കോഴിക്കോട്: ശസ്ത്രക്രിയയ്ക്ക് പിന്നാലെ അബോധാവസ്ഥയിലായ യുവതിയുടെ മരണവുമായി ബന്ധപ്പെട്ട് സ്വകാര്യ ആശുപത്രിക്കെതിരേ ഭര്ത്താവ്. ശസ്ത്രക്രിയയ്ക്കിടെ നല്കിയ അനസ്തേഷ്യയുടെ അളവ് കൂടിപ്പോയതാണു മരണത്തിനു കാരണമെന്നാണ് ആരോപണം. വയനാട് നടവയല് ചീങ്ങോട് വരിക്കാലയില് ജെറില് ജോസിന്റെ ഭാര്യ അഖില(28)യാണു മരിച്ചത്.
ശസ്ത്രക്രിയയ്ക്കിടെ അനസ്തേഷ്യയുടെ അളവ് കൂടിപ്പോയതിനെ തുടര്ന്ന് ഒരു വര്ഷവും മൂന്ന് മാസവും അഖില അബോധാവസ്ഥയിലായിരുന്നു. ഹെര്ണിയ ശസ്ത്രക്രിയയ്ക്കായി കല്പറ്റയിലെ സ്വകാര്യ ആശുപത്രിയില് 2023 മാര്ച്ച് 18നാണ് അഖിലയെ പ്രവേശിപ്പിച്ചത്. സര്ജറി നടക്കുന്നതിനിടെ രോഗിക്ക് ബോധം വന്നതോടെ വീണ്ടും അനസ്തേഷ്യ നല്കുകയും ശസ്ത്രക്രിയ പൂര്ത്തീകരിക്കുകയും ചെയ്തു.
എന്നാല് അഖില അബോധാവസ്ഥയില് തുടരുകയായിരുന്നു. വിവിധ സ്വകാര്യ ആശുപത്രികളിലേക്ക് തുടര്ചികിത്സക്കായി കൊണ്ടുപോയെങ്കിലും മാറ്റമുണ്ടായില്ല. തുടര്ന്ന് തിങ്കളാഴ്ച മരണത്തിന് കീഴടങ്ങുകയായിരുന്നു. കദളിക്കാട്ടില് ബീന -വിന്സന്റ് ദമ്പതികളുടെ മകളായ അഖില സ്വകാര്യ സ്കൂള് ടീച്ചറായിരുന്നു. ജെറില് ജോസ് സ്വകാര്യ സ്ഥാപനത്തിലെ സെയില്സ് മാനാണ്. മക്കള്: ജെറോം (5), ജെറോണ് (3).
