റസ്റ്ററന്റുകളില് പല തരത്തിലുള്ള വസ്ത്രങ്ങള് ധരിച്ചെത്തുന്നവരുണ്ട്. കാരണം റെസ്റ്റോറന്റുകളില് ഡ്രസ് കോഡുകള് നിര്ബന്ധമല്ല. പ്രത്യേകിച്ച് പല വിദേശ രാജ്യങ്ങളിലും, അവിടെ നമ്മുക്ക് ഇഷ്മുള്ളത് ധരിച്ചെത്താം. എന്നാല്, യുഎസ്സിലെ ഒരു റെസ്റ്റോറന്റില് ഒരു നഴ്സിനെ ഡ്രസ് കോഡിന്റെ പേര് പറഞ്ഞ് ഇറക്കിവിട്ടത്രെ. ലൂസിയാനയിലെ ബാറ്റണ് റൂജിലെ സ്റ്റാബ്സ് പ്രൈം സ്റ്റീക്ക് ആന്ഡ് സീഫുഡ് റെസ്റ്റോറന്റിലായിരുന്നു സംഭവം. വൈമൈന് മാക്കലന് എന്ന യുവതിയാണ് വസ്ത്രധാരണം അനുചിതമാണ് എന്ന പേരില് റെസ്റ്റോറന്റില് നിന്നും പഴി കേട്ടത്.
ഫ്ലോറല് ട്യൂബ് ടോപ്പും അതിന് ചേരുന്ന നീളമുള്ള പാവാടയും അടങ്ങുന്ന ടു പീസ് വസ്ത്രമാണ് ആ സമയത്ത് ലൂസിയാന ധരിച്ചിരുന്നത്. എന്നാല്, തന്നോട് ആ വസ്ത്രധാരണത്തിന്റെ പേരില് അവിടെ നിന്നും ഇറങ്ങിപ്പോകാന് പറഞ്ഞെന്നാണ് അവള് പറയുന്നത്. റെസ്റ്റോറന്റ് ഉടമകളില് ഒരാളായ ഡോറി മര്വിനോട് ഈ വിഷയത്തെ കുറിച്ച് സംസാരിക്കുന്നത് അവള് ക്യാമറയില് പകര്ത്തിയിരുന്നു. എന്തുകൊണ്ടാണ് ഈ വസ്ത്രം ധരിച്ച് തനിക്ക് റെസ്റ്റോറന്റില് വരാനാവാത്തത് എന്ന് അവള് ചോദിക്കുന്നുണ്ട്. ഈ വസ്ത്രം മുകളിലൊക്കെ ശരീരം കാണുന്ന തരത്തിലുള്ളതാണ് എന്നാണ് മര്വിന്റെ മറുപടി.
എന്നാല്, രണ്ടാഴ്ച മുമ്പ് ഇതേ വസ്ത്രം ധരിച്ച് താന് ഇതേ റെസ്റ്റോറന്റില് വന്നിരുന്നു എന്നും എന്നാല് അന്നൊന്നും അത് പ്രശ്നമായിരുന്നില്ല എന്നും അവള് പറയുന്നുണ്ട്. അന്ന് താന് റെസ്റ്റോറന്റിലില്ലായിരുന്നു അതിനാല് അതേ കുറിച്ച് പറയാന് സാധിക്കില്ലെന്നായിരുന്നു അവരുടെ മറുപടി. താന് സ്ഥിരമായി ഭക്ഷണം കഴിക്കുന്ന റെസ്റ്റോറന്റായിരുന്നു ഇതെന്നും എന്നാല് വെറും വസ്ത്രധാരണത്തിന്റെ പേരില് തന്നെ ഇറക്കിവിട്ടത് അത്ഭുതപ്പെടുത്തിയെന്നും യുവതി പറയുന്നുണ്ട്. ഇത് വിവരിക്കുന്ന ഒരു വീഡിയോയും ഫേസ്ബുക്കില് പങ്കുവച്ചിട്ടുണ്ട്.
നിരവധിപ്പേരാണ് വീഡിയോയ്ക്ക് കമന്റുകളുമായി എത്തിയത്. മിക്കവരും റെസ്റ്റോറന്റിന്റെ ഭാഗത്ത് നിന്നുണ്ടായ നടപടിയെ വിമര്ശിക്കുകയാണ് ചെയ്തത്. അതേസമയം തന്നെ നേരത്തെയും പലര്ക്കും അവിടെ അത്തരം ദുരനുഭവങ്ങളുണ്ടായതായി കമന്റുകള് പറയുന്നു. ഇത് വസ്ത്രധാരണത്തിന്റെ പേരിലുള്ളതല്ല വംശീയമായ വിവേചനമാണ് ആ റെസ്റ്റോറന്റില് നടന്നത് എന്നും പലരും ആരോപിച്ചു.
