അമ്പലപ്പുഴ: ഒഡീഷയില്നിന്ന് ചൈനയിലേക്ക് ചരക്കുമായി പോയ കപ്പലില്നിന്നും മലയാളി യുവാവിനെ കാണാതായി. പുന്നപ്ര വടക്ക് പഞ്ചായത്ത് 10-ാം വാര്ഡ് വൃന്ദാവനം വീട്ടില് ബാബു തിരുമല - സിന്ധു ദമ്പതികളുടെ മകന് വിഷ്ണു ബാബുവിനെ (25)യാണു കാണാതായത്.
മേയ് 25 നാണ് വിഷ്ണു ചെന്നൈ കേന്ദ്രമായി പ്രവര്ത്തിക്കുന്ന ഷിപ്പിങ് കമ്പനിയില് ജോലിക്ക് പ്രവേശിച്ചത്. ബുധനാഴ്ച രാത്രി പ്രാദേശിക സമയം 7.05 നു വിഷ്ണു ഫോണില് വീട്ടുകാരുമായി സംസാരിച്ചിരുന്നു. വിഷ്ണു ഉള്പ്പടെ 19 മര്ച്ചന്റ് നേവി ജീവനക്കാരാണു കപ്പലിലുണ്ടായിരുന്നത്. വ്യാഴാഴ്ച രാവിലെ കപ്പലിലെ സെക്കന്റ് ക്യാപ്റ്റന്റെ ക്യാബിനില് ഇവര് പതിവ് റിപ്പോര്ട്ടിങ്ങിന് എത്താന് നിര്ദേശിച്ചിരുന്നു.
ഈ സമയം വിഷ്ണു എത്താതിരുന്നതിനെ തുടര്ന്ന് നടത്തിയ തെരച്ചിലില് കപ്പലിന്റെ ഡക്കില് വിഷ്ണുവിന്റെ ചെരുപ്പുകള് കണ്ടെത്തി. തുടര്ന്നു നടത്തിയ അനേ്വഷണത്തില് ഫോണ് ക്യാബിനില്നിന്നു ലഭിച്ചെങ്കിലും, വിഷ്ണുവിനെ കണ്ടെത്താനായില്ലന്നാണു വീട്ടുകാര്ക്ക് ലഭിച്ച വിവരം. ഇന്ധനം നിറക്കാനായി വ്യാഴാഴ്ച കപ്പല് സിംഗപ്പൂര് തുറമുഖത്തേക്കു പോകുന്നതിനിടെയാണ് വിഷ്ണുവിനെ കാണാതായത്.
ചെന്നൈയിലുള്ള ക്യാപ്റ്റന് ഗണേഷ് ശ്രീനിവാസനുമായി ഫോണില് ബന്ധപ്പെട്ടപ്പോള് വിഷ്ണുവിനെ കണ്ടെത്തുന്നതിന് മലേഷ്യന് മറൈന് എന്ഫോഴ്സ്മെന്റ് ഏജന്സി അനേ്വഷണം ആരംഭിച്ചെന്ന വിവരമാണ് ലഭിച്ചത്. സിംഗപ്പൂര് സര്ക്കാര് കപ്പല് കസ്റ്റഡിയിലെടുത്തിട്ടുണ്ട്.
സഹപ്രവര്ത്തകരേയും കപ്പലിലെ മറ്റ് ജീവനക്കാരെയും ചോദ്യം ചെയ്തെങ്കിലും വിഷ്ണുവിന് എന്താണ് സംഭവിച്ചതെന്നറിയില്ലന്ന വിവരമാണ് ലഭിച്ചതെന്നും ബന്ധുക്കള് പറഞ്ഞു. സംഭവത്തെ തുടര്ന്ന് എച്ച് സലാം എം.എല്.എ. വിഷ്ണുവിന്റെ വീട് സന്ദര്ശിച്ചു. വിഷ്ണുവിനെ കണ്ടെത്താന് ആവശ്യമായ നടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രിക്ക് എം.എല്.എ കത്തയച്ചു.
