വ്യത്യസ്തത ഉണര്ത്തുന്ന ഒട്ടനവധി വാര്ത്തകളും വീഡിയോകളുമാണ് ദിവസവും സോഷ്യല് മീഡിയയിലൂടെ വൈറലായിക്കൊണ്ടിരിക്കുന്നത്. ഇപ്പോഴിതാ മകളെ വിവാഹത്തിന് നിര്ബന്ധിച്ചതിന്റെ പേരില് ഓസ്ട്രേലിയയില് ആദ്യമായി തടവിന് വിധിക്കപ്പെടുന്ന അമ്മയുടെ വാര്ത്തയാണ് ശ്രദ്ധ നേടുന്നത്. 48 കാരിയായ സക്കീന മുഹമ്മദ് ജാന് എന്ന സ്ത്രീയാണ് തടവ് ശിക്ഷയ്ക്ക് വിധിയ്ക്കപ്പെട്ടത്. വെറും 21 വയസ്സ് മാത്രം പ്രായമുള്ള മകളെ ഇവര് നിര്ബന്ധിച്ച് വിവാഹം കഴിപ്പിക്കുകയായിരുന്നു. എന്നാല് ആദ്യ ദിനം മുതല് തന്നെ ആ ബന്ധം വഷളാവുകയും പിന്നാലെ ഭര്ത്താവ് അവളെ കൊലപ്പെടുത്തുകയുമായിരുന്നു. ഇയാളെ കൊലക്കുറ്റത്തിന് ശിക്ഷിച്ചു. പിന്നാലെയാണ് മകളെ നിര്ബന്ധിപ്പിച്ച് വിവാഹം കഴിപ്പിച്ചതിന് അമ്മയെയും വിചാരണ ചെയ്തു.
2019 ലാണ് മുഹമ്മദ് അലി ഹലീമി എന്ന 26 കാരനെ വിവാഹം കഴിക്കാന് സക്കീനയുടെ മകള് റുഖിയ ഹൈദരി നിര്ബന്ധിതയാകുന്നത്. കല്യാണം കഴിഞ്ഞ് ആറാഴ്ച കഴിഞ്ഞപ്പോള് തന്നെ റുഖിയയെ ഭര്ത്താവ് കൊലപ്പെടുത്തുകയായിരുന്നു. ഇയാളെ പിന്നീട് ജീവപര്യന്തം തടവിന് ശിക്ഷിച്ചു. 2020 ജനുവരിയിലാണ് കുറ്റകൃത്യം നടന്നതെന്നാണ് റിപ്പോര്ട്ട്. വിചാരണയ്ക്കിടെ ആദ്യമൊന്നും ജാന് കുറ്റം സമ്മതിച്ചില്ല. ഹലീമിയെ വിവാഹം കഴിക്കാന് ആഗ്രഹിക്കുന്നില്ലെന്ന് മകള് പറഞ്ഞിട്ടില്ലെന്നാണ് അവര് പറഞ്ഞിരുന്നത്. മകളുടെ മരണത്തില് ദുഃഖിതയായിരുന്നെങ്കിലും അവര് താന് നിരപരാധിയാണ് എന്ന് കാണിക്കാന് ശ്രമിച്ചു കൊണ്ടിരുന്നു. എന്നാല്, സക്കീന സാമൂഹിക സമ്മര്ദ്ദത്തിന് പിന്നാലെ മകളെ വിവാഹം കഴിക്കാന് നിര്ബന്ധിക്കുകയായിരുന്നു എന്ന് പ്രൊസിക്യൂഷന് വാദിച്ചു.
തിങ്കളാഴ്ചയാണ് സക്കീനയ്ക്ക് മൂന്ന് വര്ഷത്തെ തടവ് ശിക്ഷ വിധിച്ചത്. 2013 -ലാണ് നിര്ബന്ധിതമായി വിവാഹം കഴിപ്പിക്കുന്നതിനെതിരെയുള്ള നിയമം ഇവിടെ കൊണ്ടുവന്നത്. അതനുസരിച്ച് കുറ്റവാളിക്ക് ഏഴ് വര്ഷം വരെ തടവ് ശിക്ഷ ലഭിക്കാം. സക്കീനയുടെ വിധി പ്രഖ്യാപിക്കുന്നതിന് മുമ്പ്, അവള് തന്റെ മകളുടെ മേല് സഹിക്കാനാവാത്ത തരം സമ്മര്ദ്ദം ചെലുത്തിയിരുന്നു എന്ന് ജഡ്ജി പറഞ്ഞിരുന്നു.
