വ്യത്യസ്തമായ കണ്ടന്റുകൊണ്ടും ഹ്യൂമര് സെന്സുകൊണ്ടും പ്രിയങ്കരനായി മാറിയ യൂട്യൂബറാണ് അമേരിക്കക്കാരനായ ഡാരന് വാട്കിന്സ് അഥവാ IShowSpeed. എന്നാല് ഇപ്പോഴിതാ തീര്ത്തും വ്യത്യസ്തമായ ഒരു ഡാരന്റെ ഒരു വീഡിയോയാണ് സോഷ്യല് മീഡിയയില് ശ്രദ്ധ നേടുന്നത്. ഒരു പട്ടി ഡാരന്റെ മൂക്കിന് കടിച്ച വീഡിയോയാണ് ഇത്.
ദക്ഷിണ കൊറിയയിലെ തെരുവുകളില് നിന്ന് ലൈവ് ബ്രോഡ്കാസ്റ്റിംഗ് നടത്തുന്നതിനിടെയാണ് യുവാവിന് നായയുടെ കടി കൊണ്ടത്. ഒരു ബേബി സിറ്റര് നായയുമായി അതുവഴി പോവുകയായിരുന്നു. ആ നായയുടെ മുഖത്ത് നോക്കി കുരയ്ക്കുന്നത് പോലെ ശബ്ദമുണ്ടാക്കുകയായിരുന്നു വാട്കിന്സ്. ഇങ്ങനെ ശബ്ദമുണ്ടാക്കിക്കൊണ്ട് നായയുടെ മുഖത്ത് നേര്ക്ക് മുഖമടുപ്പിച്ചപ്പോഴാണ് ഇയാള്ക്ക് നായയുടെ കടിയേറ്റത്.
തുടക്കത്തില് ആ കടി യൂട്യൂബര് അത്ര കാര്യമാക്കിയില്ല. അയാള് പിന്നെയും നായയ്ക്ക് നേരെ കുരച്ചുകൊണ്ട് ചെല്ലുന്നുണ്ട്. എന്നാല് കുറച്ച് കഴിഞ്ഞപ്പോള് അയാള് തന്റെ മൂക്കില് നിന്നും ചോര വരുന്നുണ്ടെന്നും തനിക്ക് വേദനിക്കുന്നുണ്ടെന്നും ഒക്കെ പറയുന്നുണ്ട്. ഒപ്പം നായയുടെ ഉടമയോട് കേസ് കൊടുക്കുമെന്ന് പറയുന്നത് കേള്ക്കാം. നായയ്ക്ക് കുത്തിവയ്പ്പ് എടുത്തിട്ടുണ്ടോ എന്നും ചോദിക്കുന്നുണ്ട്. എന്നാല് കുറച്ചുകഴിയുമ്പോള് അത് തിരുത്തുന്നുണ്ട്. കേസ് കൊടുക്കില്ല എന്നും നായയുടെ കടിയേറ്റത് തന്റെ തെറ്റ് കൊണ്ടാണ് എന്നും ഡാരന് പറയുന്നുണ്ട്.
ഏതായാലും നിമിഷ നേരങ്ങള്ക്കുള്ളിലാണ് വീഡിയോ വൈറലായത്. നിരവധി ആളുകള് വീഡിയോയ്ക്ക് കമന്റുകളുമായി രംഗത്തെത്തി. ഭൂരിഭാഗം ആളുകളും യൂട്യൂബറെ കുറ്റപ്പെടുത്തിയാണ് സംസാരിച്ചത്. ഒരാള് പറഞ്ഞത് നായയെ ഭയപ്പെടുത്തുക എന്നത് തമാശ നിറഞ്ഞ കാര്യമല്ല എന്നാണ്.
— Cxpium (@copiumx) May 14, 2024
