ഇന്ത്യയില് ആദ്യമായി ഭരണരംഗത്തെ ഏറ്റവും പ്രധാനമായ രണ്ടു പദവികളില് സ്ത്രീകളെ നിയോഗിച്ച് മഹാരാഷ്ട്ര കുറിച്ചത് ചരിത്രം. സീനിയര് ഐഎഎസ് ഉദ്യോഗസ്ഥയായ സുജാതാ സൗനികിനെ ചീഫ് സെക്രട്ടറിയായി നിയോഗിച്ച് മാസങ്ങള് പിന്നിടും മുമ്പ് തന്നെ സീനിയര് ഐപിഎസ് ഉദ്യോഗസ്ഥയായ രശ്മി ശുക്ലയെ മഹാരാഷ്ട്രയിലെ ഡിജിപിയായും നിയോഗിച്ചു. പുരുഷകേന്ദ്രീകൃത ലോകത്ത് രണ്ടു സ്ത്രീകളെ സംസ്ഥാനത്തിന്റെ താക്കോല് സ്ഥാനങ്ങളിലേക്ക് നിയോഗിച്ച് ഞെട്ടിച്ചിരിക്കുകയാണ് മഹാരാഷ്ട്ര.
1987 ബാച്ച് ഉദ്യോഗസ്ഥ സുജാത സൗനിക്കിനെ നേരത്തേ ആഭ്യന്തരവകുപ്പില് അഡീഷണല് ചീഫ് സെക്രട്ടറിയായി നിയോഗിച്ചിരുന്നു. 1989 ല് ഔറംഗബാദ് കോര്പ്പറേഷന് അസിസ്റ്റന് കമ്മീഷണറായി കരിയര് ആരംഭിച്ച സൂജാത കമ്മീഷണറുടെ റോളും ഏറ്റെടുത്തിരുന്നു. ഔറംഗബാദിലെ വര്ഗ്ഗീയസംഘര്ഷം അടക്കമുള്ള പ്രശ്നങ്ങള് സമാധാനപരമായി പരിഹരിക്കാന് സുജാതയ്ക്ക് തന്റെ സമയത്ത് കഴിഞ്ഞിരുന്നു. പിന്നീട് ജലാനാ ജില്ലയുടെ ഡപ്യൂട്ടി കളക്ടര് ഉള്പ്പെടെ മഹാരാഷ്ട്ര സര്ക്കാരില് വിവിധ പദവികള് വഹിച്ചു. ഇവരുടെ ഭര്ത്താവ് മനോജ് സൗനികും സ്റ്റേറ്റ് ചീഫ് സെക്രട്ടറിയായി സേവനം ചെയ്തിട്ടുള്ളയാളാണ്. ഈ പദവി വഹിക്കുന്ന ആദ്യ ദമ്പതികളായിട്ടാണ് ഇതിലൂടെ ഇരുവരും മാറിയത്.
കൊസാവോയിലെ യുഎന് മിഷനില് മുനിസിപ്പല് അഡ്മിനിസ്ട്രേഷന് ആന്റ് സിവില് അഫയര് ഓഫീസറായിരുന്ന അവര് കംബോഡിയയില് ഇലക്ഷന് മോണിട്ടറായും പ്രവര്ത്തിച്ച അന്താരാഷ്ട്ര പരിചയവും ഇവര്ക്കുണ്ട്. ആരോഗ്യ പരിപാലനം, സാമ്പത്തീകം, വിദ്യാഭ്യാസം, ദുരന്തനിവാരണം, സമാധാന പരിപാലനം അടക്കം മൂന്ന് ദശകത്തിനിടയില് അനേകം മേഖലയില് പ്രവര്ത്തിച്ചു. മഹാരാഷ്ട്രയുടെ കഴിഞ്ഞ ബജറ്റില് വനിതകള്ക്ക് വിവിധ സ്കീമുകളും അവതരിപ്പിക്കുന്ന രീതിയില് വനിതാശാക്തീകരണവുമായി ബന്ധപ്പെട്ട പ്രവര്ത്തനങ്ങളും നടത്തിയിട്ടുണ്ട്.
രശ്മികയാകട്ടെ 1988 ബാച്ചിലെ മുതിര്ന്ന ഐപിഎസ് ഓഫീസറാണ്. ഈ വര്ഷം ആദ്യം രശ്മി ശുക്ലയെ ഡിജിപിയായി മഹാരാഷ്ട്ര സംസ്ഥാന പോലീസിനെ നയിക്കാന് തിരഞ്ഞെടുത്തിരുന്നു. സംഘടിത കുറ്റകൃത്യങ്ങള്ക്കെതിരെയുള്ള നിരന്തര പോരാട്ടത്തിനും വനിതാ ശിശു സൗഹൃദ പൊതു സുരക്ഷ ഉറപ്പാക്കുന്നതിനുള്ള ക്രിയാത്മകമായ നടപടികള്ക്കും പേരുകേട്ട, ഈ സ്ഥാനം വഹിക്കുന്ന ആദ്യ വനിതയാണ് ശുക്ല.
ഇതിന് മുമ്പ്, അവര് ഡെപ്യൂട്ടേഷനില് സശാസ്ത്ര സീമ ബാലിന്റെ ഡയറക്ടര് ജനറലായിരുന്നു. എന്നിരുന്നാലും, അവളുടെ കരിയര് വിവാദങ്ങളില്ലാതെ പോയിട്ടില്ല. മഹാ വികാസ് ആഘാഡി ഭരണകാലത്ത്, 2014-2019 കാലഘട്ടത്തില് ശിവസേന-ബിജെപി ഭരണകാലത്ത് രാഷ്ട്രീയ നേതാക്കളുടെ ഫോണ് ചോര്ത്തിയെന്നാരോപിച്ച് അവര്ക്കെതിരെ അന്വേഷണം നടന്നിരുന്നു. ഈ നിയമനങ്ങളോടെ, ലിംഗസമത്വത്തിന്റെയും സ്ത്രീ ശാക്തീകരണത്തിന്റെയും ശക്തമായ ഉദാഹരണമായി ഇന്ത്യയില് തന്നെ മഹാരാഷ്ട്ര മാറിയിരിക്കുകയാണ്.
