പാലക്കാട്: മലമ്പുഴ ഡാമിന്റെ വൃഷ്ടിപ്രദേശത്ത് വെള്ളം കുടിക്കാനിറങ്ങി ചതുപ്പിലകപ്പെട്ട കൂട്ടിക്കൊമ്പനെ വനംവകുപ്പ് രക്ഷപ്പെടുത്തി. ഇന്നലെ രാവിലെ എട്ടു മണിയോടെയാണ് മൂന്നു വയസ് തോന്നിക്കുന്ന ആനക്കുട്ടിയെ ചെളിയില് പുതഞ്ഞ നിലയില് തോട്ടംതൊഴിലാളികള് കണ്ടത്.
ആനക്കൂട്ടത്തിനൊപ്പം വെള്ളം കുടിക്കാനിറങ്ങിയ കുട്ടിക്കൊമ്പന് ചെളിയില് അകപ്പെടുകയായിരുന്നു. തോട്ടം തൊഴിലാളികള് വിവരമറിയിച്ചതിനെ ത്തുടര്ന്ന് വനംവകുപ്പ് ജീവനക്കാര് സ്ഥലത്തെത്തി. ഇവര് ഓലമടല്കൊണ്ടു വഴിയൊരുക്കിയാണ് കുട്ടിയാനയെ രക്ഷപ്പെടുത്തിയത്.
വനംവകുപ്പ് സംഘം എത്തുമ്പോള് കുട്ടിക്കൊമ്പന്റെ വരവുംകാത്ത് കരയില് കാട്ടാനക്കൂട്ടവും നിലയുറപ്പിച്ചിരുന്നു. ഒരു മണിക്കൂറോളം നീണ്ട പരിശ്രമത്തിനൊടുവില് രക്ഷപ്പെട്ട കുട്ടിക്കൊമ്പന് പിന്നീട് കാട്ടാനക്കൂട്ടത്തിനൊപ്പം ചേര്ന്നു.
ചൂട് കനത്തതിനാല് മലമ്പുഴ ഡാമിന്റെ വൃഷ്ടിപ്രദേശത്ത് കാട്ടാനക്കൂട്ടം പതിവായി തമ്പടിക്കുന്നുണ്ട്. രാവിലെയും വൈകിട്ടും ഡാമിലിറങ്ങി വെള്ളം കുടിക്കും. ഈ സാഹചര്യം കണക്കിലെടുത്ത് 24 മണിക്കൂറും നീരിക്ഷിക്കാന് വനംവകുപ്പ് ദൗത്യസംഘത്തെ ചുമതലപ്പെടുത്തിയിട്ടുണ്ടെന്ന് പാലക്കാട് ഡി.എഫ്.ഒ. അറിയിച്ചു.
