വാകത്താനം: കോണ്ക്രീറ്റ് കമ്പനിയില് സഹപ്രവര്ത്തകനായ അസം സ്വദേശിയെ ജെ.സി.ബി. ഉപയോഗിച്ചു വേസ്റ്റ് കുഴിക്കുള്ളില് താഴ്ത്തി കൊലപ്പെടുത്തിയ തമിഴ്നാട് സ്വദേശി അറസ്റ്റില്. പാണ്ടിദുരൈ(29)യെയാണു വാകത്താനം പോലീസ് അറസ്റ്റ് ചെയ്തത്.
വാകത്താനത്ത് ഇരുവരും ജോലി ചെയ്തിരുന്ന കോണ്ക്രീറ്റ് കമ്പനിയിലെ പ്ലാന്റ് ഓപ്പറേറ്ററായ പാണ്ടിദുരൈ ഹെല്പ്പറായ അസം സ്വദേശി ലേമാന് കിസ്കി(19)നെ കമ്പനിയിലെ വേസ്റ്റ് കുഴിക്കുള്ളില് താഴ്ത്തി കൊലപ്പെടുത്തുകയായിരുന്നു.
കഴിഞ്ഞ 28 നു വാകത്താനം ഭാഗത്തുള്ള പ്രീഫാബ് കോണ്ക്രീറ്റ് കമ്പനിയിലെ വേസ്റ്റ് കുഴിയില് യുവാവിനെ മരിച്ചനിലയില് കണ്ടതിനെത്തുടര്ന്നു വാകത്താനം പോലീസ് കേസ് രജിസ്റ്റര് ചെയ്തു. അസ്വഭാവിക മരണത്തിനു കേസെടുത്ത് ജില്ലാ പോലീസ് മേധാവി കെ. കാര്ത്തിക്കിന്റെ നേതൃത്വത്തില് നടത്തിയ ശാസ്ത്രീയ അന്വേഷണത്തില് ഇതു കൊലപാതകമാണെന്നു കണ്ടെത്തി.
കഴിഞ്ഞ 26 നു ജോലിക്കെത്തിയ യുവാവ് മിക്സര് മെഷീനുള്ളില് ക്ലീന് ചെയ്യാന് ഇറങ്ങിയ സമയം പാണ്ടിദുരൈ മെഷീന്റെ സ്വിച്ച് ഓണ് ചെയ്യുകയായിരുന്നു. തുടര്ന്നു ഗുരുതുര പരുക്കുകളോടെ മെഷീനുള്ളില്നിന്നു താഴെ വീണ യുവാവിനെ ജെ.സി.ബി. ഉപയോഗിച്ചു കമ്പനിയുടെ വേസ്റ്റ് കുഴിയില് താഴ്ത്തി.
ഇതിനുശേഷം പ്രതി കമ്പനിയിലെ സ്ലേറി വേസ്റ്റ് ജെ.സി.ബി.കൊണ്ട് ടിപ്പറിലാക്കി യുവാവ് കിടന്ന വേസ്റ്റ് കുഴിയിലേക്കു തള്ളി. രണ്ടു ദിവസത്തിനുശേഷം കൈയുയര്ന്ന നിലയില് മൃതദേഹം വേസ്റ്റ് കുഴിയില് കണ്ടെത്തിയതോടെയാണ് മരണവിവരം പുറത്തറിഞ്ഞത്. ഇതിനിടെ യുവാവിനെ കാണാനില്ലെന്ന പരാതിയുമുണ്ടായി.
കമ്പനിയിലെ ഇലക്ട്രിക്കല് വര്ക്ക് കൂടി ചെയ്തിരുന്ന പാണ്ടിദുരൈ സംഭവസ്ഥലത്തെ സി.സി.ടിവി ഇന്വെര്ട്ടര്, തകരാറിലാണെന്നു പറഞ്ഞു സംഭവസമയത്ത് ഓഫ് ചെയ്തിരുന്നതായും പോലീസ് കണ്ടെത്തി. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
