തിരുവനന്തപുരം: അനേകം വിദ്യാര്ഥികള്ക്ക് അറിവും സ്നേഹവും കരുതലും പകര്ന്ന കൊല്ലം കുഴിത്തുറ ഗവ. ഹയര് സെക്കന്ഡറി സ്കൂളിലെ അധ്യാപിക ബി. ഡാലിയ(47)യുടെ ഹൃദയം മറ്റൊരു വിദ്യാര്ഥിയില് മിടിക്കും. തിരുവനന്തപുരം ശ്രീചിത്ര തിരുനാള് ഇന്സ്റ്റിറ്റ്യൂട്ട് ഫോര് മെഡിക്കല് സയന്സസ് ആന്ഡ് ടെകേ്നാളജിയില് ചികിത്സയിലുള്ള തൃശൂര് ചാവക്കാട് സ്വദേശിനി 14 വയസുകാരിക്കാണ് ഹൃദയം മാറ്റിവച്ചത്.
ശ്രീ ചിത്ര തിരുനാള് ഇന്സ്റ്റിറ്റ്യൂട്ടിലെ ആദ്യത്തെ ഹൃദയം മാറ്റിവയ്ക്കല് ശസത്രക്രിയയാണിത്. സര്ക്കാര് മേഖലയില് കോട്ടയം മെഡിക്കല് കോളജില് മാത്രമാണ് ഇതുവരെ ഹൃദയം മാറ്റിവയ്ക്കല് ശസ്ര്തക്രിയകള് നടത്തിയിരുന്നത്. വളരെ വേദനയിലും അവയവങ്ങള് ദാനം ചെയ്യാന് തയാറായ ബന്ധുക്കളെ ആരോഗ്യമന്ത്രി വീണാ ജോര്ജ് ആദരവറിയിച്ചു. ഡാലിയയുടെ കുടുംബത്തിന്റെ ദുഃഖത്തില് പങ്ക് ചേരുന്നു. ചികിത്സാ രംഗത്ത് ശ്രീചിത്രയുടെ മറ്റൊരു അഭിമാനനേട്ടം കൂടിയാണ് ഹൃദയം മാറ്റിവയ്ക്കല് ശസ്ര്തക്രിയയെന്നും മന്ത്രി പറഞ്ഞു.
കൊല്ലം കരുനാഗപ്പള്ളി ആലുംകടവ് സ്വദേശിയായ ഡാലിയയുടെ മസ്തിഷ്ക മരണം സ്ഥിരീകരിച്ചതിനെത്തുടര്ന്ന് ബന്ധുക്കള് അവയവദാനത്തിന് സന്നദ്ധത അറിയിക്കുകയായിരുന്നു. ഹൃദയവും രണ്ടു വൃക്കകളും കരളും രണ്ടു കണ്ണുകളും ഉള്പ്പെടെ ആറ് അവയവങ്ങളാണ് ദാനം ചെയ്തത്. സര്ക്കാരിന്റെ അവയവദാന പദ്ധതിയായ കെ-സോട്ടോ (കേരള സ്റ്റേറ്റ് ഓര്ഗന് ആന്ഡ് ടിഷ്യു ട്രാന്സ്പ്ലാന്റ് ഓര്ഗനൈസേഷന്) വഴിയാണ് അവയവ വിന്യാസം നടത്തിയത്.
തിരുവനന്തപുരത്തെ സ്വകാര്യ ആശുപത്രിയില്നിന്ന് ഇന്നു രാവിലെ 11.30-നാണ് ഹൃദയം ശ്രീചിത്രയില് എത്തിച്ചത്. ആഭ്യന്തര വകുപ്പ് ഗ്രീന് കോറിഡോര് ഒരുക്കിയാണ് ഹൃദയം ശ്രീചിത്രയിലെത്തിച്ചത്. ഒരു വൃക്ക തിരുവനന്തപുരം മെഡിക്കല് കോളജിലെ രോഗിക്കും ഒരു വൃക്കയും കരളും ഡാലിയ ടീച്ചര് ചികിത്സയിലിരുന്ന ആശുപത്രിയിലെ രോഗികള്ക്കും നേത്രപടലങ്ങള് തിരുവനന്തപുരം സര്ക്കാര് കണ്ണാശുപത്രിയിലെ രോഗികള്ക്കുമാണ് നല്കിയത്.
കഴിഞ്ഞ 19-നാണ് തലച്ചോറിലെ രക്തസ്രാവത്തെത്തുടര്ന്ന് ഡാലിയയെ തിരുവനന്തപുരത്തെ സ്വകാര്യ ആശുപത്രിയില് പ്രവേശിപ്പിച്ചത്. 21 നു വൈകിട്ടോടെ മസ്തിഷ്ക മരണം സ്ഥിരീകരിക്കുകയായിരുന്നു. ജലസേചന വകുപ്പില് സീനിയര് ക്ലര്ക്കായ ഭര്ത്താവ് ജെ. ശ്രീകുമാറും മക്കളായ ശ്രീദേവന്, ശ്രീദത്തന് എന്നിവരും ചേര്ന്ന് അവയവദാനത്തിന് സമ്മതം നല്കുകയായിരുന്നു.
