സമൂഹമാധ്യമങ്ങളില് ആരാധകരെ സമ്പാദിക്കാനും ലൈക്കുകള് വാരിക്കൂട്ടാനുമായി പല അഭ്യാസപ്രകടനങ്ങളും കാണിക്കുന്ന നിരവധി ആളുകളുണ്ട്. ഇത്തരം പ്രകടനങ്ങളിലൂടെ സോഷ്യല് മീഡിയയില് താരമാകുക എന്നത് പലരും ഏറെ ആഗ്രഹിക്കുന്ന കാര്യവുമാണ്. ഇത്തരത്തിലുള്ള നിരവധി സംഭവങ്ങള് സമീപകാലത്ത് റിപ്പോര്ട്ട് ചെയ്തിരുന്നതായും കാണാം. ഇപ്പോഴിതാ ബെംഗളൂരുവില് നിന്ന് സമാനമായ മറ്റൊരു സംഭവം റിപ്പോര്ട്ട് ചെയ്യപ്പെട്ടിരിക്കുകയാണ്.
ഏറെ അപകടകരമായ രീതിയില് ഒരു യുവാവും യുവതിയും ഒരു മോട്ടോര്സൈക്കിള് ഓടിക്കുന്നതിന്റെ ദൃശ്യങ്ങളാണിത്. @itx_toxic_sa എന്ന ഇന്സ്റ്റഗ്രാം അക്കൗണ്ടിലാണ് ഞെട്ടിക്കുന്ന ഈ വീഡിയോ പങ്കുവെച്ചിരിക്കുന്നത്. തിരക്കേറിയ റോഡിന് നടുവില് ഒരു യുവതിയെ വണ്ടിയുടെ പുറകില് ഇരുത്തിക്കൊണ്ട് ബൈക്ക് അമിതവേഗതയില് ഓടിക്കുന്ന യുവാവിനെയാണ് വീഡിയോയില് കാണാന് കഴിയുക. ബൈക്ക് സ്റ്റണ്ടിന് ശ്രമിക്കുമ്പോള് ഇരുവരും ഹെല്മറ്റ് പോലും ധരിച്ചിട്ടില്ല എന്നതാണ് ആശങ്കപ്പെടുത്തുന്ന മറ്റൊരു കാര്യം. ഏറെ അപകടകരമായ രീതിയിലാണ് പെണ്കുട്ടി ബൈക്കിനു പുറകില് ഇരിക്കുന്നത്.
പങ്കുവയ്ക്കപ്പെട്ട വീഡിയോയില് പെണ്കുട്ടിയെ പിറകിലിരുത്തി അമിതവേഗതയില് ഓടിച്ചുവരുന്ന ബൈക്കിന്റെ മുന്ഭാഗത്തെ ടയര് യുവാവ് പെട്ടെന്ന് വായുവിലേക്ക് ഉയര്ത്തുന്നതാണ് കാണുന്നത്. തുടര്ന്ന് വാഹനം പിന് ടയറില് മാത്രമായി ഓടിക്കുന്നു. വീലി എന്നറിയപ്പെടുന്ന സ്റ്റണ്ട് സാധാരണഗതിയില്, റൈഡര് ബൈക്കില് ഒറ്റയ്ക്ക് ഇരിക്കുമ്പോള് മാത്രമാണ് നടത്തുന്നത്. വണ്ടിയില് നിന്നും നിലത്ത് വീണുപോകാതിരിക്കാന് പെണ്കുട്ടി യുവാവിന്റെ ടീഷര്ട്ടില് മുറുക്കെ പിടിച്ചിരിക്കുന്നതും കാണാം. കഴിഞ്ഞ വര്ഷം സെപ്തംബര് 13 -ന് ഷെയര് ചെയ്ത വീഡിയോയാണ് ഇതെങ്കിലും ഇപ്പോള് സോഷ്യല് മീഡിയയില് വീണ്ടും വലിയ ചര്ച്ചകള്ക്ക് വഴി തുറന്നിരിക്കുകയാണ് ഈ വീഡിയോ.
