വർഷങ്ങളോളം നീണ്ട പ്രണയത്തിനൊടുവിലാണ് ബോളിവുഡ് താരം രാകുൽ പ്രീത് സിംഗും നടനും ചലച്ചിത്ര നിർമ്മാതാവുമായ ജാക്കി ഭഗ്നാനിയും വിവാഹിതരായത്. ഗോവയില് വച്ചു നടന്ന ഇവരുടെ മനോഹരമായ വിവാഹച്ചടങ്ങുകള് ആരാധകര് ഏറ്റെടുത്തിരുന്നു. രാവിലെ സിഖ് ആചാരപ്രകാരവും വൈകുന്നേരത്തോടെ സിന്ധി ആചാരപ്രകാരം വിവാഹിതരായിരുന്നു. ഇതിന്റെയൊക്കെ ചിത്രങ്ങളും വീഡിയോകളും സോഷ്യല് മീഡിയയില് ട്രെന്ഡിംഗായതാണ്.
ഇപ്പോഴിതാ രാജ്യതലസ്ഥാനത്തെ പുതിയ പാർലമെന്റ് മന്ദിരം സന്ദർശിക്കുന്ന ചിത്രങ്ങള് പങ്കിട്ടിരിക്കുകയാണ് താരദമ്പതിമാര്. സോഷ്യല് മീഡിയയിലൂടെയാണ് ഇവര് ചിത്രങ്ങള് പങ്കിട്ടത്. അവിസ്മരണിയ നിമിഷം എന്ന ക്യാപ്ഷന് നല്കിയാണ് ഇവര് ഇൻസ്റ്റഗ്രാമില് ചിത്രങ്ങള് പങ്കുവച്ചത്.
‘‘ഡല്ഹിയിലെ പുതിയ പാർലമെന്റിലെ അവിസ്മരണീയ നിമിഷം. ജനാധിപത്യത്തിന്റെ ചൈതന്യം പ്രവർത്തിക്കുന്നു. സത്യമേവ ജയതേ ജയ് ഹിന്ദ്...’’ എന്നാണ് രാകുല് പ്രീത് ഇൻസ്റ്റഗ്രാമില് കുറിച്ചത്. പരമ്പരാഗത വസ്ത്രങ്ങള് ധരിച്ച് പാർലമെന്റ് മന്ദിരത്തിന്റെ മുന്നില് ഇരുവരും നില്ക്കുന്നതാണ് ചിത്രങ്ങള്.
കഴിഞ്ഞ മാസമാണ് ഇരുവരും വിവാഹിതരായത്. വിദേശത്ത് വലിയ ആഘോഷത്തില് നടത്താനിരുന്ന വിവാഹം ഗോവയിലായിരുന്നു നടന്നത്. പ്രധാനമന്ത്രി നരേന്ദ്രമോദിയുടെ ആഹ്വാനത്തെത്തുടർന്നാണ് ഇവർ വിവാഹം ഇന്ത്യയിലേക്ക് മാറ്റിയത്. വിവാഹാഘോഷ ചടങ്ങുകളുടെ ചിത്രങ്ങള് സോഷ്യല് മീഡിയയില് വലിയ തോതില് ശ്രദ്ധനേടിയിരുന്നു.
കമല്ഹാസൻ-ശങ്കർ കൂട്ടുകെട്ടിലെത്തുന്ന ഇന്ത്യൻ -2 യിലാണ് രാകുല് ഇപ്പോള് അഭിനയിക്കുന്നത്. അക്ഷയ് കുമാറും ടൈഗർ ഷ്റോഫും പ്രധാന കഥാപാത്രങ്ങളാകുന്ന ബഡേ മിയാൻ ഛോട്ടേ മിയാൻ എന്ന ചിത്രമാണ് ജാക്കിയുടേതായി ഒടുവില് പുറത്തിറങ്ങിയ ചിത്രം.
