ദളപതി വിജയ് യുടെ 33 വര്ഷം നീണ്ട ഐതിഹാസിക സിനിമാ ജീവിതത്തിന് വിരാമമിടുന്ന അവസാന ചിത്രം ജനനായകന്റെ റിലീസിനായി ആവേശത്തോടെ കാത്തിരിക്കുകയാണ് ആരാധകര് . അതിനിടെയാണ് സിനിമയുടെ സുപ്രധാന ദൃശ്യങ്ങള് കഴിഞ്ഞ ദിവസം ഓണ്ലൈനില് പ്രചരിച്ചത്. ഇതില് പ്രതികരിച്ച് നിരവധിപ്പേരാണ് രംഗത്തെത്തുന്നത്. ഇപ്പോഴിതാ സംഭവത്തില് കടുത്ത നിരാശയും പ്രതിഷേധവും രേഖപ്പെടുത്തിയിരിക്കുകയാണ് ചിത്രത്തിലെ നായിക പൂജ ഹെഗ്ഡെ.
സിനിമ ഓണ്ലൈനില് ചോര്ന്നത് ഏറെ വേദനിപ്പിക്കുന്നുവെന്നും സിനിമയിലെ ഓരോ കലാകാരന്റെയും സാങ്കേതിക പ്രവര്ത്തകന്റെയും കഠിനാധ്വാനത്തെയും ആദരവിനെയും ഹനിക്കുന്ന ഇത്തരം പ്രവൃത്തികള് കാണുന്നത് സങ്കടകരമാണെന്നും പൂജ തന്റെ ഇന്സ്റ്റഗ്രാം സ്റ്റോറിയായി കുറിച്ചു. ദളപതി വിജയ് യുടെ അവസാന ചിത്രം എന്ന നിലയില് ഈ സിനിമ തിയറ്ററില് തന്നെ കണ്ട് ആഘോഷിക്കാന് പ്രേക്ഷകര് കാത്തിരിക്കണമെന്നും നടി അഭ്യര്ഥിച്ചു.
‘എന്റെ പ്രിയപ്പെട്ട പ്രേക്ഷകര്ക്ക് , ഒരു സിനിമ എന്നത് എണ്ണമറ്റ മണിക്കൂറുകളുടെ അധ്വാനത്തിന്റെയും ക്രിയേറ്റീവ് റിസ്ക്കുകളുടെയും വ്യക്തിപരമായ ത്യാഗങ്ങളുടെയും ഫലമാണ്. ഞങ്ങളുടെ സിനിമ ഓണ്ലൈനില് ചോര്ന്നത് കാണുന്നത് എന്നെ മാത്രമല്ല, ഇതിനായി പ്രവര്ത്തിച്ച ഓരോ വ്യക്തിയെയും നിരാശപ്പെടുത്തുന്നു’ പൂജ കുറിച്ചു.
‘ഇത് നിയമവിരുദ്ധമായി പങ്കുവെക്കുന്നത് കാണുന്നത് കഠിനമാണ്. അത് കളക്ഷനെ ബാധിക്കുമെന്നത്കൊണ്ടല്ല, മറിച്ച് ഓരോ കലാകാരനും സാങ്കേതിക പ്രവര്ത്തകനും അര്ഹിക്കുന്ന ബഹുമാനത്തെ അത് ഇല്ലാതാക്കുന്നു എന്നതുകൊണ്ടാണ്. വജിയ് സാറിന്റെ അവസാന ചിത്രം വലിയ സ്ക്രീനില് ശരിയായ രീതിയില് ആഘോഷിക്കാന് നമുക്കെല്ലാവര്ക്കും അവകാശമില്ലേ, അതുകൊണ്ട് നമുക്കിത് ശരിയായ രീതിയില് കാണാം. ദയവായി കാത്തിരിക്കൂ. പൈറസിയെ പ്രോത്സാഹിപ്പിക്കാതിരിക്കുക. എങ്കില് മാത്രമേ സിനിമയും കലയും നിലനില്ക്കുകയുളളൂ’- നടി കൂട്ടിച്ചേര്ത്തു.
