കണ്ണൂര്: അതിതീവ്ര മഴയില് വടക്കന് ജില്ലകളില് വ്യാപകനാശം. കണ്ണൂര് അഞ്ചരക്കണ്ടിയില് കെട്ടിടത്തിന്റെ മതിലിടിഞ്ഞു. സ്കൂള് വിദ്യാര്ഥികള് രക്ഷപ്പെട്ടത് അത്ഭുതകരമായി. അഞ്ചരക്കണ്ടി ടൗണിലെ കെട്ടിടത്തിന്റെ മതിലാണ് ഇടിഞ്ഞു വീണത്. കുട്ടികള് ഓടിമാറിയതിനാല് വന് ദുരന്തം ഒഴിവായി. ഇ സമയം റോഡില് വാഹനങ്ങള് വരാതിരുന്നതും അപകടം ഒഴിവാക്കി.
കഴിഞ്ഞ ദിവസങ്ങളെ അപേക്ഷിച്ച് കണ്ണൂര് ജില്ലയില് കനത്ത മഴയാണു പെയ്തത്. മട്ടന്നൂര് കൊട്ടാരത്ത് കാര് വെള്ളത്തില് ഒഴുകിപ്പോയി. കര്ണാടക രജിസ്ട്രേഷന് കാറാണ് മുങ്ങിയത്. കാറിലുണ്ടായിരുന്ന രണ്ടുപേരും രക്ഷപ്പെട്ടു.പഴശ്ശി ഡാമിന്റെ 16 ഷട്ടറുകളും തുറന്ന് അധികവെള്ളം വളപട്ടണം പുഴയിലേക്ക് ഒഴുക്കിത്തുടങ്ങി. കാസര്ഗോഡ് ജില്ലയിലും പലയിടത്തായി അതിശക്തമായ മഴ തുടരുകയാണ്.
വയനാട് ജില്ലയില് കഴിഞ്ഞ ആറു ദിവസമായി പെയ്യുന്ന അതിതീവ്ര മഴയില് താഴ്ന്ന പ്രദേശങ്ങള് വെള്ളത്തിനടിയിലായി. മണ്ണിടിച്ചില് വ്യാപകമായതോടെ അപകടാവസ്ഥയിലായ പാല്ച്ചുരത്തില് ഒരാഴ്ചത്തേക്ക് വാഹനങ്ങള്ക്കു നിയന്ത്രണമേര്പ്പെടുത്തി. കബനി, നരസിപുഴ ഉള്പ്പടെ ജില്ലയിലെ പ്രധാന പുഴകളെല്ലാം കരകവിഞ്ഞു തുടങ്ങി. വയനാട് ജില്ലയില് മഴശക്തമായതിനെത്തുടര്ന്ന് കര്ണ്ണാടകയിലെ ബീച്ചിനഹള്ളി കബനി അണക്കെട്ടില്നിന്നു വെള്ളം തുറന്നുവിട്ടതായി ജില്ലാ കലക്ടര് ഡി.ആര്. മേഘശ്രീ അറിയിച്ചു.
മലപ്പുറം കൂട്ടിലങ്ങാടികാടാമ്പുഴ റോഡില് പഴമള്ളൂരില് ബൈക്ക് യാത്രികന്റെ മുകളിലേക്ക് മണ്ണിടിഞ്ഞു വീണു. ഓടിക്കൊണ്ടിരുന്ന ബൈക്ക് യാത്രികന്റെ മുകളിലേക്ക് മണ്ണിടിഞ്ഞു വീഴുകയായിരുന്നു. യാത്രക്കാരന് ബൈക്ക് ഉപേക്ഷിച്ചാണ് ഓടി രക്ഷപ്പെട്ടത്. നാടുകാണി ചുരത്തില് റോഡിലേക്ക് കൂറ്റന് മരം വീണ് ഒരു മണിക്കൂറോളം ഗതാഗതം മുടങ്ങി.
