പാലക്കാട്: വാഹനാപകടത്തില് ഗുരുതരമായി പരിക്കേറ്റയാളെ ആശുപത്രിയിലെത്തിച്ച സ്വകാര്യ ജീവനക്കാര്ക്ക് അഭിനന്ദനപ്രവാഹം. പിക്കപ്പ് വാനും ബൈക്കും കൂട്ടിയിടിച്ച് ഗുരുതരമായി പരിക്കേറ്റ രണ്ടുപേരെ ആശുപത്രിയില് എത്തിച്ചതിന് പാലക്കാട് - തൃശൂര് റൂട്ടില് സര്വീസ് നടത്തുന്ന ലതാഗൗതം ബസാണ് ജീവകാരുണ്യ പ്രവര്ത്തനം നടത്തി കയ്യടി വാങ്ങിയത്. പാലക്കാട് നെന്മാറ ഗോമതിയില് വെച്ചായിരുന്നു അപകടം.
ഗോവിന്ദപുരം-തൃശൂര് റൂട്ടിലോടുന്ന ബസാണ് ലതഗൗതം. രാവിലത്തെ സര്വീസിനിടയിലാണ് ഗോമതിയില് വെച്ച് പിക്കപ്പ് വാനും ബൈക്കും കൂട്ടിയിടിച്ച് രണ്ട് പേര്ക്ക് പരിക്കേറ്റത്. പിക്കപ്പ് വാന് നിര്ത്താതെ പോയി. അപകടത്തില് ഗുരുതരമായി പരിക്കേറ്റ ബൈക്ക് യാത്രക്കാരായ രണ്ടുപേരില് ഒരാളെ ആംബുലന്സില് ആശുപത്രിയിലെത്തിച്ചു. രണ്ടാമത്തെയാള്ക്കായി വാഹനം കാത്തുനില്ക്കുമ്പോഴാണ് ബസ് വന്നത്.
ഈ സമയം ഇതുവഴി കടന്നുവന്ന ഗോവിന്ദപുരം-തൃശൂര് റൂട്ടിലോടുന്ന ലതഗൗതം ബസ് സ്ഥലത്ത് നിര്ത്തുകയായിരുന്നു. തുടര്ന്ന് ബസിലെ ജീവനക്കാര് പരിക്കേറ്റയാളെ ബസിലേക്ക് കയറ്റി നേരെ ആശുപത്രിയിലേക്ക് പോവുകായിരുന്നു. ആശുപത്രിയിലേക്ക് സ്വകാര്യ ബസ് വരുന്നത് കണ്ട് ആദ്യം ആശുപത്രിയിലുണ്ടായിരുന്നവര് ഞെട്ടിയെങ്കിലും കാര്യമറിഞ്ഞപ്പോള് അവര് ദ്രൂതഗതിയില് പ്രവര്ത്തിച്ചു.
ബസിലുണ്ടായിരുന്ന യാത്രക്കാരും ജീവനക്കാരുടെ ഇടപെടലിനെ അഭിനന്ദിച്ചു. ബസ് ആശുപത്രിയിലേക്ക് വിടാന് യാത്രക്കാരും സഹകരിച്ചു. ഗുരുതരമായി പരിക്കേറ്റ രണ്ടുപേരും നിലവില് തൃശൂര് മെഡിക്കല് കോളേജ് ആശുപത്രിയില് ചികിത്സയിലാണ്. രണ്ടുപേരുടെയും പരിക്ക് സാരമുള്ളതാണെന്ന് ആശുപത്രി അധികൃതര് പറഞ്ഞു. ഗംഗാധരന്, സതീശന് എന്നിവര്ക്കാണ് പരിക്കേറ്റത്.
ഗംഗാധരന് ഐസിയുവിലും സതീശന് വാര്ഡിലുമാണ് ചികിത്സയിലുള്ളത്. ഇതിന് പിന്നാലെ അപസ്മാരം വന്നു കുഴഞ്ഞുവീണ ഒരു യുവതിയെയും ഇവര് ആശുപത്രിയില് എത്തിച്ചു. ബസ് ജീവനക്കാരുടെ പ്രവര്ത്തിയില് സുരേഷ് എന്നയാള് ബസ് ജീവനക്കാര്ക്ക് സാമ്പത്തീക സഹായം നല്കിയെങ്കിലും ഈ തുക ഇവര് അപകടത്തില് പരിക്കേറ്റ് ചികിത്സയില് കഴിയുന്നവര്ക്ക് നല്കുമെന്നും പറഞ്ഞിരിക്കുകയാണ്.
