ഹരിപ്പാട്: പ്രസവശേഷം യുവതിക്കു കലശലായ വയറുവേദന ഉണ്ടായതിനെത്തുടര്ന്നു നടത്തിയ പരിശോധനയില് വയറിനുള്ളില് കത്രിക കണ്ടെത്തി. സ്വകാര്യ ആശുപത്രിക്കെതിരേ യുവതിയുടെ ഭര്ത്താവ് പരാതി നല്കി. താമല്ലാക്കല് സ്വദേശിനിയുടെ പ്രസവാനന്തര ശസ്ത്രക്രിയ്ക്കിടെയാണ് കത്രിക വയറ്റില് കുടുങ്ങിയത്. കരുവാറ്റ ദീപ ആശുപത്രിയില് കഴിഞ്ഞ രണ്ടിനായിരുന്നു ശസ്ത്രക്രിയ.
ഒരാഴ്ചയ്ക്കുശേഷം വീട്ടിലേക്കു മടങ്ങി. പിന്നീട് തുന്നല് എടുക്കുകയും ചെയ്തു. 15 ന് അസഹ്യമായ വേദനയുമായി യുവതി അതേ ആശുപത്രിയിലെത്തി. സ്കാന് ചെയ്തു റിപ്പോര്ട്ട് പരിശോധിച്ചശേഷം കുഴപ്പമില്ലെന്നു പറഞ്ഞു തിരിച്ചയച്ചതായി ഭര്ത്താവ് പറയുന്നു. അന്നു വൈകിട്ടുതന്നെ മെഡിക്കല് കോളജ് ആശുപത്രിയില് ചികിത്സ തേടി. ഇവിടെ നടത്തിയ പരിശോധനയിലാണ് കത്രിക കുടുങ്ങിയിട്ടുണ്ടെന്നു കണ്ടെത്തിയത്.
അടുത്ത ദിവസം ശസ്ത്രക്രിയ നടത്തി കത്രിക പുറത്തെടുത്തു. വയറ്റില് ഗുരുതരമായ അണുബാധയുണ്ടായിരുന്നു. കത്രിക പുറത്തെടുക്കാന് വൈകിയിരുന്നെങ്കില് ജീവന് അപകടത്തിലാകുമായിരുന്നു. പുറത്തെടുത്ത കത്രിക മെഡിക്കല് കോളജില് സൂക്ഷിച്ചിരിക്കുകയാണ്. പോലീസ് അന്വേഷണം വരുമ്പോള് കൈമാറുമെന്ന് അധികൃതര് യുവതിയുടെ ബന്ധുക്കളെ അറിയിച്ചിട്ടുണ്ട്. ജില്ലാ പോലീസ് മേധാവിക്കും ജില്ലാ മെഡിക്കല് ഓഫീസര്ക്കുമാണു യുവതിയുടെ ഭര്ത്താവ് പരാതി നല്കിയിരിക്കുന്നത്. സംഭവത്തില് ഡോ.വിജയകുമാറിനെതിരേ പോലീസ് കേസെടുത്തു.
* വയറ്റില് രക്തവും മാലിന്യങ്ങളും
ഹരിപ്പാട്: പ്രസവ ശസ്ത്രക്രിയയില് പിഴവുണ്ടായതായി പരാതി. ചെങ്ങന്നൂര് ആല സ്വദേശിയായ 28 വയസുകാരിയുടെ മാതാവാണ് ചികിത്സാപ്പിഴവ് ചൂണ്ടിക്കാട്ടി ഹരിപ്പാട് പോലീസിലും ജില്ലാ മെഡിക്കല് ഓഫീസര്ക്കും പരാതി നല്കിയത്. ഹരിപ്പാട് താലൂക്ക് ആശുപത്രിയില് ചെയ്ത പ്രസവ ശസ്ത്രക്രിയയ്ക്കുശേഷം യുവതിയുടെ വയറ്റില് രക്തവും മാലിന്യങ്ങളും അടിഞ്ഞുകൂടി ആരോഗ്യപ്രശ്നങ്ങള് ഉണ്ടായാതായാണ് പരാതി.
പ്രസവ വേദനയെത്തുടര്ന്നു യുവതിയെ വീട്ടുകാര് കഴിഞ്ഞ മാസം 23 നു രാത്രി 11 നു ഹരിപ്പാട് താലൂക്ക് ആശുപത്രിയില് എത്തിക്കുകയും 24 നു പുലര്ച്ചെ ശസ്ത്രക്രിയയിലൂടെ കുട്ടിയെ പുറത്തെടുക്കുകയും ചെയ്തു. മൂന്നു ദിവസം കഴിഞ്ഞപ്പോള് യുവതിയുടെ ശരീരമാസകലം നീരുവന്നു വീര്ത്തു. 27 ന് ആലപ്പുഴ മെഡിക്കല് കോളജ് ആശുപത്രിയില് പ്രവേശിപ്പിച്ചു.
പിന്നീടു നടത്തിയ പരിശോധനയില് വയറിനുള്ളില് രക്തവും മാലിന്യങ്ങളും അടിഞ്ഞുകിടക്കുന്നതായി കണ്ടെത്തി. യുവതിയുടെ ആരോഗ്യനില വഷളായതിനെത്തുടര്ന്ന് തീവ്ര പരിചരണ വിഭാഗത്തില് ചികിത്സ തുടര്ന്നു. കഴിഞ്ഞ എട്ടിനു വീണ്ടും ശസ്ത്രക്രിയ നടത്തി വയറ്റില് അടിഞ്ഞുകൂടിയ രക്തവും മാലിന്യങ്ങളും നീക്കം ചെയ്യുകയായിരുന്നെന്നും പരാതിയില് പറയുന്നു.
മാവേലിക്കര ജില്ലാ ആശുപത്രിയിലുണ്ടായിരുന്ന ഗൈനക്കോളജിസ്റ്റ് സ്ഥലംമാറ്റത്തെത്തുടര്ന്നു ഹരിപ്പാട് താലൂക്ക് ആശുപത്രിയിലെത്തിയപ്പോഴാണ് യുവതിയുടെ ചികിത്സ ഹരിപ്പാട്ടേക്കു മാറ്റിയത്. ഹരിപ്പാട് പോലീസ് കേസ് രജിസ്റ്റര് ചെയ്തു.
