ന്യൂഡല്ഹി: ഗര്ഭിണിയാണെന്നും കുഞ്ഞിനെ ഗര്ഭഛിദ്രം ചെയ്യണമെന്നും ആവശ്യവുമായി സമീപിച്ച 19 കാരിയെ കാമുകനും രണ്ടു സഹായികളും ചേര്ന്ന് കൊന്നു കുഴിച്ചുമൂടി. കൗമാരക്കാരി കാമുകനെ വിവാഹം കഴിക്കണമെന്ന് വാശിപിടിക്കുകയും ചെയ്തതായിട്ടാണ് റിപ്പോര്ട്ടുകള്. പടിഞ്ഞാറന് ഡല്ഹിയിലെ നംഗ്ലോയില് താമസക്കാരിയായ സോണിയാണ് കൊല്ലപ്പെട്ടത്.
പടിഞ്ഞാറന് ഡല്ഹിയിലെ നംഗ്ലോയില് താമസക്കാരിയായ സോണി സോഷ്യല് മീഡിയയില് വളരെ സജീവമായിരുന്നു. 6000 ലധികം ഫോളോവേഴ്സുള്ള അവര് തന്റെയും കാമുകന് സഞ്ജു എന്ന സലീമിന്റെയും നിരവധി ഫോട്ടോകളും വീഡിയോകളും പോസ്റ്റ് ചെയ്തിരുന്നു. സോണി ഒരു പുതിയ സുഹൃത്തിനെ ഉണ്ടാക്കിയതായി തങ്ങള്ക്ക് അറിയാമായിരുന്നുവെന്നും ആരോടാണ് സംസാരിക്കുന്നതെന്ന് ചോദിക്കുമ്പോള് അത് പ്രേതമാണെന്ന് കൗമാരക്കാരി പറയുമായിരുന്നുവെന്നും സോണിയുടെ കുടുംബാംഗങ്ങള് പറഞ്ഞു.
സോണി ഏഴുമാസം ഗര്ഭിണിയാണെന്നും സലീമിനെ വിവാഹം കഴിക്കാന് നിര്ബന്ധം പിടിക്കുകയും ചെയ്തെന്നും എന്നാല് സലീം അതിന് തയ്യാറായില്ലെന്നും പോലീസ് പറഞ്ഞു. തുടര്ന്ന് കുട്ടിയെ ഗര്ഭഛിദ്രം ചെയ്യാനും സോണി സലീമിനോട് ആവശ്യപ്പെട്ടതായി പോലീസ് ഉദ്യോഗസ്ഥര് പറഞ്ഞു. ഇതേച്ചൊല്ലി ഇരുവരും പിന്നീട് വഴക്കായി. തിങ്കളാഴ്ച സോണി വീട്ടില് നിന്ന് കുറച്ച് സാധനങ്ങള് എടുത്ത് സലീമിനെ കാണാന് പോയി. തുടര്ന്ന് സലീമും രണ്ട് സഹായികളും സോണിയെ ഹരിയാനയിലെ റോഹ്തക്കിലേക്ക് കൊണ്ടുപോയി.
അവിടെ വെച്ച് കൊന്ന് മൃതദേഹം കുഴിച്ചിട്ടു. സംഭവത്തില് സലീമും സഹായികളില് ഒരാളും അറസ്റ്റിലായിട്ടുണ്ട്. മറ്റൊരാള് ഒളിവിലാണെന്നും ഇയാളെ കണ്ടെത്താനുള്ള ശ്രമങ്ങള് തുടരുകയാണെന്നും പോലീസ് പറഞ്ഞു.
