കുഞ്ചിത്തണ്ണി: റോഡ് നിര്മാണത്തിന്റെ ഭാഗമായി മണ്ണുമാന്തി യന്ത്രമുപയോഗിച്ച് മണ്ണ് നീക്കം ചെയ്തതോടെ ഒരു കുടുംബത്തിലുള്ളവര്ക്ക് അവരുടെ വീട്ടിലേക്ക് കയറാന് പറ്റാത്ത അവസ്ഥയിലായി. ഉടുമ്പന്ചോലയില് നിന്നുമാരംഭിച്ച് പള്ളിവാസല് രണ്ടാം മൈലില് എത്തുന്ന റോഡിന്റെ നിര്മാണമാണ് ഒരു കുടുംബത്തെ വഴിയാധാര മാക്കിയത്.
പള്ളിവാസല് പഞ്ചായത്തില് എട്ടാംവര്ഡില് കരോട്ട് വട്ടക്കാട്ട് കെ.എന് സജീവും, ഭാര്യയും രണ്ടുമക്കളുമാണ് വീട്ടിലേക്ക് കയറാന് വിഷമിക്കുന്നത്. 2018-19 വര്ഷം പള്ളിവാസല് പഞ്ചായത്തില്നിന്നും ലൈഫ് ഭവനനിര്മാണ പദ്ധതിയനുസരിച്ച് നിര്മിച്ച വീടാണ് സജീവിന്റെത്. റോഡിനാവശ്യമായ സ്ഥല സജീവ് വിട്ടുനല്കിയിരുന്നു. റോഡിന് മണ്ണു മാറ്റിയപ്പോള് വീടിന്റെ മുന്വശം 15 അടി കട്ടിങിന്റെ മുകളിലാണ്. ഇത്രയും ഉയരത്തില് സംരക്ഷണഭിത്തി നിര്മിച്ചില്ലെങ്കില് വീടിന് ഭീഷണിയാണ്.
മഴക്കാലം ശക്തമാകുന്നതോടെ വീട്ടിലേക്ക് കയറുവാന് പറ്റാത്ത അവസ്ഥയിലാകും. കട്ടിങ് ഇടിഞ്ഞ് വീടിന് ഭീഷണിയാകുകയും ചെയ്യും. മണ്ണ് നീക്കം ചെയ്തപ്പോള് വീടിനും വീട്ടിലുള്ളവര്ക്കും ഭീഷണിയാണെന്നും അതുകൊണ്ട് സംരക്ഷണഭിത്തി നിര്മിക്കണമെന്നും കരാറുകാരനോട് നിരവധി തവണ ആവശ്യപ്പെട്ടെവെങ്കിലും നടപടിയുണ്ടായില്ല. യാതൊരു ഭീഷണിയു മില്ലാത്തതും നിലവില് സംരക്ഷണഭിത്തിയില്ലാത്തതുമായ നിരവധി ഇടങ്ങളില് കരാറുകാരന് കരിങ്കല്കൊണ്ടുള്ള സംരക്ഷണ ഭിത്തി നിര്മിച്ചിട്ടുണ്ട്. ഓട്ടോറിക്ഷ ഓടിച്ചു കിട്ടുന്ന വരുമാനംകൊണ്ട് ജീവിക്കുന്നയാളാണ് സജീവ്.
മുമ്പ് മുറ്റത്ത് ഓട്ടോറിക്ഷ കയറ്റിയിട്ടിരുന്നു ഇപ്പോള് റോഡുവികസനം വന്നതോടെ റോഡ്സൈഡില് ഓട്ടോയിടേണ്ട ഗതികേടിലായി.
സംരക്ഷണഭിത്തി നിര്മിക്കണമെന്നാവശ്യപ്പെട്ട് സബ്കലക്ടര് വില്ലേജ് ഓഫീസര് എന്നിവര്ക്ക് സജീവ് പരാതി നല്കി ഇതേതുടര്ന്ന് സബ്കലക്ടര് കെ.എസ്.ടി.പി പ്രോജക്ട് ഡയറക്ടറോട് നടപടി സ്വീകരിക്കണമെന്നാവശ്യപ്പെട്ട് കത്ത് നല്കിയിട്ടും കരാറുകാരന് വേണ്ടത് ചെയ്യുന്നില്ല. തുടര് നടപടികള്ക്കായി വീട്ടുടമ കലക്ടര്ക്ക് പരാതി നല്കും.
