ആലപ്പുഴ: ഓണ്ലൈന് വഴി പേഴ്സണല് ലോണ് വാഗ്ദാനം ചെയ്ത് ആള്മാറാട്ടം നടത്തി 64,000 രൂപ തട്ടിയെടുത്ത കേസില് ഒരാള് കൂടി അറസ്റ്റിലായി. തമിഴ്നാട് ചെന്നൈ തിരുവള്ളൂര് സ്വദേശിയായ ഭരത്കുമാര് മണിവണ്ണനാ(32)ണ് അറസ്റ്റിലായത്. മാവേലിക്കര സ്വദേശിയായ യുവതിയുടെ പരാതിയില് ഒരു വര്ഷം മുമ്പ് രജിസ്റ്റര് ചെയ്ത കേസിലാണ് അറസ്റ്റ്.
ഈ കേസില് തമിഴ്നാട് സ്വദേശികളായ മുത്തുരാജ്, ക്രിസ്റ്റഫര്, രാമപ്രസാദ് എന്നിവരെ നേരത്തെ ആലപ്പുഴ സൈബര് ക്രൈം പോലീസ് അറസ്റ്റ് ചെയ്തിരുന്നു. പ്രതിയുടെ ബാങ്ക് അക്കൗണ്ടിലൂടെ 8.3 കോടിയുടെ ട്രാന്സാക്ഷനാണ് ചുരുങ്ങിയ ദിവസങ്ങള് കൊണ്ട് നടന്നത്.
ലോണ് നല്കുന്ന കമ്പനിയുടെ എക്സിക്യൂട്ടീവ് ആണെന്ന് തെറ്റിദ്ധരിപ്പിച്ച് സോഷ്യല് മീഡിയയിലൂടെ പരസ്യം കണ്ടതിനെത്തുടര്ന്ന് ബന്ധപ്പെടുകയും തുടര്ന്ന് പരാതിക്കാരിയെ വാട്സ്ആപ്പ് നമ്പറിലൂടെ ആശയവിനിമയം നടത്തി വിശ്വസിപ്പിച്ചാണ് പണം പ്രതിയുടെ അക്കൗണ്ടിലേക്ക് വാങ്ങിയത്. വീട് പണിയുന്നതിന് അനുവദിച്ച് കിട്ടിയ പണത്തില് ഒരു ലക്ഷം രൂപ കൂടി ആവശ്യമായി വരികയും ഈ തുക ലോണിലൂടെ എടുക്കാനാണ് 64,000 രൂപ പ്രതികളുടെ അക്കൗണ്ടിലേക്ക് പരാതിക്കാരി അയച്ചു നല്കിയത്.
ലോണ് തുക ബ്ലോക്ക് ആയി പോകാതിരിക്കാനാണ് ഇത്രയും തുക ആവശ്യപ്പെടുന്നതെന്ന് ധരിപ്പിച്ചാണ് പ്രതികള് പരാതിക്കാരിയെ കബളിപ്പിച്ചത്. ആലപ്പുഴ ജില്ലാ പോലീസ് മേധാവി എം.പി മോഹനചന്ദ്രന്റെ നിര്ദ്ദേശാനുസരണം ആലപ്പുഴ ഡി.സി.ആര്.ബി ഡെപ്യൂട്ടി പോലീസ് സൂപ്രണ്ട് സജിമോന്റെ മേല്നോട്ടത്തില് ആലപ്പുഴ സൈബര് ക്രൈം പോലീസ് സ്റ്റേഷന് ഇന്സ്പെക്ടര് ഏലിയാസ് പി. ജോര്ജ്, എസ്.ഐ ശരത്ചന്ദ്രന് വി.എസ്, സി.പി.ഒമാരായ റികാസ് കെ, ജേക്കബ് സേവ്യര്, സുമേഷ് എന്നിവര് ചെന്നൈയിലെത്തി നടത്തിയ അന്വേഷണത്തിലാണ് പ്രതിയെ ചെന്നൈ പുഴല് എന്ന സ്ഥലത്ത് നിന്നും പിടികൂടിയത്.
പ്രതിയുടെ ബാങ്ക് അക്കൗണ്ട് വിവരം പരിശോധിച്ചതില് നിരവധി ആളുകളെ ഇത്തരത്തില് കബളിപ്പിക്കാനായി ഈ ബാങ്ക് അക്കൗണ്ട് ഉപയോഗിച്ചതായി തെളിഞ്ഞു. ഈ കേസിലേക്ക് സോഷ്യല് മീഡിയ വഴി ബന്ധപ്പെട്ട പ്രതികളെയും വ്യാജമായി സോഷ്യല് മീഡിയ വഴി ലോണ് നല്കാനായി പരസ്യം നല്കിയവരെയും ഇനി അറസ്റ്റ് ചെയ്യാനുണ്ട്. ഇവര്ക്കു വേണ്ടിയുള്ള അന്വേഷണം ഊര്ജിതമാണെന്നും ഉടന് പിടിയിലാകുമെന്നും പോലീസ് അറിയിച്ചു.
