ടാര്സനെക്കുറിച്ച് കേള്ക്കാത്തവരായി അധികമാരും ഉണ്ടാകില്ല. കാട് അടക്കി ഭരിച്ച ഒരു കോമിക് കഥാപാത്രമാണ് ടാര്സന്. മനുഷ്യനില് നിന്നും അകന്ന് കാടിനുള്ളില് മൃഗങ്ങള്ക്കൊപ്പമാണ് ടാര്സന് ജീവിച്ചത്. കാട്ടിലെ ഏത് നിഗൂഢ വഴികളിലൂടെയും അവന് അനായാസമായി സഞ്ചരിച്ചു. എന്നാല് ഈ കഥാപാത്രം ഒരു സാങ്കല്പ്പികം മാത്രമാണ്. അതുകൊണ്ട് തന്നെ യഥാാര്ത്ഥ ജീവിതത്തില് ടാര്സനെ ആരും കണ്ടിട്ടുണ്ടാകില്ല. എന്നാല് ഇപ്പോഴിതാ ലിയോ അര്ബന് എന്ന ഇന്സ്റ്റാഗ്രാം ഉപയോക്താവിന്റെ വീഡിയോ കണ്ട് കാഴ്ചക്കാര് ചോദിക്കുന്നതും മറ്റൊന്നല്ല, അദ്ദേഹം ടാര്സന്റെ കൊച്ചുമകനാണോയെന്നാണ്. വീഡിയോയില് ഒരു മരത്തില് നിന്ന് മറ്റൊരു മരത്തിലേക്ക് ചാടുന്ന ലിയോയെയാണ് കാണുന്നത്.
ലിയോപോള്ഡ് ഹര്ബിന് എന്നാണ് ഇയാളുടെ പേര്. ഫ്രഞ്ചുകാരന്. ലിയോപോള്ഡ്, ലിയോ അര്ബന് എന്നാണ് സമൂഹ മാധ്യമങ്ങളില് അറിയപ്പെടുന്നത്. ചില ആരാധകര് അദ്ദേഹത്തെ ടാര്സന് എന്നും വിളിക്കുന്നു. ലിയോ അര്ബന്റെ ഇന്സ്റ്റാഗ്രാം പേജിലൂടെ കടന്ന് പോയ ആര്ക്കും അത്തരമൊരു സംശയമുണ്ടായാല് അതിശയിക്കാനില്ല. കൂറ്റന് മരങ്ങളില് വലിഞ്ഞ് കയറിയും മരങ്ങളില് നിന്ന് മരങ്ങളിലേക്ക് ചാടിയും കൂറ്റന് പാറകളിലേക്ക് വലിഞ്ഞ് കയറിയും തണുത്ത നദിയില് കിടക്കുന്നതുമായ നിരവധി വീഡിയോകള് പേജില് കാണാം. ഓരോ വിഡിയോയും ഏതെങ്കിലും ഒരിടത്ത് വച്ച് നിങ്ങളില് ഭയം നിറയ്ക്കുമെന്ന് ഉറപ്പ്. അത്രയേറെ അപകടം പതിയിരിക്കുന്നതാണ് ഓരോ വീഡിയോയിലും ഉള്ള കാഴ്ചകള്. 196 അടി ഉയരമുള്ള മരങ്ങളില് അദ്ദേഹം അനായാസമായി കയറും. കുരങ്ങിനെ പോലെ ഒന്നില് നിന്ന് മറ്റൊന്നിലേക്ക് ചാടി മറയും. ലിയോ ഏതാണ്ട് 20 വര്ഷമായി പാര്ക്കറും മലകയറ്റവും പരിശീലിക്കുന്നു.
90 അടി ഉയരത്തില് മരത്തില് തൂങ്ങിക്കിടക്കുന്ന ലിയോയെ വീഡിയോയില് കാണാം, പെട്ടെന്ന് കൊമ്പ് ഒടിഞ്ഞ് വീഴുന്നു. എന്നാല്, അയാള് ഉടനെ തന്നെ മറ്റൊരു മരത്തിന്റെ കൊമ്പില് മുറുകെപ്പിടിച്ച് രക്ഷപ്പെടുന്നു. അതേ വീഡിയോയില്, ഒരു കുരങ്ങിനെപ്പോലെ ഒരു മരത്തില് നിന്ന് മറ്റൊന്നിലേക്ക്, രണ്ടാമത്തെ മരത്തില് നിന്ന് മൂന്നാമത്തെ മരത്തിലേക്ക് ലിയോ ചാടുന്നു. ഇത്തരം സന്ദര്ഭങ്ങളിലെല്ലാം കൈകള് വളരെ കുറച്ച് മാത്രമേ ഉപയോഗിക്കുന്നുള്ളൂ. 'കാടിനെ മെരുക്കാനും അടുത്ത ടാര്സന് ആകാനുമുള്ള നിങ്ങളുടെ സ്വപ്നത്തില് വിശ്വസിക്കുന്നത് നിങ്ങള് ഒരിക്കലും നിര്ത്തിയില്ല.' എന്നായിരുന്നു ഒരു കാഴ്ചക്കാരന് എഴുതിയത്. 'നിങ്ങള് ഇപ്പോള് എത്തിയ ലെവല് ഭ്രാന്താണ്' എന്നായിരുന്നു മറ്റൊരു കാഴ്ചക്കാരന് കുറിച്ചത്.
