അഭിനേത്രി, മോഡല്, റിയാലിറ്റി ഷോ ജഡ്ജ് എന്നിങ്ങനെയുള്ള മേഖലകളില് തിളങ്ങി നില്ക്കുന്ന താരമാണ് ശ്വേത മേനോന്. താരം മലയാളത്തിലാണ് തിളങ്ങി നില്ക്കുന്നതെങ്കിലും ആദ്യകാലത്ത് ബോളിവുഡിന്റെ പ്രിയതാരമായിരുന്നു. 1991 ല് അനശ്വരം എന്ന സിനിമയിലൂടെയാണ് ശ്വേത അഭിനയ രംഗത്ത് തുടക്കം കുറിക്കുന്നത്. പിന്നീട് മോഡലിംഗിലേക്ക് ശ്രദ്ധ തിരിക്കുകയും മുംബൈയിലെ അറിയപ്പെടുന്ന മോഡലായി മാറുകയും ചെയ്തു. ബോളിവുഡില് ചില സിനിമകളുടെ ഭാഗമാകുകയും ചെയ്തിരുന്നു ശ്വേത.
അതിനു ശേഷം മലയാളത്തിലേക്ക് തിരിച്ചെത്തിയ താരം പാലേരി മാണിക്യം, ഒഴിമുറി, സോള്ട്ട് ആന്റ് പെപ്പർ, രതിനിർവേദം തുടങ്ങിയ സിനിമകളിലൂടെ വലിയ ജനപ്രീതി നേടി. നിരവധി ശ്രദ്ധേയ സിനിമകളില് വേഷമിട്ട ശ്വേതയ്ക്ക് മികച്ച നടിക്കുള്ള സംസ്ഥാന പുരസ്കാരമുള്പ്പെടെ ലഭിച്ചു.
ഇപ്പോഴിതാ ഒരു ഒരു ബോളിവുഡ് സിനിമയില് അഭിനയിക്കവെയുണ്ടായ അനുഭവം പങ്കുവെക്കുകയാണ് ശ്വേത. ബോളിവുഡില് തിളങ്ങി നില്ക്കുന്ന താരങ്ങളായതിനാല് അവരുടെ പേര് പറയില്ലെന്ന് പറഞ്ഞാണ് ശ്വേത സംഭവം പറയുന്നത്.
‘‘പേര് പറയില്ല. വലിയ ബോളിവുഡ് ആക്ടേർസ് ആണ്. യുഎസില് ഒരു പടം ചെയ്യുന്നു. നായകനും നായികയുമുണ്ട്. ഞാൻ സെക്കന്റ് ലീഡ്. ഞങ്ങളെല്ലാവരും നായകന്റെ റൂമിലിരുന്ന് ഭക്ഷണം കഴിക്കുകയായിരുന്നു. അവരുടേത് കോമണ് ലാംഗ്വേജ് ആയിരുന്നു. എന്തോ നായിക പറഞ്ഞിട്ട് ഇറങ്ങിപ്പോയി. പത്ത് പതിനഞ്ച് മിനുട്ട് നായകനും പുറത്തേക്ക് പോയി. ഇവരെന്തിനാണ് പുറത്ത് പോകുന്നത്. നമ്മളല്ലേ പുറത്ത് പോകേണ്ടത്. പത്ത് പതിനഞ്ച് മിനുട്ട് കഴിഞ്ഞപ്പോള് എനിക്കും പുറത്ത് പോകണമെന്ന് തോന്നി.
പത്ത് റൂമുകള് കഴിഞ്ഞ് വലത് വശത്ത് ലിഫ്റ്റാണ്. ഞാൻ അവിടെ ചെന്ന് നോക്കുമ്പോള് രണ്ടാളും ഉമ്മ വെക്കുകയാണ്. അത് കണ്ടപ്പോള് എനിക്ക് സന്തോഷമായി. ഞാന് തിരിച്ചു പോന്നു...’’ ശ്വേത മേനോൻ പറയുന്നു. ശ്വേത പറയുന്നത് കേട്ട് അവതാരകരടക്കം പൊട്ടിച്ചിരിക്കുന്നത് കാണാം.
ബോളിവുഡ് കരിയറില് ശ്രദ്ധ കൊടുക്കാതിരുന്നതിനെക്കുറിച്ച് ശ്വേത മുന്പ് സംസാരിച്ചിട്ടുണ്ട്. ‘‘ബോളിവുഡില് എത്തിയതിന്റെ പ്രൊഫഷണല് ആറ്റിറ്റ്യൂഡ് എനിക്കുണ്ടായിരുന്നില്ല. ബോളിവുഡ് കുറേക്കൂടി ലാർജർ ദാൻ ലൈഫ് ആണ്. എനിക്ക് പിആർ ഉണ്ടായിരുന്നില്ല. ആമിർ എനിക്ക് ഒന്ന് രണ്ട് ഓഫർ ചെയ്തു. ഷാരൂഖ് ഖാനൊപ്പമുള്ള സിനിമ കണ്ഫോം ആയി. പക്ഷെ ഞാൻ പോയില്ല.
ആമിർ ഒരുപാട് സഹായിച്ചിട്ടുണ്ട്. കരിയറിനെ സീരിയസായി കാണാത്തതില് ഇവർ എന്നെ കളിയാക്കാറുണ്ട്. ബോളിവുഡില് നല്ല തുടക്കം ലഭിച്ചെങ്കിലും ഞാനത് ഗൗരവമായി എടുത്തില്ലെന്നത് ശരിയാണ്. പക്ഷെ അതില് പശ്ചാത്താപമില്ല. താൻ സന്തോഷവതിയാണ്. എന്നാല് ഇന്നാണ് ബോളിവുഡിലേക്ക്കടക്കുന്നതെങ്കില് കുറേക്കൂടി ശ്രദ്ധിച്ചേനേ...’’ ശ്വേത മേനോൻ പറഞ്ഞിരുന്നു.
ബോളിവുഡില് നിന്നും മാറി 2006 ലാണ് ശ്വേത മലയാള സിനിമയിലേക്ക് തിരിച്ചെത്തുന്നത്. തിരിച്ചെത്തിയ ആദ്യ സിനിമ തന്ത്ര ആയിരുന്നു. പിന്നീട് നിരവധി മലയാള സിനിമകളുടെ ഭാഗമായി താരം. തുടരെത്തുടരെയുള്ള സിനിമകളില് ശ്വേതയെ ഇപ്പോള് കാണുന്നില്ല. സോഷ്യല് മീഡിയ വഴിയും റിയാലിറ്റി ഷോയില് ജഡ്ജായുമൊക്കെ താരം നിറഞ്ഞു നില്ക്കുന്നുണ്ട്.
അടുത്തിടെ റിലീസ് ചെയ്ത നാഗേന്ദ്രൻസ് ഹണിമൂണ് എന്ന സീരീസില് ശ്വേത ശ്രദ്ധേയമായ വേഷം ചെയ്തിരുന്നു. മുംബൈയില് ഭർത്താവ് ശ്രീവത്സന് ജെ മേനോനും മകള്ക്കുമൊപ്പമാണ് താരം. താരത്തിന്റെ പുതിയ സിനിമകള്ക്കായി ആരാധകര് കാത്തിരിക്കുന്നുണ്ട്.
