കാര്വാര്: ഷിരൂരില് മണ്ണിടിച്ചിലില് കാണാതായ അര്ജുന് വേണ്ടിയുള്ള തെരച്ചില് ഏഴാം ദിവസത്തിലേക്ക് കടന്നിരിക്കെ റോഡിലെ റഡാര് പരിശോധനയില് രണ്ടിടങ്ങളില് നിന്നു കൂടി സിഗ്നല് ലഭിച്ചു. ഈ സ്ഥലങ്ങളിലെ മണ്ണുനീക്കി പരിശോധന നടത്തും. ലോറി മണ്ണിനടിയില് ഉണ്ടെന്നും നിര്ണ്ണായക വിവരങ്ങള് ലഭിച്ചെന്നുമാണ് ജില്ലാ ഭരണകൂടത്തെ ഉദ്ധരിച്ച് പുറത്തുവരുന്ന വിവരം. ഡീപ് സേര്ച്ച് മെറ്റല് ഡിറ്റക്ടര് ഉപയോഗിച്ചാണ് പരിശോധനകള് നടന്നു വരുന്നത്. രണ്ടിടത്ത് നിന്നും സിഗ്നല് കിട്ടിയെന്ന കണ്ടെത്തല് പ്രതീക്ഷാഭരമാണ്.
നേരത്തേ സംഭവസ്ഥലത്ത് നിന്നുള്ള സിസിടിവി ദൃശ്യങ്ങള് അധികൃതര്ക്ക് ലഭിച്ചിരുന്നു. ലോറി മണ്ണിടിച്ചില് ഉണ്ടായ സ്ഥലം കടന്നു പോയിട്ടില്ലെന്നാണ് സിസിടിവി ദൃശ്യങ്ങളില് നിന്നും വ്യക്തമായതെന്നും അധികൃതര് മാധ്യമങ്ങളോട് പറഞ്ഞു. മണ്ണിനൊപ്പം ലോറി പുഴയിലേക്ക് വീണിരുന്നോ എന്ന ആശങ്ക ഉയര്ന്നിരുന്നു. ഇതേ തുടര്ന്ന് സ്കൂബാ ഡൈവിംഗ് ടീം പുഴയില് വീണ മണ്ണിലും പരിശോധന നടത്തുകയാണ്. പുഴയിലെ പരിശോധനയ്ക്കായി കൂടുതല് ഉപകരണങ്ങള് നാവികസേന സ്ഥലത്ത് എത്തിച്ചിരുന്നു.
150 അടിയോളം ഉയരത്തില് നിന്നുമാണ് മണ്ണ് നിരങ്ങി താഴേയ്ക്ക് പോയത്. ചൊവ്വാഴ്ച രാവിലെ 8.30 യോടെയായിരുന്നു ദേശീയപാതയില് മണ്ണിടിച്ചിലുണ്ടായത്. ഇവിടെ പെയ്യുന്ന കനത്തമഴയാണ് രക്ഷാപ്രവര്ത്തനങ്ങള്ക്ക് തിരിച്ചടിയാകുന്നത്.
