വ്യത്യസ്തത ഉണര്ത്തുന്ന ഒട്ടനവധി വാര്ത്തകളാണ് ദിവസവും സോഷ്യല് മീഡിയയില് വൈറലായിക്കൊണ്ടിരിക്കുന്നത്. ഇപ്പോഴിതാ തന്റെ മുറിയില് മൂടിപ്പുതച്ച് കിടക്കുന്ന യുവാവിന്റെ അടുത്തേക്ക് ക്ഷണിക്കപ്പെടാതെ ഒരു അതിഥി കടന്നുവരുന്ന വീഡിയോയാണ് ഇപ്പോള് സോഷ്യല് മീഡിയയില് ശ്രദ്ധ നേടുന്നത്. ആ അതിഥി ആരാണന്നല്ലേ? അതൊരു ഭീമന് കരടിയായിരുന്നു. യുവാവ് ഉറങ്ങുന്നതിനിടയില് കരടി മുറിയിലേക്ക് അതിക്രമിച്ചെത്തുകയായിരുന്നു.
@Yoda4ever എന്ന യൂസറാണ് വീഡിയോ എക്സില് (ട്വിറ്റര്) ഷെയര് ചെയ്തിരിക്കുന്നത്. വീഡിയോയില് കാണുന്നത് ഒരു വീട്ടിലേക്ക് അതിക്രമിച്ച് കയറുന്ന ഒരു കരടിയെയാണ്. കരടി വാതില് തുറന്ന് അകത്ത് കയറുന്നത് മുതല് വീട്ടില് സ്ഥാപിച്ചിരിക്കുന്ന സിസിടിവി ക്യാമറയില് പതിഞ്ഞിട്ടുണ്ട്. പുറത്ത് നിന്നും കരടി നടന്നു വരുന്നതും വാതില് തുറന്ന് യാതൊരു സങ്കോചവും കൂടാതെ അകത്തേക്ക് കയറുന്നതും കാണാം. പിന്നെ കാണുന്നത് കരടി മുറിയിലേക്ക് കയറിയതാണ്.
പിന്നീട്, അവിടെ എന്താണ് ഉള്ളതെന്ന് തിരയുന്ന കരടിയെയും കാണാം. ഈ സമയത്തൊന്നും ഇവിടെ മൂടിപ്പുതച്ചുറങ്ങുകയായിരുന്ന യുവാവ് ഇതൊന്നും അറിഞ്ഞതുമില്ല, ഉണര്ന്നതുമില്ല. അകത്ത് കയറിയ കരടി മുറിയിലാകെ തകൃതിയായി തിരയുകയാണ്. ടേബിളിന്റെ അടിയിലും മുറിയിലും ആകെ കരടി പരതുന്നത് കാണാം. ആ സമയത്ത് യുവാവ് കണ്ണ് തുറന്ന് നോക്കുന്നത് കാണാം. ഉറക്കത്തില് നിന്നും പെട്ടെന്ന് ഉണര്ന്നതായതുകൊണ്ട് ആദ്യം ആള്ക്ക് കാര്യമൊന്നും മനസിലായില്ല തോന്നുന്നു. മുറിയില് കരടി കയറി എന്ന് മനസിലാക്കിയതോടെ യുവാവ് ഞെട്ടിയുണരുന്നു.
തുടര്ന്ന് യുവാവ് പുറത്ത് കടക്കാന് പോകുന്നു. അതിനിടയില് ടേബിളില് കിടക്കുന്ന തന്റെ ഫോണ് എടുക്കാന് യുവാവ് മറക്കുന്നില്ല. കരടിയും യുവാവിന്റെ പിന്നാലെ പോകുന്നുണ്ട്. കരടി പുറത്ത് കടന്ന് നോക്കുന്നതാണ് വീഡിയോയുടെ അവസാനം കാണുന്നത്. എന്തായാലും, വീഡിയോ വൈറലായി മാറി. നിരവധിപ്പേരാണ് വീഡിയോയ്ക്ക് കമന്റ് നല്കിയത്. ഉറക്കമുണരുമ്പോള് തൊട്ടടുത്ത് കരടിയെ കാണുന്നു, ഇതൊരു സ്വപ്നമാണോ അതോ യാഥാര്ത്ഥ്യമാണോ എന്ന് മനസിലാകാത്ത അവസ്ഥ ഒന്ന് ആലോചിച്ച് നോക്കൂ എന്നാണ് ഒരാള് കമന്റ് നല്കിയിരിക്കുന്നത്.
He almost lost his phone..wait for it..🐻📱🤦😏😅 pic.twitter.com/ZJpvP5DLoP
— 𝕐o̴g̴ (@Yoda4ever) August 26, 2024
