സെന്റ് വിന്സെന്റ്: ടി20 ലോകകപ്പ് സൂപ്പര് എട്ടില് അഫ്ഗാനിസ്ഥാനെതിരെ നിര്ണായക മത്സരത്തില് ബംഗ്ലാദേശിന് 116 റണ്സ് വിജയലക്ഷ്യം. ടോസ് നേടി ബാറ്റിംഗ് തിരഞ്ഞെടുത്ത അഫ്ഗാന്റെ് റഹ്മാനുള്ള ഗുര്ബാസ് (55 പന്തില് 45) മാത്രമാണ് പിടിച്ചുനിന്നത്. ബംഗ്ലാദേശിന് വേണ്ടി റിഷാദ് ഹുസൈന് മൂന്ന് വിക്കറ്റെടുത്തു.
മോശം തുടക്കമായിരുന്നു അഫ്ഗാന്. പവര് പ്ലേ പോലും മുതലാക്കാന് സാധിച്ചില്ല. 27 റണ്സ് മാത്രമാണ് ആറ് ഓവറില് അഫ്ഗാന് നേടാന് സാധിച്ചത്. 10 ഓവറില് 58 റണ്സ് മാത്രമാണ് സ്കോര്ബോര്ഡിലുണ്ടായിരുന്നത്. 11-ാം ഓവറില് ആദ്യ വിക്കറ്റും പോയി. 29 പന്തില് 18 റണ്സെടുത്ത ഇബ്രാഹിം സദ്രാനെ റിഷാദ് ഹുസൈന് മടക്കി. പിന്നീട് കൃത്യമായ ഇടവേളകളില് അഫ്ഗാന് വിക്കറ്റ് നഷ്ടമായികൊണ്ടിരുന്നു. അസ്മതുള്ള ഒമര്സായ് (10), ഗുല്ബാദിന് നെയ്ബ് (4), മുഹമ്മദ് നബി (1) എന്നിവര്ക്ക് തിളങ്ങാനായില്ല. ഇതിനിടെ ഗുര്ബാസും മടങ്ങി. ഒരു സിക്സും മൂന്ന് ഫോറും ഉള്പ്പെടുന്നതായിരുന്നു ഗുര്ബാസിന്റെ ഇന്നിംഗ്സ്. റാഷിദ് ഖാന് (19), കരീം ജനത് (7) എന്നിവരുടെ ഇന്നിംഗ്സാണ് സ്കോര് 100 കടത്തിയത്. ഇരുവരും പുറത്താവാതെ നിന്നു.
അഫ്ഗാന്റെ ഇന്നിംഗ്സ് അവസാനിച്ച ഉടന് മഴയെ തുടര്ന്ന് പിച്ച് മൂടേണ്ടി വന്നു. മത്സരം ജയിച്ചാല് മാത്രമെ അഫ്ഗാന് സെമിയിലെത്താന് സാധിക്കൂ. മഴയെ തുടര്ന്ന് മത്സരം പൂര്ത്തിയാക്കാന് സാധിച്ചില്ലെങ്കിലും അഫ്ഗാന് സെമി കളിക്കും. 12.1 ഓവറിനിടെ വിജയലക്ഷ്യം മറികടന്നാല് ബംഗ്ലാദേശിനും സെമിയിലെത്താം. ഇവ രണ്ടും സംഭവിച്ചില്ലെങ്കില് ഓസ്ട്രേലിയ സെമി ഫൈനല് കളിക്കും.
