തന്മാത്ര എന്ന ഒറ്റ സിനിമ മാത്രം മതി മലയാളികള്ക്ക് മീര വാസുദേവ് എന്ന താരത്തെ ഓര്ക്കാന്. അന്യ ഭാഷ നടിയാണെങ്കിലും തന്റേതായ അഭിനയ ശൈലി കൊണ്ട് മലയാളി മനസ്സുകള് കീഴടക്കിയ നടിയാണ് മീര. ബ്ലസി സംവിധാനം ചെയ്ത തന്മാത്രയില് മോഹൻലാലിന്റെ നായികയായിട്ടാണ് മലയാള സിനിമയില് അരങ്ങേറ്റം. ആ സിനിമയും മീരയുടെ പ്രകടനവും ഏറെ കൈയടി നേടിയതാണ്. പിന്നീട് നിരവധി സിനിമകളില് അഭിനയിച്ചുവെങ്കിലും ടെലിവിഷനിലൂടെയുള്ള തിരിച്ചുവരവിലാണ് മീര കുടുംബപ്രേക്ഷകരുടെ പ്രിയങ്കരിയായത്. ഏഷ്യാനെറ്റില് സംപ്രേക്ഷണം ചെയ്യുന്ന കുടുംബവിളക്ക് പരമ്പരയിലെ സുമിത്രയായാണ് മീര ഒരിടവേളയ്ക്ക് ശേഷം തിരികെ വരുന്നത്. സുമിത്രയെ പ്രേക്ഷകര് ഇരുകൈയും നീട്ടി സ്വീകരിച്ചതോടെ ടെലിവിഷന് രംഗത്തെ മിന്നും താരമായി മാറി മീര വാസുദേവ്.
ഇപ്പോഴിതാ തന്റെ ജീവിതത്തിലെ സന്തോഷ വാര്ത്ത പങ്കുവെക്കുകയാണ് മീര. സോഷ്യല് മീഡിയയിലൂടെ മീര തന്നെയാണ് ഇക്കാര്യം അറിയിച്ചത്. ഛായാഗ്രാഹകനായ വിപിന് ആണ് വരന്. മീര നായികയായ കുടുംബവിളക്കിന്റെ ഛായാഗ്രാഹകനാണ് വിപിന്. കഴിഞ്ഞ മാസമായിരുന്നു വളരെ സ്വകാര്യമായ ചടങ്ങില് ഇരുവരും വിവാഹിതരാകുന്നത്. പക്ഷേ ഇന്നാണ് വിവാഹം രജിസ്റ്റര് ചെയ്തത്. ഇതിന് പിന്നാലെയാണ് വിവാഹത്തിന്റെ ചിത്രങ്ങള് പങ്കുവച്ചു കൊണ്ട് വിവാഹിതയായെന്ന വാര്ത്ത മീര പങ്കുവെക്കുന്നത്.
‘‘ഞങ്ങള് ഔദ്യോഗികമായി വിവാഹിതരാണ്.ഞാനും, വിപിനും 21/04/2024-ന് കോയമ്പത്തൂരില് വച്ച് വിവാഹിതരായി, ഞങ്ങള് ഇന്ന് ദമ്പതികളായി ഔദ്യോഗികമായി റജിസ്റ്റർ ചെയ്തു. ഞാൻ വിപിനെ ശരിയായി പരിചയപ്പെടുത്തട്ടെ. പാലക്കാട് ആലത്തൂർ സ്വദേശിയാണ്. അദ്ദേഹം ഒരു ഛായാഗ്രാഹകനാണ് (രാജ്യാന്തര അവാർഡ് ജേതാവ്). ഞാനും വിപിനും 2019 മേയ് മുതല് ഒരേ പ്രോജക്റ്റില് ഒരുമിച്ച് പ്രവർത്തിക്കുന്നു.
കഴിഞ്ഞ ഒരു വർഷമായി ഞങ്ങള് പരിചയത്തിലാണ്. ഒടുവില് ആ പരിചയം വിവാഹത്തിലെത്തി. ഞങ്ങളുടെ അടുത്ത കുടുംബാംഗങ്ങളും 2-3 അടുത്ത സുഹൃത്തുക്കളും മാത്രമേ ഞങ്ങള് പങ്കെടുത്തിരുന്നുള്ളൂ. എന്റെ പ്രൊഫഷണല് യാത്രയിലുടനീളം എനിക്ക് ഏറ്റവും വലിയ പിന്തുണ നല്കിയ എന്റെ അഭ്യുദയകാംക്ഷികളോടും ബന്ധുക്കളോടും സുഹൃത്തുക്കളോടും മാധ്യമങ്ങളോടും ഈ അനുഗ്രഹീതമായ ഔദ്യോഗിക വാർത്ത പങ്കുവയ്ക്കുന്നു. എന്റെ ഭർത്താവ് വിപിനോടും നിങ്ങള് അതേ സ്നേഹവും പിന്തുണയും പങ്കിടുമെന്ന് ഞാൻ പ്രതീക്ഷിക്കുന്നു...സ്നേഹത്തോടെ മീര വാസുദേവനും വിപിന് പുതിയങ്കവും...’’ ചിത്രങ്ങള്ക്കൊപ്പം മീര വാസുദേവ് കുറിച്ചു. ചടങ്ങിലും മറ്റും മീരയുടെ രണ്ടാം വിവാഹത്തിലുള്ള മകനും പങ്കെടുത്തിട്ടുണ്ട്. എല്ലാ ചിത്രങ്ങളിലും വീഡിയോയിലും മീരയുടെ മകനെയും കാണാം.
മീരയുടെ മൂന്നാമത്തെ വിവാഹമാണിത്. വിശാല് അര്വാള് ആണ് മീരയുടെ ആദ്യ ഭര്ത്താവ്. ഈ ബന്ധം അവസാനിപ്പിച്ച ശേഷമാണ് 2012 ല് മീര നടന് ജോണ് കൊക്കനെ വിവാഹം കഴിക്കുന്നത്. ഇരുവര്ക്കും ഒരു മകനുമുണ്ട്. എന്നാല് 2016ല് ഇരുവരും വിവാഹ മോചിതരാവുകയായിരുന്നു.
സീരിയിലെന്നത് പോലെ തന്നെ സിനിമയിലും സജീവമാണ് മീര. കിര്ക്കന് ആണ് മീരയുടേതായി ഒടുവില് പുറത്തിറങ്ങിയ സിനിമ. ഗെറ്റ് സെറ്റ് ബേബി, കൃതി, ബീരെ, ഐസിയു തുടങ്ങിയ സിനിമകള് മീരയുടേതായി അണിയറയിലുണ്ട്. മലയാളത്തിന് പുറമെ ഹിന്ദിയിലും തമിഴിലും തെലുങ്കിലും മീര സാന്നിധ്യം അറിയിച്ചിട്ടുണ്ട്. നിരവധി പേരാണ് താരത്തിന് ആശംസകള് കുറിക്കുന്നത്. സഹതാരങ്ങളും ആരാധകരും ആശംസകള് കുറിക്കുന്നുണ്ട്.
