പ്രേതം എന്ന് കേള്ക്കുമ്പോള് തന്നെ എല്ലാവര്ക്കും പേടിയാണ്. എന്നാല് സിനികളിലൂടെയും കഥകളിലൂടെയും അല്ലാതെ പ്രേതങ്ങളെ ഇതുവരെ ആരും നേരില് കണ്ടിട്ടില്ല. മാത്രമല്ല പ്രേതമുണ്ട് എന്നതിന് ഒരു തെളിവും ഇന്നുവരെ ഉണ്ടായിട്ടുമില്ല. അവയുടെ അസ്വസ്ഥിതം കണ്ടെത്താന് കഴിയാത്തതുകൊണ്ട് തന്നെ പ്രേതമുണ്ടോ എന്ന ചോദ്യം തന്നെ യുക്തിയില്ലാത്തതാണ്. എങ്കിലും പ്രേതമുണ്ട് എന്ന് സ്ഥാപിച്ചുകൊണ്ട് പലരും തങ്ങളുടെ അനുഭവങ്ങള് പങ്കുവയ്ക്കാറുണ്ട്. അതുപോലെ അര്ജന്റീനയില് നിന്നുള്ള ഒരു യുവതി പങ്കുവച്ച വീഡിയോയാണ് ഇപ്പോള് ടിക് ടോക്കില് വ്യാപകമായി പ്രചരിക്കുന്നത്.
മലേന ലൂണ എന്ന യുവതിയാണ് തന്റെ വിചിത്ര അനുഭവം പങ്കുവച്ചിരിക്കുന്നത്. അവധിക്കാലം ആഘോഷിക്കാനായി പോയതാണ് മലേനയും കൂട്ടുകാരും. ഇവര് താമസിച്ചിരുന്ന ഹോളിഡേ ഹോമില് വച്ചാണ് ഈ അസാധാരണമായ അനുഭവം ഉണ്ടായത്. അവിടെ ചുമരില് ഒരു ചിത്രം തൂക്കിയിട്ടിരുന്നു. ആ ചിത്രം ചുമരില് നിന്നും തന്നെത്താനെ ആടുന്നതായിട്ടാണ് യുവതി പറയുന്നത്. വെറുതെ അനങ്ങുക മാത്രമല്ല, അത് തൂക്കിയിട്ടിരിക്കുന്ന ആണിക്ക് ചുറ്റും നീങ്ങുന്നു എന്നും അവിടെ നിന്നം ആ ആണി വിട്ട് ഇറങ്ങിപ്പോകാന് നോക്കുന്നത് പോലെയാണ് തോന്നുന്നത് എന്നുമാണ് യുവതി പറയുന്നത്.
ടിക് ടോക്കില് പങ്കുവച്ച വീഡിയോയില് പരിഭ്രമിച്ചുകൊണ്ടുള്ള നിലവിളികളും ഒപ്പം തന്നെ ചിരികളും കേള്ക്കാമായിരുന്നു എന്നും റിപ്പോര്ട്ടുകള് പറയുന്നു. എന്നാല് അത് മാത്രമായിരുന്നില്ല ആ മുറിയില് താന് കണ്ട വിചിത്ര കാര്യം എന്നാണ് അവള് പറയുന്നത്. തങ്ങള് താമസിച്ചിരുന്ന മുറിയിലെ അലമാരകള് തനിയെ അടയുകയും തുറക്കുകയും ചെയ്യുന്നുണ്ടായിരുന്നു എന്നും മലേന പറയുന്നു. മൂന്നില് കൂടുതല് തവണ അങ്ങനെ അലമാര അടയുകയും തുറക്കുകയും ചെയ്തുവെന്നാണ് അവള് പറയുന്നത്. മൊത്തത്തില് ആ ഹോളിഡേ ഹോം സംശയം ജനിപ്പിക്കുന്ന തരത്തിലുള്ളതായിരുന്നു എന്നും അവള് പറയുന്നു.
മാത്രമല്ല മലേനയുടെ കൂട്ടുകാരി കാറ്റിക്ക് ആരോ തന്റെ തലമുടിയില് പിടിച്ചുവലിക്കുന്ന അനുഭവം ഉണ്ടായി എന്നും മലേന പറയുന്നു. ഏതായാലും നിമിഷ നേരങ്ങള്ക്കുള്ളിലാണ് ടിക് ടോക്കില് വീഡിയോ വൈറലായത്. വീഡിയോ കണ്ട് പലരും തങ്ങളും അമ്പരപ്പും ഭയവും പങ്കുവചച്ചു. എന്നാല് മറ്റുചിലര് ഇത് വൈറലാവാന് വേണ്ടി മനഃപൂര്വ്വം കെട്ടിച്ചമച്ച കഥയാണ് എന്നാണ് പറയുന്നത്.
