കാസര്കോട് : ബിജെപിയില് പോകുമെന്ന പത്മജ വേണുഗോപാലിന്റെ വിമര്ശനത്തിന് മറുപടിയുമായി രാജ്മോഹന് ഉണ്ണിത്താന്. തന്റെ പിതാവ് കെ. കരുണാകരന് അല്ലെന്നും മരിക്കും വരെ താന് കോണ്ഗ്രസുകാരനായിരിക്കുമെന്നും പറഞ്ഞ അദ്ദേഹം പരസ്യമായ സംവാദത്തിന് പത്മജയെ വെല്ലുവിളിക്കുകയും ചെയ്തു. രാജ്മോഹന് ഉണ്ണിത്താന് ബിജെപിയില് എത്തുമെന്ന പത്മജയുടെ പ്രസ്താവന തള്ളുകയും ചെയ്തു.
പത്മജ തന്നെക്കൊണ്ട് കൂടുതല് പറയിപ്പിക്കരുതെന്നും രാജ്മോഹന് ഉണ്ണിത്താന് തുറന്ന് പറയാന് തുടങ്ങിയാല് 1973 മുതലുള്ള ചരിത്രം വിളിച്ചു പറയുമെന്നും പിന്നെ പത്മജയ്ക്ക് പുറത്തിറങ്ങി നടക്കാനൊക്കില്ലെന്നും പറഞ്ഞു. ആ ചരിത്രമൊക്കെ നന്നായിട്ട് അറിയുന്ന ആളാണ് താനെന്നും പറഞ്ഞു. ലോക്സഭാ തെരഞ്ഞെടുപ്പില് കാസര്ഗോട്ട് താന് ഒരു ലക്ഷം വോട്ടിന് ജയിക്കുമെന്ന് ആത്മവിശ്വാസം പ്രകടിപ്പിച്ച രാജ്മോഹന് ഉണ്ണിത്താന് പയ്യന്നൂരിലും, കല്ല്യാശേരിയിലും വ്യാപകമായി സിപിഎം കള്ള വോട്ട് ചെയ്തെന്നും ബൂത്ത് പിടിച്ചെടുത്തെന്നും പറഞ്ഞു.
മഞ്ചേശ്വരം, കാസറകോട് മണ്ഡലങ്ങളില് സിപിഎം, ബിജെപി വോട്ടുകള് കുറയും. ബിജെപി വോട്ടുകള് കോണ്ഗ്രസിലേക്ക് വരും. പല ബൂത്തിലും ഇരിക്കാന് സിപിഎം ഏജന്റുമാര് ഉണ്ടായിരുന്നില്ല. ജില്ലാ പൊലീസ് മേധാവി രാഷ്ട്രീയം കളിച്ചുവെന്നും ഉടന് എസ് പിയെ മാറ്റാന് തയ്യാറാകണമെന്നും രാജ്മോഹന് ഉണ്ണിത്താന് ആവശ്യപ്പെട്ടു. ഇ പി ജയരാജന് ജാവദേക്കര് കൂടിക്കാഴ്ച വിവാദത്തില് കൂടിക്കാഴ്ച നടന്നത് കാലാവസ്ഥ വ്യതിയാനത്തെക്കുറിച്ചും ആഗോള താപനത്തെക്കുറിച്ചും സംസാരിക്കാനാകുമെന്നും ഉണ്ണിത്താന് പരിഹസിച്ചു.
