കൊച്ചി: ഗുണ്ടാ നേതാവ് ഓം പ്രകാശ് പ്രതിയായ ലഹരി കേസിലെ റിമാന്ഡ് റിപ്പോര്ട്ടില് പേര് വന്നതിനു പിന്നാലെ ആദ്യ പ്രതികരണവുമായി പ്രയാഗ മാര്ട്ടിന്. കേസില് പോലീസ് അന്വേഷണം നടക്കുന്നതിനിടെയാണു ഹ..ഹാ.ഹി..ഹു! എന്നു പ്രയാഗ മാര്ട്ടിന് ഇന്സ്റ്റഗ്രാം സ്റ്റോറിയിട്ടത്. ഓം പ്രകാശ് എന്ന വ്യക്തിയെ നേരിട്ടോ അല്ലാതെയോ തനിക്കു പരിചയമില്ലെന്നും ഹോട്ടലില് പോയെങ്കിലും ഓം പ്രകാശിനെ കണ്ടിട്ടില്ലെന്നും പ്രയാഗ പറഞ്ഞു.
സുഹൃത്തുക്കളോടൊപ്പം അവരുടെ സുഹൃത്തുക്കളെ സന്ദര്ശിക്കാനാണു ഹോട്ടലില് പോയത്, ആ സുഹൃത്തുക്കളുടെ പേരോ പശ്ചാത്തലമോ അന്വേഷിക്കേണ്ട കാര്യം തനിക്കില്ല. അവിടെ വച്ച് ഓം പ്രകാശിനെ കാണുകയോ സംസാരിക്കുകയോ ചെയ്തിട്ടില്ല. ഒരു ഉദ്ഘാടനച്ചടങ്ങ് ഉളളതിനാല് ഏഴിനുതന്നെ അവിടെനിന്നു മടങ്ങിയെന്നും പ്രയാഗ പറയുന്നു.
തന്റെ ജീവിതം തനിക്ക് ഇഷ്ടമുള്ളതുപോലെ ജീവിക്കാനുള്ളതാണ്. അതിനെപ്പറ്റി മറ്റുള്ളവര് പറയുന്ന അഭിപ്രായങ്ങള് ചെവിക്കൊള്ളാറില്ല. എന്നാല്, തന്നെപ്പറ്റി വാസ്തവവിരുദ്ധമായ കാര്യങ്ങള് പ്രചരിക്കുന്നതു കേട്ടു മിണ്ടാതിരിക്കാന് കഴിയില്ലെന്നും സാമൂഹിക മാധ്യമങ്ങളില് പ്രചരിക്കുന്ന വാര്ത്തകളില് ഒരു അടിസ്ഥാനവുമില്ലെന്നും പ്രയാഗ മാര്ട്ടിന് പറഞ്ഞു.
കഴിഞ്ഞ ഏഴിനു കോഴിക്കോടുനിന്നു നാലരയ്ക്ക് എത്തി ഒരു ഉറക്കം കഴിഞ്ഞ് എണീറ്റ് ഒരു കോള് എടുത്ത ഓര്മ്മയേ ഉള്ളൂ. അപ്പോഴാണ് എന്റെ അടുത്ത് ഈ ഓം പ്രകാശ് എന്ന ആളെ പറ്റി ഇങ്ങനെ കേള്ക്കുന്നുണ്ടല്ലോ എന്നു പറഞ്ഞത്. ഇത് എനിക്ക് എന്താണെന്ന് അറിയില്ല, എനിക്ക് പുള്ളിക്കാരനെയും അറിയില്ല. സോഷ്യല് മീഡിയ സോഷ്യല് മീഡിയയുടെതായിട്ടുള്ള കഥകള് മെനഞ്ഞ് ഉണ്ടാക്കിയെടുക്കും. അത് ഞാന് സമ്മതിച്ചുകൊടുക്കേണ്ട കാര്യമില്ല.
ഓം പ്രകാശ് എന്ന ആളിനെ എനിക്ക് അറിയില്ല. ആ പേര് ഞാന് കേള്ക്കുന്നത് ഒരാള് എന്നെ വിളിച്ചു ചോദിച്ചപ്പോഴാണ്. എന്റെ സുഹൃത്തുക്കളുമായിട്ട് അവരുടെ സുഹൃത്തുക്കളെ കാണാനാണു ഞാന് ക്രൗണ് പ്ലാസയില് പോയതെന്നും നടി പറഞ്ഞു.
