കോട്ടയം: ക്നാനായ യാക്കോബായ സഭ ആര്ച്ച് ബിഷപ്പും ചീഫ് മെത്രാപ്പോലീത്തായുമായ കുറിയക്കോസ് മോര് സേവേറിയോസ് മെത്രാപ്പോലീത്തായെ പരിശുദ്ധ ഇഗ്നാത്തിയോസ് അപ്രേം ദ്വിതിയന് പാത്രയര്ക്കീസ് ബാവ സസ്പെന്ഡ് ചെയ്തു.'സമുദായ മെത്രാപ്പോലീത്ത' എന്ന പദവിയില് നിന്നും ഒഴിവാക്കി.സസ്പെന്ഷന് കാലയളവില് സഭയുടെ കൂദാശകള് നടത്തുന്നതിനും വിലക്കേര്പ്പെടുത്തിയിട്ടുണ്ട്.
കഴിഞ്ഞ കുറച്ചു നാളുകളായി ക്നാനായ സഭയ്ക്കുള്ളില് നടന്നു വരുന്ന അഭിപ്രായ ഭിന്നത രൂക്ഷമായി തുടരുന്ന സാഹചര്യത്തിലാണ് സസ്പെന്ഷന്. ഇന്നലെ കുറിയാക്കോസ് മോര് സേവേറിയോസ് മെത്രാപ്പോലീത്തായുമായി പാത്രിയര്ക്കീസ് ബാവ വീഡിയോ കോളിലൂടെ സഭയില് ഇപ്പോള് ഉണ്ടായിരിക്കുന്ന പ്രതിസന്ധി സംബന്ധിച്ച് വിശദീകരണം തേടിയിരുന്നു.വിശദീകരണം തൃപ്തികരമല്ലാത്തതിനാലാണ് നടപടി.അന്ത്യോഖ്യ പാത്രിയര്ക്കീസാണ് സഭയുടെ നിലവിലുള്ള ഭരണഘടനപ്രകാരം പരമാധികാരിയും മേലധികാരിയും.
ഇതിനിടെ ഭരണഘടന ഭേദഗതി ചെയ്യുന്നതിന്റെ ഭാഗമായി ഈ മാസം 21-ന് സഭയുടെ ആസ്ഥാനമായ ചിങ്ങവനം മോര് അപ്രേം സെമിനാരിയില് കുര്യാക്കോസ് മോര് സേവേറിയോസ് സഭാ സ്ഥാനികളുടെ യോഗം വിളിച്ചു ചേര്ത്തിരുന്നു.പാത്രിയര്ക്കീസ് ബാവായുടെ അധികാരം വെട്ടിക്കുറയ്ക്കുന്ന ഭരണഘടനാ ഭേദഗതിക്ക് വേണ്ടിയാണ് യോഗം വിളിച്ചിരി്ക്കുന്നതെന്ന് പരാതി ഉയര്ന്നിരുന്നു.
ഇതേ തുടര്ന്ന് ഭരണഘടനാ ഭേദഗതി യോഗം റദ്ദാക്കാന് പാത്രിയര്ക്കീസ് ബാവ നിര്ദേശിച്ചെങ്കിലും യോഗതീരുമാനവുമായി കുറിയാക്കോസ് മോര് സേവേറിയോസ് മെത്രാപ്പോലീത്ത മുന്നോട്ട് പോകുകയായിരുന്നു.ഇതേ തുടര്ന്നാണ് സേവേറിയോസ് മെത്രാപ്പോലീത്തായെ സസ്പെന്ഡ് ചെയ്തുകൊണ്ട് പാത്രിയര്ക്കീസ് ബാവ ഉത്തരവിറക്കിയത്.
