കൊച്ചി: കോട്ടയം പാറമ്പുഴയില് മൂന്നു പേരെ മൃഗീയമായി കൊലപ്പെടുത്തിയ കേസിലെ പ്രതിയുടെ വധശിക്ഷ ഹൈക്കോടതി റദ്ദാക്കി. കേസിലെ പ്രതി ഫിറോസാബാദ് സ്വദേശി നരേന്ദ്രകുമാറിന്റെ (35) വധശിക്ഷയാണ് ഹൈക്കോടതി റദ്ദാക്കിയത്. വിചാരണക്കോടതി വിധി ചോദ്യം ചെയ്തു സമര്പ്പിച്ച അപ്പീലിലാണ് ഹൈക്കോടതി വിധി പറഞ്ഞത്.
അപൂര്വങ്ങളില് അപൂര്വമായ കേസുകളുടെ ഗണത്തില് വരില്ലെന്നു കണ്ടെത്തിയാണു വധശിക്ഷയില് ഇളവ് അനുവദിച്ചത്. ജസ്റ്റിസ് എ.കെ. ജയശങ്കരന് നമ്പ്യാര്, ജസ്റ്റിസ് വി.എം. ശ്യാംകുമാര് എന്നിവരടങ്ങിയ ഡിവിഷന് ബെഞ്ചാണ് അപ്പീലില് വിധി പറഞ്ഞത്. സാഹചര്യ തെളിവുകളുടെ അടിസ്ഥാത്തില് മാത്രമാണ് പ്രതി കുറ്റക്കാരനാണെന്നു കണ്ടെത്തിയതെന്നു വിലയിരുത്തിയാണ് അപൂര്വങ്ങളില് അപൂര്വമായ കുറ്റകൃത്യമായി കണക്കാക്കാനാവില്ലെന്നു വ്യക്തമാക്കിയത്.
2015 മേയ് 17-ന് കോട്ടയം പാറമ്പുഴ മൂലേപ്പറമ്പില് വീട്ടില് ലാലസന് (60), ആരോഗ്യ വകുപ്പില് ഹെല്ത്ത് ഇന്സ്പെക്ടര് ആയ ഭാര്യ പ്രസന്ന (54), മൂത്ത മകന് പ്രവീണ് ലാല് (28) എന്നിവരെ വീട്ടിനുള്ളില് കൊല്ലപ്പെട്ട നിലയില് കണ്ടെത്തുകയായിരുന്നു.വീടിനോട് അനുവദിച്ചുള്ള ഡ്രൈക്ലീന് സ്ഥാപനത്തില് ജോലി ചെയ്തിരുന്ന പ്രതിക്ക് പ്രവീണ് ലാലിനോടുള്ള വൈരാഗ്യമാണ് മൂവരുടെയും കൊലപാതകത്തില് കലാശിച്ചത്.
തൊഴിലാളിയായിരുന്ന നരേന്ദ്രകുമാര് പ്രവീണിനെയും മാതാപിതാക്കളെയും കൊലപ്പെടുത്തി ഏട്ടര പവന് സ്വര്ണാഭരണവും ഇലക്ട്രോണിക്സ് ഉപകരണങ്ങളും കവര്ച്ച ചെയ്തതായി പോലീസ് കണ്ടെത്തി.കൊല്ലപ്പെട്ട ലാലസന്റെയും പ്രസന്നകുമാരിയുടെയും ഇളയമകനും പ്രവീണിന്റെ സഹോദരനുമായ വിപിന് ലാലിനു മൂന്നുലക്ഷം രൂപ നഷ്ടപരിഹാരമായി പ്രതി നല്കണമെന്നും വിചാരണ കോടതി വിധിച്ചിരുന്നു. മൂന്നുപേരുടെയും കഴുത്തിനു മുകളിലായി 45 മുറിവുകളാണ് ഉണ്ടായിരുന്നു. കുറ്റകൃത്യത്തിനു ശേഷം പ്രതിയെ അവസാനം കണ്ടെന്ന സാക്ഷികളുടെ മൊഴികളുണ്ടെന്നു കോടതി ചൂണ്ടിക്കാട്ടി.കേസില് വിചാരണക്കോടതിയാണ് 20 വര്ഷം കഠിന തടവ് വിധിച്ചിരുന്നത്.
രാജ്യത്തു തൂക്കിക്കൊല നടപ്പാക്കുന്നതു കോടതികള് റദ്ദാക്കുന്നതിനു പിന്നില്, കേന്ദ്രസര്ക്കാരിന്റെ പുതിയ നയവും സുപ്രീം കോടതി വിധികളും. പാറമ്പുഴ കൂട്ടക്കൊലക്കേസ് പ്രതി നരേന്ദ്ര കുമാറിന്റെ വധശിക്ഷ ഹൈക്കോടതി റദ്ദാക്കിയതിനു കാരണവും മറ്റൊന്നല്ല. അംഗരാജ്യങ്ങള് വധശിക്ഷ ഒഴിവാക്കണമെന്ന ഐക്യരാഷ്ട്ര സംഘടനാ (യു.എന്) പ്രമേയത്തിന്റെ അടിസ്ഥാനത്തിലാണ് ഇന്ത്യയുടെയും നയംമാറ്റം. രാജ്യദ്രോഹം പോലുള്ള അത്യപൂര്വകേസുകളില് മാത്രമാകും ഇനി പരമാവധിശിക്ഷ നടപ്പാക്കുക.
