കോട്ടയം: ഉപതെരഞ്ഞെടുപ്പില് ക്രൈസ്തവ കേന്ദ്രങ്ങളില് ബി.ജെ.പി. വോട്ട് വിഹിതം വര്ധിപ്പിച്ചതു യു.ഡി.എഫിനും എല്.ഡി.എഫിനും ഒരുപോലെ തലവേദന സൃഷ്ടിക്കും. വഖഫ് വിഷയം ക്രൈസ്തവ മേഖലകളില് സ്വാധീനം സൃഷ്ടിച്ചിട്ടുണ്ടാകുമെന്നാണ് ഇരു മുന്നണികളുടെയും വിലയിരുത്തല്.
ഉപതെരഞ്ഞെടുപ്പില് ബി.ജെ.പി. പ്രതീക്ഷ പുലര്ത്തിയിരുന്ന പാലക്കാട് കനത്ത തോല്വിയാണ് ഏറ്റുവാങ്ങേണ്ടി വന്നതെങ്കിലും പാലക്കാട് നഗരസഭയില് ബി.ജെ.പി മുന്നിലെത്തിയ രണ്ട് കേന്ദ്രങ്ങള് ക്രൈസ്തവ വിഭാഗത്തിനു താരതമ്യേന വോട്ട് കൂടുതലുള്ള സ്ഥലങ്ങളാണ്. ക്രിസ്ത്യന് വിഭാഗങ്ങള് ഏറ്റവും കൂടുതലുള്ള വയനാട് ലോകസഭാ മണ്ഡലത്തില് പോളിങ് ശതമാനം കഴിഞ്ഞ തവണത്തേക്കാള് പത്ത് ശതമാനം കുറഞ്ഞിട്ടും ബി.ജെ.പിക്കു 1.5 ശതമാനം വോട്ട് മാത്രമാണ് കുറഞ്ഞത്. ഇത്തവണ 11.46 ശതമാനം വോട്ടാണ് ബി.ജെ.പി. സ്ഥാനാര്ഥിയായിരുന്ന നവ്യ ഹരിദാസിന് ലഭിച്ചത്്. ക്രൈസ്തവ കുടിയേറ്റ മേഖലയായ മുള്ളന്കൊല്ലിയില് 23 ബൂത്തുകളില് എന്.ഡി.എ. രണ്ടാം സ്ഥാനത്ത് എത്തി. ഈ ബൂത്തുകളില് കഴിഞ്ഞ തവണ ഇടതു മുന്നണിക്കായിരുന്നു രണ്ടാം സ്ഥാനം. ക്രിസ്ത്യന് വിഭാഗത്തിന് ഏറെ സ്വാധീനമുള്ള ബത്തേരി നിയമസഭാ മണ്ഡലത്തില് ഇടതുമുന്നണിയും എന്.ഡി.എയും തമ്മിലുള്ള വിത്യാസം 2546 വോട്ട് മാത്രമാണ്.
ചേലക്കരയിലെ ബി.ജെ.പിയുടെ വോട്ട് വര്ധന യു.ഡി.എഫിനും എല്.ഡി.എഫിനും ഒരുപോലെ പ്രതിസന്ധി സൃഷ്ടിക്കുന്നതാണ്. ഇത്തവണ എന്.ഡി.എ. സ്ഥാനാര്ഥിയായിരുന്ന കെ.ബാലകൃഷ്ണന് 33,609 വോട്ടാണു ലഭിച്ചത്. കഴിഞ്ഞ തെരഞ്ഞെടുപ്പില് ഇത് 24,045 വോട്ടായിരുന്നു. കഴിഞ്ഞ തെരഞ്ഞെടുപ്പിനേക്കാള് 5.81 ശതമാനം വോട്ടിന്റെ വര്ധന. ഈ വോട്ടുകള് പ്രധാനമായും വര്ധിച്ചതു ക്രൈസ്തവ മേഖലകളിലാണ്. മുനമ്പം വിഷയവുമായി ബന്ധപ്പെട്ട് ക്രൈസ്തവ വിഭാഗങ്ങള്ക്കുണ്ടായ ആശങ്കയില് ആദ്യം ഇടപെട്ടത് ബി.ജെ.പി. നേതൃത്വമായിരുന്നു. സംസ്ഥാനത്തെ ക്രൈസ്തവ വിഭാഗങ്ങള്ക്കിടയില് ബി.ജെ.പിയുടെ സ്വാധീനം ഉറപ്പിക്കുന്നതിനു ഷോണ് ജോര്ജിനു പ്രത്യേക ചുമതല നല്കി ബി.ജെ.പി. ദേശീയ നേതൃത്വം രംഗത്തിറക്കിയിരുന്നു. തുടക്കത്തില് നിര്ജീവമായിരുന്ന ക്രൈസ്തവ സഭാ നേതൃത്വങ്ങള് സമരരംഗത്തേക്കു വരുന്നതിന് ഷോണ് ജോര്ജിന്റെ ഇടപെടല് സഹായിച്ചുവെന്ന പൊതു വിലയിരുത്തലാണ് ബി.ജെ.പി. ദേശീയ, സംസ്ഥാന നേൃത്വങ്ങള്ക്കുള്ളത്.
വഖഫ് വിഷയത്തിന്റെ പേരില് ക്രൈസ്തവ വിശ്വാസികള് ബി.ജെ.പിയിലേക്കു കൂടുതല് അടുക്കുമെന്ന് വ്യക്തമായതോടെയാണു മുസ്ലീം ലീഗ് നേതൃത്വത്തെ സമരരംഗത്തുള്ള സഭാ നേതൃത്വവുമായി ചര്ച്ച നടത്താന് യു.ഡി.എഫ് നേതൃത്വം നിയോഗിച്ചത്. മാത്രമല്ല വഖഫ് വിഷയത്തില് സംസ്ഥാനത്തെ ഭരണ, പ്രതിപക്ഷങ്ങള് ഒറ്റക്കെട്ടായാണ് നിയമസഭയില് പ്രമേയം പാസാക്കിയതെന്ന ബി.ജെ.പി.യുടെ രാഷ്ട്രീയ വിശദീകരണം ക്രൈസ്തവ വിഭാഗങ്ങളെ ഏറെ സ്വാധീനിച്ചിട്ടുണ്ട്. ഇതാണ് ഉപതെരഞ്ഞെടുപ്പില് ക്രൈസ്തവ വിഭാഗങ്ങള്ക്കിടയില് ബി.ജെ.പിയുടെ സ്വാധീനം വര്ധിപ്പിച്ചതെന്നാണ് രാഷ്ട്രീയ നിരീക്ഷകരുടെ വിലയിരുത്തല്.
