മലയാള സിനിമയ്ക്ക് ഒരുപിടി നല്ല കഥാപാത്രങ്ങള് നല്കിയ തെന്നിന്ത്യന് താരസുന്ദരിയാണ് നസ്രിയ നസീം. മലയാളത്തിന്റെ യുവനായകന്മാരില് ശ്രദ്ധേയനായ ഫഹദ് ഫാസിലിനെ വിവാഹം ചെയ്ത നസ്രിയ ഇടയ്ക്ക് സിനിമകളില് നിന്ന് ഇടവേളയെടുത്തിരുന്നു. പിന്നീട് നല്ല കഥാപാത്രങ്ങള് കിട്ടിയപ്പോള് താരം വെള്ളിത്തിരയിലേക്ക് മടങ്ങി വരുകയും ചെയ്തു. കഴിഞ്ഞ ദിവസമാണ് ഒരിടവേളക്ക് ശേഷം മലയാളത്തില് നായികയായി നസ്രിയ വീണ്ടും എത്തുന്ന സിനിമയായ ‘സൂക്ഷ്മദര്ശിനി’യുടെ ഫസ്റ്റ് ലുക്ക് പോസ്റ്റര് ബേസില് ജോസഫ് സോഷ്യല് മീഡിയയിലൂടെ പങ്കിട്ടത്.
ഇപ്പോഴിതാ സിനിമയുടെ ലൊക്കേഷന് വീഡിയോ സോഷ്യല് മീഡിയയില് ശ്രദ്ധിക്കപ്പെടുകയാണ്. നസ്രിയയുടെ സിനിമാ ലൊക്കേഷനിലേക്ക് ഫഹദ് എത്തുന്നതാണ് വീഡിയോ. ചിത്രത്തിന്റെ മേക്കിംഗ് വീഡിയോ അണിയറപ്രവര്ത്തകര് ഹാപ്പി അവേർസ് എന്റർടൈൻമെന്റ്സ് യുട്യൂബ് ചാനലിലൂടെ പുറത്തുവിട്ടിട്ടുണ്ട്. അതിലാണ് നസ്രിയയെയും ഫഹദിനെയും മറ്റുള്ള അഭിനേതാക്കളെയും കാണാന് കഴിയുന്നത്.
ബേസില് ജോസഫ്, നസ്രിയ നസീം എന്നിവരെ കേന്ദ്ര കഥാപാത്രങ്ങളാക്കി എം.സി. ജിതിൻ സംവിധാനം ചെയ്യുന്ന സിനിമയാണ് ‘സൂക്ഷ്മദര്ശിനി’. ഹാപ്പി അവേർസ് എന്റർടൈൻമെന്റ്സിന്റെയും, എ വി എ പ്രൊഡക്ഷൻസിന്റെയും ബാനറുകളില് സമീർ താഹിർ, ഷൈജു ഖാലിദ്, എ.വി. അനൂപ് എന്നിവർ ചേര്ന്ന് നിര്മിക്കുന്നതാണ് ഈ സിനിമ.
നോണ്സെന്സ് എന്ന ചിത്രത്തിന് ശേഷം എം.സി. ജിതിന് സംവിധാനം ചെയ്യുന്ന ചിത്രമാണ് സൂക്ഷ്മദര്ശിനി. എം.സി. ജിതിൻ, അതുല് രാമചന്ദ്രൻ എന്നിവരുടെ കഥക്ക് എം.സി. ജിതിൻ, അതുല് രാമചന്ദ്രൻ, ലിബിൻ ടി.ബി. എന്നിവർ ചേർന്ന് തിരക്കഥയും സംഭാഷണവും രചിച്ച ചിത്രത്തിനായി സംഗീതം ഒരുക്കുന്നത് ക്രിസ്റ്റോ സേവ്യറാണ്. ദീപക് പരമ്ബോല്, സിദ്ധാർഥ് ഭരതൻ, മെറിൻ ഫില്പ്പ്, അഖില ഭാർഗവൻ, പൂജ മോഹൻരാജ്, കോട്ടയം രമേഷ്, ഗോപൻ മങ്ങാട്ട്, മനോഹരി ജോയ്, റിനി ഉദയകുമാർ, ജയ കുറുപ്പ്, മുസ്കാൻ ബിസാരിയ, അപർണ റാം, അഭിരാം പൊതുവാള്, ബിന്നി റിങ്കി, നന്ദൻ ഉണ്ണി, നൗഷാദ് അലി, ആതിര രാജീവ്, മിർസ ഫാത്തിയ തുടങ്ങിയവരാണ് സിനിമയിലെ മറ്റ് അഭിനേതാക്കള്.
