ബംഗളുരു: കര്ണാടകയില് കുഴല്ക്കിണറില് വീണ രണ്ടു വയസുകാരനെ രക്ഷിച്ചു. ഇരുപതുമണിക്കൂറിലധികം നീണ്ട ദൗത്യത്തിനൊടുവിലാണ് കുഞ്ഞിനെ പുറത്തെടുത്തത്. വിജയപുരയിലെ ഗ്രാമത്തിലാണു പുതുതായി കുഴിച്ച കുഴല്ക്കിണറില് കുഞ്ഞ് വീണത്.
കഴിഞ്ഞ രണ്ടിനാണ് ഇവിടെ കുഴല്ക്കിണര് കുത്തിയത്. വെള്ളം ലഭിക്കാത്തതിനെത്തുടര്ന്ന് കുഴിക്കല് നിര്ത്തിയെങ്കിലും കിണര് മൂടിയിരുന്നില്ല. ഇതിലേക്കാണ് ബുധനാഴ്ച കളിക്കുന്നതിനിടെ അബദ്ധത്തില് കുഞ്ഞ് വീണത്. സംഭവദിവസം വൈകിട്ട് ആറരയോടെ രക്ഷാദൗത്യം ആരംഭിച്ചിരുന്നു.
സംസ്ഥാന, ദേശീയ ദുരന്തനിവാരണ സേനകളും പോലീസ്, അഗ്നിരക്ഷാസേന ഉള്പ്പെടെയുള്ളവര് സ്ഥലത്തെത്തി. ഇരുപതടിയോളം താഴ്ചയില് കുടുങ്ങിയ കുഞ്ഞിന് ശുദ്ധവായു ഉറപ്പാക്കാന് പൈപ്പിലൂടെ ഓക്സിജന് എത്തിച്ചു. കുഴല്ക്കിണറിനു സമാന്തരമായി മറ്റൊരു കുഴിയെടുത്തായിരുന്നു രക്ഷാദൗത്യം. എന്നാല്, പാറക്കല്ലുകള് നിറഞ്ഞ ഭൂപ്രകൃതി വെല്ലുവിളിയായി.
ഒടുവില് ഇന്നലെ ഉച്ചകഴിഞ്ഞ് കുഞ്ഞിനെ ജീവനോടെ സുരക്ഷിതമായി പുറത്തെത്തിച്ചു. ഉടന്തന്നെ ആശുപത്രിയിലേക്കു മാറ്റിയ രണ്ടുവയസുകാരന്റെ നില തൃപ്തികരമാണെന്നാണു റിപ്പോര്ട്ട്.
