂഹ മാധ്യമങ്ങളില് നിറയുന്നത്. പറഞ്ഞുവരുന്നത് ചൈനയിലെ സൌ ഹെപ്പിംഗ് എന്ന 70 കാരനെ കുറിച്ചാണ്. കണ്ടാലോ ചെറുപ്രായവും.
സൌ ഹെപ്പിംഗ് എങ്ങനെയാണ് തന്റെ ഫിറ്റ്നസും യുവത്വവും മെയിന്റെയ്ന് ചെയ്യുന്നത് എന്ന് പലരും ചോദിക്കാറുണ്ട്. എന്നാല് അതിനുള്ള ഉത്തരം തെക്ക് പടിഞ്ഞാറന് ചൈനയിലെ ചോങ് കിംഗ് നഗരത്തിലെ അദ്ദേഹത്തിന്റെ വീടിന് സമീപത്തെ 678 മീറ്റര്(2,224അടി) ഉയരമുള്ള ഗെലെ പര്വതമാണ്. ഈ ഗെലെ പര്വ്വതമാണ് സൌവിന്റെ ഫിറ്റ്നസ് രഹസ്യം. ഇനി അദ്ദേഹം എന്നു രാവിലെ എന്താണ് ചെയ്യുന്നതെന്നോ? എഴുന്നേറ്റ ഉടന് ഏതൊരു ചെറുപ്പക്കാരനെക്കാളും വേഗതയില് ആ ചെറുതല്ലാത്ത പര്വ്വതം കയറി ഇറങ്ങും. ചിലപ്പോള് ഇരുകാലില് മറ്റ് ചിലപ്പോള് കൈകളിലും കാലുകളിലും ഇഴഞ്ഞ്. ദിവസവുമുള്ള ഈ വര്ക്കൗട്ടാണ് ഇദ്ദേഹത്തിന്റെ ഫിറ്റ്നസ് രഹസ്യം.
എല്ലാ ദിവസും പ്രഭാതത്തില് ഫിറ്റ്നസ് പ്രേമികള് ഒത്ത് ചേരുന്ന ഇടമാണ് ഗെലെ പര്വ്വതം. പിന്നെ നിരന്തരം വര്ക്കൌട്ടാണ്. അതിനായി പര്വ്വതത്തില് ഫിറ്റ്നസ് ഉപകരണങ്ങളും പാര്ക്കുകളും ഹെക്കിംഗ് ട്രയലുകളും ഒരുക്കിയിട്ടുണ്ട്. വെയ്റ്റഡ് പുള്-അപ്പുകള്, റോപ്പ് അല്ലെങ്കില് പോള് ക്ലൈംബിംഗ്, ഹാന്ഡ്സ്റ്റാന്ഡുകള്, ഇതൊന്നും കൂടാതെ തന്റെ ഏറ്റവും പ്രധാനപ്പെട്ട ഇനം പര്വതത്തിന്റെ സ്കെയിലിംഗ് ആണെന്ന് സൌ പറയുന്നു. അതായത് 2,500 ലേറെ പടികളുണ്ട് പര്വ്വതത്തിന് മുകളിലേക്ക്. ഇത്രയും പടികള് അദ്ദേഹം വെറും 50 മിനിറ്റില് കയറുകയും ഇറങ്ങുകയും ചെയ്യും.
ഈ പടികള് കയറി ഇറങ്ങാന് സൌവിന് സ്വന്തമായി ചില ടെക്നിക്കുകളുണ്ട്. മലയിലേക്കുള്ള പടികളിലൂടെ തവള ചാടുന്നത് പോലെയാണ് സൌ കയറിപ്പോവുക. ഇനി മലയില് നിന്നും ഇറങ്ങുമ്പോള് മുതല നടക്കുന്നത് പോലെ നാല് കാലില് ഇഴഞ്ഞ് നീങ്ങും. അതും 50 മിനിറ്റിനുള്ളില്. കേള്ക്കുമ്പോള് തന്നെ നിങ്ങള്ക്ക് കിതപ്പ് വരുന്നുണ്ടോ? എങ്കില് സൌ ഹെപ്പിംഗിന്റെ വയസിനെ കുറിച്ച് ഒന്ന് ഓര്ത്താല് മതി. 'ഇഴയുന്നത് കാല്മുട്ടുകളെ ഉപദ്രവിക്കുന്നില്ല, അത് അവയവങ്ങളുടെ ഏകോപനത്തെ പരിശീലിപ്പിക്കുന്നു,' അദ്ദേഹം വളരെ ശാന്തനായി പറയുന്നു. പല യുവാക്കളും തന്റെ ടെക്നിക്കുകള് ശ്രമിച്ചെങ്കിലും പരാജയപ്പെട്ടെന്നും സൌ കൂട്ടിചേര്ക്കുന്നു.
1979 ല് ഒരു പുസ്തകം വായിച്ചപ്പോഴാണ് തനിക്ക് ഓട്ടത്തിന്റെ പ്രാധാന്യം മനസിലായതെന്ന് അദ്ദേഹം പറയുന്നു. അന്ന് മുതലുള്ള പ്രാക്ടീസാണ്. ആദ്യമൊക്കെ മലയിലേക്ക് ഓടിക്കയറും. പിന്നീടാണ് മല കയറാനും ഇറങ്ങാനും പുതിയ രീതികള് അദ്ദേഹം വികസിപ്പിച്ചത്. രാവിലെ 5:30 ന് സൌ ഉണരും. പിന്നെ വ്യായാമമാണ്. മഴയ്ക്കോ വെയിലിനോ മഞ്ഞിനോ സൌവിനെ തടയാന് കഴിയില്ല. 70 വയസായിട്ടും അദ്ദേഹത്തിന്റെ മുടിയൊന്നും നരച്ചിട്ടില്ല. ഇന്നും ശക്തമായ സിക്സ് പാക്കുണ്ട്. തന്റെ ആരോഗ്യ രഹസ്യവും അത് തന്നെയാണെന്ന് സൌ പറയുന്നു. ''ഓട്ടത്തിലാണ് ജീവിതം, ഏറ്റവും പ്രധാനപ്പെട്ട കാര്യം വ്യായാമം ചെയ്യുക, നിങ്ങളുടെ ശാരീരികക്ഷമത നിലനിര്ത്തുക, നല്ല ജീവിതശൈലി വികസിപ്പിക്കുക എന്നിവയാണ്.'' അദ്ദേഹം പറയുന്നു.
