തമിഴിലും മലയാളത്തിലും ഒരുപോലെ തിളങ്ങി നില്ക്കുന്ന താരമാണ് മാളവിക മേനോന്. മികച്ച കഥാപാത്രങ്ങളിലൂടെ പ്രേക്ഷകരുടെ ഇഷ്ടം നേടിയ താരം ഗ്ലാമറസ് ഫോട്ടോഷൂട്ടുകളിലൂടെയും ശ്രദ്ധിക്കപ്പെടാറുണ്ട്. ചിത്രങ്ങള്ക്ക് താഴെ പലരും നെഗറ്റീവ് കമന്റുകളും കുറിക്കാറുണ്ട്. അത്പക്ഷേ മൈന്ഡ് ചെയ്യാതെ തനിക്കിണങ്ങുന്ന ഔട്ട്ഫിറ്റുകള് ധരിച്ചാണ് താരം ഉദ്ഘാടനച്ചടങ്ങുകളിലും വേദികളിലുമൊക്കെ എത്താറുള്ളത്.
ഇപ്പോഴിതാ സോഷ്യൽ മീഡിയയിൽ വ്യാപകമായി നടക്കുന്ന സൈബർ ആക്രമണത്തെക്കുറിച്ച് തുറന്നു പറയുകയാണ് മാളവിക. സോഷ്യല് മീഡിയയ്ക്ക് നിയന്ത്രണങ്ങൾ ഇല്ലെന്നും ചിത്രങ്ങള് മോശമായി ഉപയോഗിക്കുന്നെന്നുമാണ് താരം പറഞ്ഞത്.
‘‘സൈബർ അറ്റാക്ക് എപ്പോഴും ഉണ്ടാകാറുണ്ട്. സോഷ്യല് മീഡിയയ്ക്ക് ഇത്രയും പ്രാധാന്യമുള്ള സമയമുള്ളതുകൊണ്ടാണ് ഒരു ലൈസന്സുമില്ലാതെ ആരെയും എന്തും പറയാമെന്നുള്ള നിലയിലേക്ക് കാര്യങ്ങളെത്തിയത്.ഒരു ലൈസൻസ് ഇല്ലാതെ എന്തും പറയുകയാണ്. സ്ത്രീകള്ക്ക് മാത്രമല്ല പുരുഷന്മാര്ക്കും അത്തരം ആക്രമണങ്ങള് നേരിടേണ്ടി വരുന്നുണ്ട്. നമ്മളെ നേരിട്ട് അറിയാത്ത ആളുകളായിരിക്കും ഇതൊക്കെ പറയുന്നത്. അത് മോശമായി തോന്നിയിട്ടുണ്ട്. പറയാനുള്ളത് നല്ല രീതിയില് പറയാമല്ലോ. ഒരാളെ വേദനിപ്പിച്ചുകൊണ്ടോ തരംതാഴ്ത്തിക്കൊണ്ടോ പറയേണ്ടതില്ലെന്നാണ് തോന്നിയിട്ടുള്ളത്.
യുട്യൂബ് ചാനലുകള്ക്ക് കടിഞ്ഞാണ് ഉണ്ടെങ്കില് നന്നായിരിക്കും. മോശം മുഴുവന് കേള്ക്കേണ്ടി വരുന്നത് അവര് ആരുടെ മുഖമാണ് അതില് കാണിക്കുന്നത് അവര്ക്കാണ്. മറ്റുള്ളവര് അവരെ എങ്ങനെകാണും എന്നതിനെക്കുറിച്ച് ഇവരൊന്നും ആലോചിക്കുന്നുപോലുമില്ല. ഒരു കാര്യം നന്നായി അവതരിപ്പിക്കാമല്ലോ. പേജിന് വ്യൂസ് കൂട്ടാന് അവര്ക്ക് എന്ത് കണ്ടന്റ് ആണോ ആവശ്യം അവര് അത് ഇടും.
