ജീവിക്കാനായി മറ്റുള്ളവളരെ പറ്റിച്ച് വരുമാനം കണ്ടെത്തുന്ന നിരവധി ആളുകളുണ്ട് നമ്മുക്കു ചുറ്റും. ഇതിനായി എന്ത് തട്ടിപ്പുകള് നടത്താനും ആളുകള്ക്ക് മടിയില്ല. ആളുകളുടെ കയ്യില് നിന്നും യാതൊരു മനസാക്ഷിക്കുത്തുമില്ലാതെ കാശും പറ്റിച്ച് മുങ്ങി നടക്കുന്ന എത്രയോ പേരുണ്ടിന്ന്. പാവപ്പെട്ട ഒട്ടനവധി ആളുകളാണ് ഇത്തരം തട്ടിപ്പുകളില് വീണുപോകുന്നത്. അതുപോലെ ഒരു സംഭവമാണ് മധ്യപ്രദേശിലും നടന്നിരിക്കുന്നത്.
മധ്യപ്രദേശിലെ ഛത്തര്പൂരില് ഭയ്യാറാം പാല് എന്ന എഴുപതുകാരനായ കര്ഷകനാണ് ഈ തട്ടിപ്പിന് ഇരയായി മാറിയത്. അദ്ദേഹം തന്റെ വീടിനടുത്ത് എരുമയെ മേയ്ക്കുകയായിരുന്നു. അപ്പോഴാണ് അവിടെ ഒരു മരത്തിന്റെ ചുവട്ടിലിരിക്കുകയായിരുന്ന കുറച്ചുപേര് അയാളെ അടുത്ത് വിളിച്ചത്. ഭയ്യാറാം അടുത്തെത്തിയപ്പോള്, അവര് വളരെ സ്നേഹത്തോടെയും ദയവോടെയുമാണ് സംസാരിച്ചത്. സൗജന്യമായി ഗുട്ട്ഖ നല്കുകയും ചെയ്തു. പിന്നീട്, എങ്ങനെയാണ് തങ്ങള്ക്ക് വലിയ വലിയ സമ്മാനങ്ങള് ലഭിച്ചത് എന്നും അങ്ങനെ ലഭിക്കാന് എന്താണ് ചെയ്യേണ്ടത് എന്നും പറഞ്ഞു.
സമീപത്തിരിക്കുന്ന പെട്ടികള് കാണിച്ചുകൊണ്ട് അതില് ഒന്നില് മോട്ടോര്സൈക്കിള് ആണെന്നും മറ്റൊന്നില് റെഫ്രിജറേറ്ററാണെന്നും മറ്റും ആ പാവപ്പെട്ട കര്ഷകനെ വിശ്വസിപ്പിക്കുകയും ചെയ്തു. അത് തുറക്കുന്നതിന് വേണ്ടി കാശ് എടുത്തുകൊണ്ടുവരാനും പറഞ്ഞു. അങ്ങനെ 9,000 രൂപയാണ് കര്ഷകന് വീട്ടില് പോയി എടുത്തുകൊണ്ടുവന്നത്. അത് തട്ടിപ്പുകാര്ക്ക് നല്കുകയും ചെയ്തു. പിന്നാലെ, പെട്ടി തുറന്നപ്പോള് അതില് കണ്ടത് രണ്ടുമൂന്ന് തുണികളാണ്. ആ സമയം കൊണ്ട് തട്ടിപ്പുകാര് സ്ഥലം വിടുകയും ചെയ്തിരുന്നു.
അവര് ഭയ്യാറാമിനോട് പേര് പോലും ചോദിച്ചിരുന്നില്ല. അപ്പോഴാണ് താന് പറ്റിക്കപ്പെട്ടതായി അയാള്ക്ക് മനസിലാവുന്നത്. തന്റെ കൃഷിക്ക് വേണ്ടി താന് വച്ചിരുന്ന പണമാണ് നഷ്ടപ്പെട്ടത് എന്നാണ് ഭയ്യാറാം പറയുന്നത്. അതില് വലിയ വേദനയിലാണ് അദ്ദേഹം. മോട്ടോര്സൈക്കിള് കിട്ടുമെന്ന വിശ്വാസം കൊണ്ടാണ് വലിയ തുക നഷ്ടപ്പെട്ടത്. താന് രണ്ടു ദിവസമായി ഉറങ്ങുകയോ ഭക്ഷണം കഴിക്കുകയോ ചെയ്തിട്ടില്ല. താനോ പറ്റിക്കപ്പെട്ടു. ഇനി മറ്റൊരാളും അങ്ങനെ പറ്റിക്കപ്പെടരുത് എന്ന് കരുതി മറ്റുള്ളവര്ക്ക് ഇത്തരം ചതികളില് പെടരുത് എന്ന് മുന്നറിയിപ്പ് നല്കുകയാണ് ഭയ്യാറാം.