രാജ്യത്ത് വധശിക്ഷയ്ക്കു വിധിക്കപ്പെട്ടവരെപ്പറ്റി ഡല്ഹി നാഷണല് ലോ യൂണിവേഴ്സിറ്റിയിലെ പ്രൊജക്ട് 39 എ എന്ന എന്.ജി.ഒ. നല്കുന്ന മെറ്റിഗേഷന് ഇന്വെസ്റ്റിഗേഷന് റിപ്പോര്ട്ട് പരിഗണിച്ചാണു വധശിക്ഷ റദ്ദാക്കുന്നത്. പ്രതികളുടെ സാമൂഹിക, സാമ്പത്തിക പശ്ചാത്തലവും മാനസികനിലയും കുട്ടിക്കാലത്ത് നേരിട്ടിട്ടുള്ള പീഡനവും ഉള്പ്പെടെ അന്വേഷണപരിധിയില് വരും. ഇത്തരം പശ്ചാത്തലങ്ങള് കുറ്റകൃത്യം നടത്താന് പ്രതികളെ പ്രേരിപ്പിച്ചിട്ടുണ്ടോ എന്നതാണ് കണ്ടെത്തേണ്ടത്. ഒപ്പം ജയിലിലായശേഷമുള്ള പ്രതികളുടെ സ്വഭാവമാറ്റങ്ങളും മാനസികനിലയും പരിശോധിക്കും.
പാറമ്പുഴ കൂട്ടക്കൊലക്കേസില് പ്രതി നരേന്ദ്ര കുമാറിന്റെ മെറ്റിഗേഷന് ഇന്വെസ്റ്റിഗേഷന് റിപ്പോര്ട്ട് സമര്പ്പിച്ചതും ഈ എന്.ജി.ഒയാണ്. കയ്പ്പേറിയ ജീവിതസാഹചര്യങ്ങളാണു നരേന്ദ്ര കുമാറിനെ കൊലപാതകിയാക്കിയതെന്നാണു പ്രൊജക്സ് 39 എയ്ക്കു വേണ്ടി നൂറിയ അന്സാരി കേരളാ ഹൈക്കോടതി രജിസ്ട്രാര്ക്കു കൈമാറിയ റിപ്പോര്ട്ടില് പറയുന്നത്. ചെറുപ്പകാലത്തെ ദുരിതവും അസ്വസ്ഥമായ കുടുംബജീവിതവും കടുത്ത ദാരിദ്രവുമാണ് എങ്ങിനെയും പണമുണ്ടാക്കണമെന്ന ചിന്തയിലേക്കു നരേന്ദ്രകുമാറിനെ നയിച്ചതെന്നു റിപ്പോര്ട്ടില് പറയുന്നു.
ഗായകനും ചിത്രകാരനുമാണു പ്രതി. ജയിലിലും മാതൃകാപരമായ പെരുമാറ്റമാണ്. രണ്ടു മാസം വാദം കേട്ടശേഷമാണു വധശിക്ഷ റദ്ദാക്കി ജസ്റ്റിസ് എ.കെ. ജയശങ്കരന് നമ്പ്യാര് അധ്യക്ഷനായ ബെഞ്ച് ഇന്നലെ വിധി പറഞ്ഞതെന്നു പ്രോസിക്യൂഷനുവേണ്ടി ഹാജരായ സീനിയര് ഗവ. പ്ലീഡര് അലക്സ് എം. തോമ്പ്ര പറഞ്ഞു.
വധശിക്ഷ വിധിക്കുന്നതിലെ മാനദണ്ഡങ്ങള് കര്ശനമാക്കണമെന്ന് അടുത്തിടെ സുപ്രീം കോടതി നിര്ദേശിച്ചിരുന്നു. അപൂര്വങ്ങളില് അപൂര്വമായ കേസുകളില് കുറ്റകൃത്യത്തിന്റെ സ്വഭാവവും ക്രൂരതയും അടിസ്ഥാനമാക്കുന്നതിനൊപ്പം പ്രതി സ്വയം നവീകരിക്കാനുള്ള സാധ്യതകൂടി പരിശോധിക്കണമെന്നാണു സുപ്രീം കോടതി വ്യക്തമാക്കിയത്. ഒരിക്കല് നടപ്പാക്കിയാല് പിന്നെ പരിഹരിക്കാനാകാത്തതിനാല് ശ്രദ്ധാപൂര്വമേ വധശിക്ഷ നടപ്പാക്കാവൂ. കുറ്റാരോപിതന്റെ അവകാശങ്ങളും മാനിക്കപ്പെടണം.
ജയില്വാസം കുറ്റവാളിയില് മനഃപരിവര്ത്തനം വരത്തക്കവിധം രൂപകല്പന ചെയ്തതാകണം. അങ്ങനെയെങ്കില് ശിക്ഷാ കാലാവധി കഴിഞ്ഞിറങ്ങുന്ന കുറ്റവാളിക്കു മികച്ച സാമൂഹികജീവിതം നയിക്കാനാകുമെന്നും സുപ്രീംകോടതി അഭിപ്രായപ്പെട്ടിരുന്നു. സംസ്ഥാനത്ത് വധശിക്ഷ ലഭിച്ച മൂന്നു പ്രതികളുടെ മെറ്റിഗേഷന് ഇന്വെസ്റ്റിഗേഷന് നടത്താന് ഹൈക്കോടതി ആവശ്യപ്പെട്ടിട്ടുണ്ട്.
* 2016 ഏപ്രില് 28 പെരുമ്പാവൂര് ജിഷ വധക്കേസ്: പ്രതി അസം സ്വദേശി അമീറുള് ഇസ്ലാം
* 2014 ഏപ്രില് 14 ആറ്റിങ്ങല് ഇരട്ടക്കൊല കേസ്: പ്രതി നിനോ മാത്യു
* 2018 ഏപ്രില് 21 ചേര്ത്തല കെ.എസ്. ദിവാകരന് കൊലക്കേസ്: പ്രതി ആര്. ബൈജു.