സമൂഹമാധ്യമങ്ങൾക്ക് നിയന്ത്രണങ്ങൾ ഇല്ലാത്തതുകൊണ്ടാണ് തോന്നുന്നത് പറയുന്നത്. സോഷ്യൽ മീഡിയയിൽ ആരുടെ മുഖമാണോ പ്രദർശിപ്പിക്കുന്നത് അവർക്കാണ് വിമർശനങ്ങൾ കേൾക്കേണ്ടി വരുന്നത്, അവർക്കാണ് തെറി കിട്ടുന്നത്. ഇതൊന്നും മോശം രീതിയിൽ ചിത്രങ്ങളും വിഡിയോകളും എടുത്ത് പ്രചരിപ്പിക്കുന്നവർക്ക് അറിയില്ല. പ്രചരിപ്പിക്കുന്നവർക്കല്ല അത് നേരിടേണ്ടി വരുന്നത്. ഓരോരുത്തരും അവരവരുടെ പേജിന് വ്യൂ കിട്ടാൻ വേണ്ടി അവർക്ക് ആവശ്യമുള്ളത് പോസ്റ്റ് ചെയ്യുന്നു. എന്നാൽ കണ്ടന്റ് നല്ല രീതിയിലും ചെയ്യാം.
എന്റെ ഒപ്പമുള്ളവരോട് നേരത്തെ തന്നെ വിളിച്ചു ചോദിക്കും എന്ത് വസ്ത്രമാണ് ഇട്ടിരിക്കുന്നത് എന്ന്. ഒരിക്കൽ ഒരു പരിപാടിക്ക് പോയപ്പോൾ ഞാൻ ചുരിദാർ ആണ് ഇട്ടിരുന്നത്. അന്ന് ചില ഓണ്ലൈന് ചാനലുകള് എന്റെ കൂടെയുള്ളവരെ വിളിച്ച് ചോദിച്ചു എന്താണ് എന്റെ ഡ്രെസ്സെന്ന്. അതിന് ശേഷം അവര് പറഞ്ഞു, ഞങ്ങള് ഈ വീഡിയോ പോസ്റ്റ് ചെയ്യില്ല, കണ്ടന്റായിട്ട് ഒന്നും കിട്ടിയില്ലാന്ന്. ഇതൊക്കെ എന്ത് ചിന്താരീതിയാണ് എന്ന് ഞാൻ ചിന്തിച്ചിട്ടുണ്ട്. പോസ്റ്റ് ചെയ്തില്ലെങ്കില് പോസ്റ്റ് ചെയ്യണ്ട. എന്റെ കൂടെയുള്ളവര് അതിന് അനുസരിച്ചുള്ള മറുപടിയും കൊടുത്തു. പിന്നെ ഞാന് ആലോചിച്ചു ഞങ്ങളെ എല്ലാവരെയും വെച്ച് അവര് ജീവിക്കുന്നുണ്ടെങ്കില് ജീവിക്കട്ടെ, എനിക്ക് അതില് സന്തോഷമേയുള്ളു.
ഏതൊരു മേഖലയിലായാലും സ്പേസ് കിട്ടുക എന്നുള്ളത് സ്ത്രീകൾ എപ്പോഴും ആഗ്രഹിക്കുന്ന കാര്യമാണ്. നമുക്ക് ഇഷ്ടമുള്ളത് ചെയ്യാൻ ഒരു സ്പേസ് കിട്ടുക എന്നുള്ളതാണ് പ്രധാനം. അത് കിട്ടിയതിൽ സന്തോഷമുണ്ട്. പുരുഷന്മാരേക്കാൾ ഒട്ടും പിന്നിലല്ല സ്ത്രീകൾ. ഒരുപോലത്തെ പരിശ്രമം തന്നെയാണ് ചെയ്യുന്നത്. എന്താണോ ചെയ്യുന്നത് അത് വിജയകരമായി ചെയ്യുക എന്നുള്ളതാണ് വേണ്ടത്. അമ്മയിൽ മാറ്റം വന്നിട്ടുണ്ട്, നേതൃ നിരയിലേക്ക് സ്ത്രികൾ വരുമ്പോൾ മാറ്റം വരുന്നുണ്ട്. അനന്യ, സരയു അടക്കമുള്ള താരങ്ങൾ അമ്മയുടെ പ്രധാന സ്ഥാനങ്ങളിലുണ്ട്. അവര് അവരുടെ കര്ത്തവ്യങ്ങള് നന്നായി നിര്വഹിക്കുന്നുമുണ്ട്...’’ മാളവിക പറയുന്നു.
ഒരു ടെലിവിഷന് ചാനലിനോട് സംസാരിച്ചപ്പോഴാണ് മാളവിക മനസ്സു തുറന്നത്.
