നടനും രാഷ്ട്രീയ നേതാവുമായ കൃഷ്ണകുമാറിന്റെ മകള് എന്ന നിലയിലാണ് അഹാന കൃഷ്ണകുമാറിനെ പ്രേക്ഷകര് അറിഞ്ഞു തുടങ്ങിയത്. എന്നാല് വെള്ളിത്തിരയിലെത്തിയ ശേഷം തന്റേതായ ഒരു ഐഡന്റിറ്റിയുണ്ടാക്കാന് അഹാനയ്ക്ക് കഴിഞ്ഞു. അഭിനയത്തിലൂടെ മാത്രമല്ല മ്യൂസിക്ക് ആല്ബം സംവിധാനം ചെയ്ത് സംവിധാനത്തിലും താരം തന്റെ കഴിവ് പ്രകടിപ്പിച്ചിട്ടുണ്ട്. അധികം സിനിമകളിലൊന്നും അഭിനയിക്കാത്ത താരം വെള്ളിത്തിരയിലെത്തിച്ച കഥാപാത്രങ്ങളെല്ലാം പ്രേക്ഷകപ്രീതി നേടിയതാണ്. സോഷ്യല് മീഡിയയിലും തിളങ്ങി നില്ക്കുന്ന താരമാണ് അഹാന. എല്ലാ വിശേഷങ്ങളും സന്തോഷങ്ങളും യാത്രകളും ഫോട്ടോഷൂട്ടുകളും അഹാന സോഷ്യല് മീഡിയയിലൂടെ പങ്കിടാറുണ്ട്.
ഇപ്പോഴിതാ സിനിമയില് പത്ത് വര്ഷം പൂര്ത്തിയാക്കിയ സന്തോഷം പങ്കിടുകയാണ് അഹാന കൃഷ്ണ. സിനിമകളിലെ ഭാഗങ്ങള് കോര്ത്തിണക്കിയ വിഡിയോയ്ക്കൊപ്പമാണ് അഹാനയുടെ കുറിപ്പ്. ജീവിതത്തില് സംഭവിച്ച നല്ല കാര്യങ്ങള് മറക്കാനാവാത്ത മനോഹര ഓര്മകളും മോശം കാര്യങ്ങള് തിരുത്തലിനുള്ള അവസരവുമായി മാറി എന്നാണ് താരം കുറിപ്പിലൂടെ പറഞ്ഞിരിക്കുന്നത്.
‘‘പത്ത് വര്ഷം, ഒരുപിടി നല്ല സിനിമകളും മനംനിറയെ പ്രത്യാശകളും നിറഞ്ഞ കാലം. അഭിനേത്രി എന്ന നിലയില് ഒരു ദശകം പൂര്ത്തിയാക്കിയിരിക്കുന്നു. വിശ്വസിക്കാനാവുന്നില്ല. ഈ പത്ത് വര്ഷത്തിനിടയില് ഞാന് പഠിച്ച ഏറ്റവും വലിയ പാഠങ്ങളിലൊന്ന്, ഓരോ വ്യക്തിയുടെ ജീവിതവും വ്യത്യസ്തമായ യാത്രയാണ്. ഒരു ചെറുചിരിയോടെ നിങ്ങള് മുന്നിലേക്ക് നടക്കാന് പരിശീലിക്കുന്നിടത്താണ് വിജയം എന്നതാണ്.
ഈ യാത്രയിലുടനീളം എനിക്കൊപ്പം ഉണ്ടായിരുന്നവരെ നന്ദിയോടെ ഓര്ക്കുന്നു. അതില് നല്ലതും ചീത്തയുമായ അനുഭവങ്ങള് തന്നവരുണ്ട്. നല്ല കാര്യങ്ങള് മറക്കാനാവാത്ത മനോഹര ഓര്മകളും സംതൃപ്തിയും വ്യക്തിപരമായ വളര്ച്ചയുമായി മാറി. അതേസമയം മോശം കാര്യങ്ങളാവട്ടെ കൂടുതല് പഠിക്കാനും തിരുത്തലിനുമുള്ള അവസരമൊരുക്കി. അടുത്ത പത്ത് വര്ഷത്തേക്ക് കരുതിവയ്ക്കാന് എന്തൊക്കെയുണ്ടാവുമെന്ന് നോക്കാം....’’ എന്നാണ് അഹാന കുറിച്ചിരിക്കുന്നത്.
2014ല് ഞാന് സ്റ്റീവ് ലോപ്പസ് എന്ന ചിത്രത്തിലൂടെയാണ് അഹാന മലയാള സിനിമയിലേക്ക് അരങ്ങേറ്റം കുറിച്ചത്. ഞണ്ടുകളുടെ നാട്ടില് ഒരിടവേള, ലൂക്ക, പതിനെട്ടാം പടി, പിടികിട്ടാപ്പുള്ളി, അടി എന്നിവയാണ് താരത്തിന്റെ ശ്രദ്ധിക്കപ്പെട്ട സിനിമകള്. ഒരുപാട് സിനിമകളില് അഭിനയിക്കാതെ വളരെ സെലക്ടീവായി മാത്രമാണ് അഹാന സിനിമകള് തെരഞ്ഞെടുക്കാറുള്ളത്. നാന്സി റാണി എന്ന സിനിമയാണ് അഹാനയുടെതായി ഒരുങ്ങി കൊണ്ടിരിക്കുന്നത്. സിനിമയുടെ സംവിധായകന് മനു ജെയിംസ് അന്തരിച്ചതോടെ സിനിമ പ്രതിസന്ധിയിലായിരിക്കുകയാണ്.
