ബെംഗളൂരു: ആരാധകനെ മര്ദ്ദിച്ച് കൊലപ്പെടുത്തിയ കേസില് ജയിലില് കിടക്കുന്ന കന്നഡ സിനിമാ താരം ദര്ശന് തഗുദീപയ്ക്ക് ആറാഴ്ചത്തേക്ക് ഇടക്കാല ജാമ്യം. കര്ണാടകാ ഹൈക്കോടതിയാണ് ജാമ്യം നല്കിയത്. ആരോഗ്യപ്രശ്നമുണ്ടെന്നും ചികിത്സവേണമെന്നും ആവശ്യപ്പെട്ട സാഹചര്യത്തില് കര്ശനമായ ഉപാധികളോടെയാണ് ജാമ്യം നല്കിയിരിക്കുന്നത്.
രണ്ട് കാലുകളിലും മരവിപ്പ് അനുഭവപ്പെടുന്നുണ്ടെന്നും ശസ്ത്രക്രിയ വേണമെന്നും 47 കാരനായ താരം ഹര്ജിയില് ചൂണ്ടിക്കാട്ടിയിരുന്നു. തന്റെ സുഹൃത്തും നടിയുമായ പവിത്ര ഗൗഡയ്ക്ക് അശ്ലീല സന്ദേശം അയച്ചുവെന്നാരോപിച്ച് ദര്ശനും കൂട്ടാളികളും ചേര്ന്ന് ആരാധകരില് ഒരാളെ കൊലപ്പെടുത്തിയ കേസിലാണ് നടന് ജയിലിലായത്. ദര്ശന് തന്റെ പാസ്പോര്ട്ട് സറണ്ടര് ചെയ്യണമെന്നും ഏഴ് ദിവസത്തിനകം താന് തിരഞ്ഞെടുത്ത ആശുപത്രിയില് ചികിത്സയുടെ വിശദാംശങ്ങള് നല്കണമെന്നും ജസ്റ്റിസ് എസ് വിശ്വജിത്ത് ഷെട്ടി പറഞ്ഞു.
ചൊവ്വാഴ്ച മൈസൂരിലെ സ്വകാര്യ ആശുപത്രിയില് ശസ്ത്രക്രിയ നടത്തുന്നതിന് അനുമതി നല്കണമെന്ന് അഭിഭാഷകന് കോടതിയില് അപേക്ഷിച്ചു. അദ്ദേഹത്തിന്റെ അപേക്ഷയെ പബ്ലിക് പ്രോസിക്യൂട്ടര് എതിര്ത്തു, ദര്ശനെ എത്ര ദിവസം ആശുപത്രിയില് പ്രവേശിപ്പിക്കണമെന്ന് മെഡിക്കല് രേഖകളില് വ്യക്തമാക്കിയിട്ടില്ലെന്നും ശസ്ത്രക്രിയ സര്ക്കാര് ആശുപത്രിയില് നടത്താമെന്നും വാദിച്ചു.
ജൂണ് 11 ന് പവിത്ര ഗൗഡയ്ക്കും മറ്റ് 15 പേര്ക്കുമൊപ്പം ബംഗളൂരുവില് തന്റെ ആരാധകരിലൊരാളായ രേണുകസ്വാമിയെ ക്രൂരമായി മര്ദിച്ച് കൊലപ്പെടുത്തിയ കേസിലാണ് അറസ്റ്റ്. ജൂണ് 9 ന് ബെംഗളൂരുവിലെ ഒരു അപ്പാര്ട്ട്മെന്റിന് സമീപമുള്ള കാട്ടില് മൃതദേഹം കണ്ടെത്തി.
സെപ്തംബറില്, ദര്ശനും ഗൗഡയും ഉള്പ്പെടെ കേസില് ഉള്പ്പെട്ട 17 പേര്ക്കെതിരെ 3,991 പേജുകളുള്ള സമഗ്രമായ കുറ്റപത്രം ബെംഗളൂരു പോലീസ് സമര്പ്പിച്ചു. പരപ്പന അഗ്രഹാര സെന്ട്രല് ജയിലില് മറ്റ് മൂന്ന് പേര്ക്കൊപ്പം കറങ്ങിനടക്കുന്ന ഫോട്ടോകള് ഓഗസ്റ്റില് ഓണ്ലൈനില് പുറത്തുവന്നതിനെത്തുടര്ന്ന് ദര്ശനെ ബല്ലാരി ജയിലിലേക്ക് മാറ്റി.
