കണ്ണൂര്: ബിജെപിയിലേക്ക് പോകുന്നത് ഇ.പി. ജയരാജന് ആണെന്നും പാര്ട്ടിക്കുളളില് അദ്ദേഹം അസ്വസ്ഥന് ആണെന്നും ബിജെപി നേതാവ് ശോഭാസുരേന്ദ്രനുമായി അദ്ദേഹം ഗള്ഫില് വെച്ച് ചര്ച്ച നടത്തിയെന്നും കോണ്ഗ്രസ് നേതാവ് കെ. സുധാകരന്റെ ആരോപണം. മദ്ധ്യസ്ഥ ചര്ച്ച നടത്തിയത് ശോഭാസുരേന്ദ്രനും രാജീവ് ചന്ദ്രശേഖരനുമാണെന്നും പാര്ട്ടി സെക്രട്ടറിയാക്കാത്തതില് ജയരാജന് അതൃപ്തിയുണ്ടായിരുന്നു എന്നും പറഞ്ഞു.
കണ്ണൂരിലെ ഒരു ഉന്നത സിപിഎം നേതാവിനെ ബിജെപിയില് ചേര്ക്കാന് ദല്ലാള് നന്ദകുമാര് ബിജെപിയുടെ ദേശീയ ഓഫീസില് കയറി നിരങ്ങിയതായി കഴിഞ്ഞ ദിവസം ബിജെപി നേതാവും ആലപ്പുഴയിലെ സ്ഥാനാര്ത്ഥിയുമായി ശോഭാ സുരേന്ദ്രന് പറഞ്ഞിരുന്നു. എന്നാല് ആ നേതാവ് ആരാണെന്ന് വെളിപ്പെടുത്തിയിരുന്നില്ല. പകരം പിണറായി വിജയനൊപ്പം തലപ്പൊക്കമുള്ള നേതാവ് എന്ന് മാത്രമായിരുന്നു പറഞ്ഞിരുന്നത്. എന്നാല് ഇന്ന് മാധ്യമങ്ങള്ക്ക് മുന്നില് ആ നേതാവ് ഇ.പി. ജയരാജനാണെന്ന് കെ സുധാകരന് ആരോപിച്ചു.
പത്തുലക്ഷം രൂപ വാങ്ങിയെന്ന ദല്ലാള് നന്ദകുമാറിന്റെ ആരോപണത്തിന് മറുപടി പറഞ്ഞപ്പോഴായിരുന്നു പിണറായിക്കൊപ്പം തലപ്പൊക്കമുള്ള കണ്ണൂരിലെ ഒരു ഉന്നത സിപിഎം നേതാവിനെ ബിജെപിയില് ചേര്ക്കാന് ദല്ലാള് നന്ദകുമാര് തങ്ങളുടെ ദേശീയ ഓഫീസില് കയറിനിരങ്ങിയതായി ബിജെപി നേതാവ് ആരോപിച്ചത്. താന് ദല്ലാള് നന്ദകുമാറിന് എട്ട് സെന്റ് സ്ഥലം വില്ക്കുന്നതിന്റെ ഭാഗമായിട്ടാണ് താന് ബാങ്ക് അക്കൗണ്ടിലേക്ക് 10 ലക്ഷം രൂപ വാങ്ങിയതെന്നും പറഞ്ഞു. 10 ലക്ഷം രൂപ എനിക്ക് അഡ്വാന്സായി പൊതിഞ്ഞ പണമായിട്ടാണ് തരുന്നത്. എന്നാല് അത് തന്റെ ബാങ്ക് അക്കൗണ്ടില് തരണമെന്ന് പറഞ്ഞു. ആ സ്ഥലം വില്പ്പനയ്ക്ക് വെച്ച സമയത്താണ് നന്ദകുമാറിനെ കാണുന്നതെന്നും പറഞ്ഞിരുന്നു.
